الأربعاء، 20 مايو 2009

انما الامم الاخلاق ما رقصت.... فان هم رقصت اردافهم رقصوا


الحكاية ان فيه نائب في مجلس الشعب تقدم بطلب احاطة بسبب انشاء معهد للهز الوسطي سوري اقصد للرقص الشرقي تابع لوزارة التعليم العالي ويخضع لإشراف ومتابعة وتمويل من المجلس الأعلى للجامعات.
مش عارف النائب الرجعي ده الموضوع واقف في زوره ليه
مافيه معاهد باليه وانواع تانية للرقص اشمعن الرقص الشرقي (الفن الارقي)
واتذكر حوار بين المبدعين سعيد صالح وحسن مصطفي لما سعيد صالح كان بيقوله
بنتك ماشاء الله ماشاء الله هاتشتغل رقاصه بصله باستغراب وقاله رقاصه قاله اه رقاصه قاله راقصه باليه يعنى رد سعيد صالح لااااا انت مخك راح لبعيد ده الباليه ده رقص رجعي بنتك هتشتغل رقاصة في كباريه وهتفتح يا ابو سوسو

يلا بقي خلينا ننشأ المعهد ونشوف جيل جديد من الراقصات اللي برخصة زي الشرام..... اللي برخصة كده وقت ان كانت الدعارة مرخصة
او فلنقل راقصة اكاديمية ببكالريوس عشان نبقي محترمين شوية
وانا من هذا المزنق اعلن تضامني بكل روحي مع الفكرة مش كفاية مصر قصرت في حق العلماء خلينا ندي العالمات حقهم بقي
وتبقي دي ثروة الامم وثورة الفكر اللي اتكلم عنها دكتور زويل
كمان من مزايا المعهد انو هيحقق اكتفاء ذاتي ويمكن يمول المجلس الاعلي للجامعات كمان كفاية النقطة اللي جاية منه
واقدم مقترحاتي علها تنفعني وابقي عملت حاجه عشان خاطر مصر
قبل كل شيء افترح شعار المعهد هزها تجيب رزقها

اقترح ان تضع الادارة العامة شروط للموافقة علي دخول البنت المعهد وهي

-الوزن لا يزيد عن 60 كيلو ملبن شريطة ان يكون ابيض ومن الناعم
-استدارة القوام وممشوقيته طبقا لما يعجب الزباين
-الانسيابية العامة
-الاستعداد الفطري للانحراف

- السكاشن سيخصص لها حجرات نوم كبيرة داخل اروقة المعهد
شرط حضور السكاشن
ببدلتي الرقص والبيبي دول وطبعا الفتاحة ويكون علني كده يعني ميشيلوش الحاجات دي في شنطة
زي البالطو بتاع طلبة طب وصيدلة كده ده فخر يا جماعه
يمنح المعهد وسام الشخلعة من الدرجة الاولي مع مرتبه احلي من الشرف مفيش
-استقدام خبراء عمليين لاعطاء السكاشن كالخبيرة فيفي عبده ودينا ولوسي
- صرف يوميا ثلاث وجبات للمتدربات(كوارع - زلموكة - مخاصي)
- تقسيم المعهد الي اقسام (هز ارداف -هز وسط -تحكم (زي اللي موجود في هندسة كده) - فتح - شعبة عامة

يعنى ممكن بعد كده واحد يسال واحدة انتى مؤهلاتك ايه تقوله انا معايا بكالريوس هز وتحكم


فيلم قصير
ام سوسو :ونبي ياختي سوسو مموته نفسها في المزاكر عشان تدخل معهد الرقص الشرقي ادعيلها ياختي ونبي
صاحبتها:ربنا ياختي معاها ومع اللي زيها
بعد التنسيق
ام سوسو : يا ابو سوسو بنتك دخلت المعهد وهترفع راسنا يا ابو سوسو
ابوسوسو :مبروك يا سوسو يا حبيبتي ده اليوم اللي بحلم بيه وبستناه من سنين واوعدك اني هجيبلك بدلة رقص م اللي فيفي عبده عرقانه فيهم
وزعي يا ام سوسو كونياك ع الحي كله علي حسابي
اه مهو الكونياك مشروب البنت المهذبة علي رأي استيفان روسيتي
تذهب البنت الي المعهد
تمثال سامية جمال في مدخل المعهد
وفيفي عبده عميده المعهد
ودينا استاذ مادة الرعشان من غير حرقان
داخل السكشن : بت يا رباب روحي افتحي الباب يا بت وارعشي وانتي رايحة
ولوسي استاذ مساعد هز الصدور
و سنية بشتكة استاذ تاريخ الرقص
وده بيدرسوا فيه ان الرقص فن موجود من ايام الفراعنه بدليل تخليدنا للراقصة الفرعونية الشهيرة هز وسط رع
وسونيا سوست : استاذ مضغ اللبان
داخل السكشن :امضغي يابت بصوت عالي والا هتنقصي في اعمال السنة
اضافة الي مواد اخري كالمرونة واللولبية
في الاجازة
سوسو:انا هنزل يا بابا التدريب الصيفي في فندق الليالي الحمراء للعائلات المحترمة
ابو سوسو: شدي جسمك يا بنتي علي وزن شدي حيلك كده اهي دي الكليات اللي تشرف مش زي اخوكي المايل بتاع طب
نهاية الدراسة
اصبحت سوسو راقصة برخصة اقصد راقصة اكاديمية ببكالريوس علي اساس ان الرقص عملي زي الهندسة والطب
تقرأ في الجرايد
-مطلوب اتنين راقصة دفعة 2014 بتقدير مرن جدا يشترط المعاينة قبل التعيين
-خليجي يطلب راقصة مصرية اكاديمية براتب مغري

ترقض سوسو الاغرائات وتفكرفي اكمال الدراسات العليا وفتح معهد متخصص باسمها في شارع محمد علي لاثراء التجربة وتدعيم الفكرة
حتي يصبح هناك معهد فيفي ومعهد دينا ومعهد سوسو واحد في شارع الهرم والتاني في محمد علي وهكذا
عشان اللي متلحقش ده في التنسيق تدخل التاني

ويبقي ده فعلا من اهم ما تحقق في عهد السيد القائد واخر منجزات الانفتاح واهم ما تحقق خارج البرنامج الانتخابي

هناك 14 تعليقًا:

حمادة زيدان يقول...

امجودي
يا جااااااااااااااااااااااااااااامد

الموضوع تحفة
والاسكريبت يجنن انت فظيع يبني

ممكن ممكن ممكن أشتغل دكتور في المعهد
ممممممممممممممممممممممممممممممممممممم

ياللا يا معلم وانت تشتغل رئيس قسم هز الوسط والارداف
ههههههههههههههههههههههههههههههههه
جامدة يبني

Yasmine Madkour يقول...

يخرب عقلك يا أمجد إيه اللي انت كاتبه ده :D:D:D

من يوم ما عرفتك و أنا أقول إنك كاتب ساخر رهيب .. :D

صفــــاء يقول...

وأرفع رأسك يا أخى لقد بدأ عهد العار

انت متاكد يا بنى من اللى انت بتقوله دة ؟
يعنى بقى فيه كليه تبع التعليم العالى بتاعنا دة للرقص ؟
أيدك عالعنوان

بس كدة يا أمجد هيستتبعها أفتتاح فروع تعليميه أخرى للمساهمه فى الاكتفاء الذاتى التعليمى فى الموضوع دة
زى معهد لم النقطه (سنتين دراسيتين)
ومركز تدريب ترعيش الانوار (دوره مدتها 6 أشهر )
والأكاديميه الدوليه لرنه الصاجات
(4 سنوات رن متواصل )

ويالا بقى خلينا نعييييش
احسن قرفنا من الفقر وركوب المترو واكل سندوتشات الحواوشى والشاورما فاضيه مفيهاش غير بصل بس
وبدل المايه الوسخه هنشرب نبيت
وشويه شويه تطلع لينا قرون وتبقى كملت

ريمان يقول...

اهو ده اللى ناقص


مش هستغرب يا امجد دى حاجه متوقعه

يلا يلا سيبهم ان شاء الله هيرقصوا فى نار جهنم كويس اوى ونبقى نتفرج عليهم بلاش

كيكى عوووووو يقول...

ارفعلك القبعة
اقصد ارفعلك الصاجات
هههههههههههههههههههههههههههههههههههههههههههههههههههههههههههههه
امجد بجد تحفة تحفة
والمصحف اية دة يابنى انا مكنتش اعرف انك بتكتب ساخر بالشكل دة
وكمان اي الشروط التعسفية دى
يعنى مينفعش اقدم!!
عوووووووووووووووووووو

أية الشقية الشعنونة يقول...

هو انا مسافة ما اغيب وارجع الاقيك مبوظها كده يا امجود
دنتا على وش امتحانات يا راجل
يلا شد جسمك قصدى شد حيلك
بس معرفناش الموضوع ده لازمله اختبار قدرات من الثانوية العامة
ولا بمجموع بقا والحركات البلدى دى

الاسكربت سو سو مجرم يا مان
يامان ..... انتا
ههههههههههههه
خليها فى سرك بقى
ههههههههههههههه
تحياتى

Walaa Elshamloul يقول...

هايلة يا أمجد
تجنن
السخرية كما ينبغي أن تكون
إلى الأمام يا روميل
قصدي يا أمجد

الكحيان يقول...
أزال المؤلف هذا التعليق.
الكحيان يقول...

تدوينة رائعة حقا قمة السخرية والتهكم لقد جعلت منهم ياسيدي خيشة تمحى بها قاذورات الأرض هذا ما كان ينقصناوالله. لكن أنا أرى أن شروطك مجحفة بعض الشيء فبلا شك سيكون هناك فتيات متفوقات وعندهن كثير من الشروط المطلوبة ورغم ذلك تحرم إحداهن لأنها مصابة بالغضروف أو الهشاشة مثلا فأين يذهب مكتب التنسيق بأمثال هؤلاءالمظلومات المتحرقات إلى الرقص أليس من الظلم أن تذهب هي كلية الطب أو يلقى بها في كلية صيدلة أو كلية علوم كحيانة في حين أن من تقل عنها في المجموع تدخل معهد الرقص من أوسع أبوابه هل يستوي الذين يرقصون والذين لا يرقصون؟ اللي عايش ياما يشوف شكرا لك أيها الساخر البارع .

ΜĄЙĄЯ يقول...

أولاً شكراً يا بشمهندس أمجد على سؤالكـ عليا

المشكلة بس انى مش بحب المدونات دى, وببقى مشغولة فى الدراسة.

ولما بتيجى الأجازة بقضّيها منتديات بس.

ثانياً:

الخبر ده والله لو حقيقى يبقى لا عزاء فى المصرين.

والحقيقة إن سُخريتكـ من اللى طلب إنشاء المعهد ده مش كفاية وقُليلة على حقارة الطلب.


وعلى رأيكـ والله ,, يعنى عاوزين يعملوا معهد زى ده وهما بيكرّموا العلماء بالعافية؟؟؟!!

الله يسامحهم بقى ويهديهم.

وشكراً جداً ع الموضوع وع التوعية.

كيكى عوووووو يقول...

ازيك؟ظ
ياااااارب تكون بخير
ياحمو العفريت
(`'·.¸ (`'·.¸*¤* ¸.·'´) ¸.·'´)
♥*** happy feast ***♥
(¸.·'´ (¸.·'´*¤* `'·.¸) `'·.¸)
*************************

غير معرف يقول...

ثقافة الهزيمة .. عصابة البقرة الضاحكة‏ 2

فى مارينا مصيف الصفوة السياسية يقول أحد أفراد الأمن بالمنطقة أول فيلا هنا أتبنت كانت لإبراهيم سليمان وزير الأسكان السابق بعدها حدد الناس اللى تسكن المكان، خصوصا أنه أهدى علاء وجمال أبناء الرئيس السابق قصرين على بعد خطوات من فيلته، ثمن الواحد منهم يعدى الـ 40 مليون جنية ( حوالى 7 مليون دولار ) ومسجلين بأسماء هايدى وخديجة زوجاتهم.

و أستطرد: فى لسان الوزراء يسكن إيضا أحمد شفيق رئيس الوزراء السابق وهو عضو فى أتحاد الشاغلين بمارينا، والوحيد من الوزراء السابقين الذى جاء بعد الثورة إلى مارينا، و له فيلا يقدر ثمنها الآن من 15 إلى 20 مليون جنية ( حوالى 3 مليون دولار ) ونفس السعر لفيلا نائب رئيس الجمهورية السابق عمر سليمان .

باقى المقال ضمن مجموعة مقالات ثقافة الهزيمة ( بقلم غريب المنسى ) بالرابط التالى www.ouregypt.us


مصر كلها تتساءل لماذا لم يتم للأن التحقيق مع أحمد شفيق و عمر سليمان بشأن ممتلكاتهم؟

Unknown يقول...

thx

كشف تسربات المياة
غسيل خزانات
شركة نظافة عامة

alwafaa campany يقول...


شركة تنظيف شقق بالخبر
شركة مكافحة الحشرات بالقطيف
شركة مكافحة نمل ابيض بالاحساء
شركة تنظيف مساجد بالدمام
شركة تنظيف كنب بالدمام
شركة تنظيف بيوت بالدمام
شركة تنظيف واجهات زجاجية بالدمام
شركة تنظيف سجاد بالدمام
شركه تنظيف بالدمام