الجمعة، 12 ديسمبر، 2008

حد يفهمني هو انا اللي نيتي وحشة ولا ايه النظام


وانا بحتفل باجازة العيد وسط الاهل والاسدكاء كل سنة وانتو طيبين
بفتح الفليفيزيون (بدلعه)
لقيت اغنية لدولي شاهين بتقول
لازم يقف علشان انا جيت لازم يقف مهو ده الايتيكيت
وتستدرك قائلة في جزء اخر من الاغنية
قبليه كتير دابو وحنو ووقفلي قبلو اجدع منه
ثم مسك الختام
انا ببقي ماشية معدية وزي منه يقف ميه
الكلام واضح وملوش غير تأويلين
وهو مايدفعنا لوضع احتمالين لا ثالث لهما
الاحتمال الاول
ان دولي الملاك المسكينة الغلباااااااانة غنت الكلمات دي ومجاش في بالها ولو للحظة يا عيني ان ممكن
انا وامثالي من الناس اللي نيتهم وحشة اننا ممكن نفكر التفكيرالوسخ ده
والاحتمال الثاني
ان الموضوع مقصود تماما
وعايزة دولي تقولنا من خلال الكليب ده انها فعاله في كيفية حدوث ماقالته
وذلك بقولها لازم يقف وكلمة لازم تعني حتمية الحدوث
اي انه لابد له من الوقوف عند رؤية دولي
وهو مايفتح مجال اخر لدولي لو بطلت غنا عشان الناس مش مقتنعة بصوتها
وهو حل مشاكل العلاقات الزوجية
وبدل مالازواج دلوقتي تاعبين نفسهم في العمليات واقراص الفياجرا واشياء اخري لا تجدي مفعا
انصح كل واحد فيهم بتعليق صورة لدولي في غرفة نومه وهو ما سيؤدي الي انتهاء المشكلة تماما
علي حد ذكر دولي وقولتها لازم
وهو مايؤكد الاعجاز الذي قامت به في اكتشاف كيفية الانتصاب وحتميه وقوعة
وهو ما يضع دولي شاهين في مصاف العلماء
فمثلما قام العلماء عن طريق النعجة دولي باكتشاف الاستنساخ وتطبيقة لاول مرة قامت دولي شاهين عن طريق الرجال باكتشاف حل سحري للانتصاب وكيفية تفعيله
وهو ما يجعلنا نرفع لها القبعات بكل فخر
ونقول لها في انتظار اغنيتك القادمة
لازم ينام علشان انا مشيت
................................................................
ملحوطة
بقول لاي حد بيقرا البوست
سوري لو كان الموضوع جريء شوية
بس انا عايز اعرف فعلا هل انا اللي نيتي وحشة وبفكر غلط
ولا هل فعلا لزوم الاستمرار في الوسط الفني هو تقديم مثل هذه النوعية من الاغاني
التي لا تحتمل سوي التأويل المفسر اعلاه

الخميس، 27 نوفمبر، 2008

ده ايه الهنا اللي احنا فيه ده

الحكاية ايه بقي
بيقولك امام الجامع بتاع السويس
اخر صلاة الظهرنص ساعة عشان سيادة رئيس الوزراء
اللي نفسي قبل مموت حد يقولي لازمته ايه يلحق يصليها
وانا بدوري بقول للامام براحتك يا عم ده رئيس الوزرا برده مش بس كده
دانا بطالب وزارة الاوقاف انها تديك اوفر تايم علي النص ساعة الزياده دي في الجامع
بس مش حرام عليك يا راجل تخليه يصلي اربع ركعات
كنت خليهم اتنين بس عشان وسط سيادته
ده برده ثروة قومية ولازم نحافظ عليها
ودعوني اطرح سؤال علي الامام العلامة
هل يجوز تاخير الصلاة نصف ساعة حتي يتمكن كبار القوم من اللحاق بها؟؟
ولا اتوقع اي مبررات او اي ردود من الامام العلامة
اللهم الا ان كان استدل علي فعلته بالاية الكريمة
(وَإِنَّ يَوْمًا عِنْدَ رَبِّكَ كَأَلْفِ سَنَةٍ مِمَّا تَعُدُّونَ)
يعني الالف سنة بتوعنا يوم واحد عند ربنا يعني مجتش ع النص ساعة
دي اللي مش هتطلع حاجه في اليوم اللي هو الف سنة
ودعوني اطرح سؤال اخر علي جنابه
ماهي المدة القصوي المسموح لنا فيها بتاجيل الصلاة ؟؟ مدام الموضوع موضوع الف سنة
يعني لو رئيس الوزرا كان اتاخر تلت ساعات مثلا ممكن ناجل الظهر ونبقي نصليه مع العصر
وهل يجوز الغاء الصلاة لو حب جنابه يصليها في يوم تاني؟
يعني مثلا لو مكنش عرف ييجي ع الظهر كنا ناجله ونصليه اليوم اللي بعدها عادي جدا ده رئيس الوزراء ياجماعة
سؤال اخر
هل يجوز تاخير صلاة الفجر مثلا
عشان لو سيادة المسئول حب يصحي متاخر ولا حاجه؟؟

بجد حاجه في منتهي المسخرة
وتلاقي الامام ده نفسه اكتر واحد بيشتكي من الغلاء اللي هو عايشة
وبيشتكي من نظيف شخصيا بس هو نفسه هتلاقيه مش فاهم
هو عمل كده ليه لان باختصار شديد
محدش فاهم حاجه

الأربعاء، 29 أكتوبر، 2008

قومتنا المنتظرة

لسنا راضين ولن نرضخ لحكم القدر
.................................انا ها هنا يا وطننا سننتصــــــــــــــــر .
فلكثرة دموعنا رضينا حـــــــــــــــتي
.................................صارت سحبا تنهمر كالمطـــــــــــــــر .
فكيف نرضي وقد توجعنــــــــــــــــا
.................................وبتنا ثكلي في غمرة السهـــــــــــــــر .
فتعالوا نفوق من نومتنــــــــــــــــــا
.................................ونحاول سويا جعل القيد منكســـــــــر .
هيا يا من سرقوا ومن نهبـــــــــــوا
.................................ومن اهينوا ومن ضربوا ومن قهروا .
هيا فقد فاض بنا هيا يا شعـــــــــب
.................................علي شرب الهوان قد جبــــــــــــــــروا .
هيا فكثيرا ما تحملنـــــــــــــــــــــــا
.................................فكيف بالله يا شعب تصطبــــــــــــــــــر .
فصبرنا لن يطفيء الجزع شمعتـه
.................................وقومتنا لن تبقي ولن تـــــــــــــــــــذر .
بات قدرنا المحتوم هي القومــــــة
.................................فتعالوا بايدينا نغير القــــــــــــــــــــدر .
فرب يوم لنا فيه قومــــــــــــــــــــة
.................................يبعد فيه الخوف عنا وينحســـــــــــــر .
فحين تقوم قومتنا فليس يمنعهــــا
.................................مانع فهي كقنبلة ستنفجــــــــــــــــــــــر .
فيا ظالمين اكاذيبكم قد كشفـــــــــت
.................................ونجاستكم قد زال عنها الستـــــــــــــــــر .
حتما قريب اليوم الـــــــــــــــــــــذي
.................................نغلب فيه ونقوي ونزدهـــــــــــــــــــــــر .
وقتها سنعلي نحن حتمـــــــــــــــــا
.................................وتصبح ظلمة الجهل لا اثـــــــــــــــــــــر .
فذوقوا يا ظالمين ما شربنــــــــــــا
.................................غدرا فها هي نهاية الظلم تنتظــــــــــــــر .
فكل ظالم قد صار عبرة قد مضت
.................................عبر الزمان لمن يرقب ويعتبــــــــــــــــــر .

الجمعة، 24 أكتوبر، 2008

عن التحرش احدثكم وعن ال Sexual repression


مبدئيا كده انا عارف اني طولت اوي من البوست اللي فات
بس بجد كانت لظروف مش بمزاجي غير كده زي مبعضكوا عرف كان عندي تسمم وكانت حالتي حاله
ومتعلقلي محاليل وبلاوي ولما فوقت لقيت الحاجه في الكلية متراكمةعلي اكتر من بلاوي الحزب الوطني مهي متراكمة علي البلد.
فلسه يادوب واخد نفسي وبقول بسم الله
وعارف اني بقالي مده مقصر مع الكل ومقصر مع نفسي لان في حاجات كنت بهتم بقرايتها وبجد انا مفتقدها لحد دلوقتي
ومستني اي فرصة اشم نفسي واعوض كل اللي فات ....صدعتكوا انا ندخل في البوست بقي
عن التحرش احدثكم وعن ال Sexual repression
تابعت مؤخرا ما حدث بخصوص السواق اللي اتحرش باحدي البنات في الشارع
والحكم الغير متوقع تماما تلت سنين سجن مشدد مع الغرامة .
وشايف في الحكم ده بادرة أمل ان ممكن المشلكة دي مش هقول تنتهي تماما ولكن علي الاقل تبقي محدوده نسبيا
تابعت المشكلة من خلال الاخبار وشوفت نهي رشدي نفسها في العاشرة مساءا وهي بتحكي
طبعا القصة للي ميعرفهاش باختصار شديد ان في سواق شافها هي وواحده صاحبتها مروحين بليل قال صيده وزنق عليها بالعربية وتحسس مناطق في جسمها هي بتقول احست بالاهانة وتتبعته وفضلت تجري ورا العربية لحد مالعربية وقفت حاولت تفتح الباب وتصرخ مفيش فايده طلعت فوق الكبوت السواق وقعها الناس ابتدت تتلم خلاص يا ابلة هنضربة وبتاع معجبهاش واصرت تاخده علي النقطة في ناس ساعدوها وبلغوا لنقطة واتيفر اللي حصل وان محدش في النقطة رضي يساعدها المهم اخدتوا علي القسم واتعمل محضر جه ابوها الظباط نصحوه هتسوء سمعة بنتك وبتاع المهم طلع راجل متحضر واتصرف بشكل صح ومستسلمش ودور علي حق بنته ورجعلها كرامتها
الملفت في الموضوع بقي كذا جزئية
الجزئية الاولي وهي بتتكلم بتقول لما لقيته بيزنق عليا وبيتحسس جسمي وبيضحك مني ضحكة سخرية حسيت بالاهانة والقهر
وقولت لا مش هينفع اقول المرادي غصب عنه
بجد متعرفوش الكلمة دي اثرت فيا اد ايه وتألمت لألمها في اللحظة دي
وازاي اي بنت بتتعرض للتحرش وهي عارفة انو مقصود بتحاول تقنع نفسها ان الشخص ده ميقصدش عشان تقدر تعيش
لان فعلا الحاجة اللي ممكن تدمر الانسان هي احساسة بالقهر فما بالك انا شخص خريج ايه يو سي
وده واحد غير مصنف كبني ادم اساسا وييجي يقهرني ويسخر مني
ازاي الانسان يقدر يعيش اساسا بعد حاجه زي كده
اتاثرت اوي لما لقيتها بتقول انا حسيت اني بنكسر في اللحظة دي حسيت انو بيدوس علي آدميتي
حسيت وقتها باي بنت ممكن تتعرض لكده وايه شعورها كل لما تفتكر اللي حصل ليها لا لشيء سوي اننا عايشين في مجتمع
متخلف ناس كتير فيه بتفكر باعضائها الملتهبة.
محامي السواق في دفاعة قال ان البنات كانو لابسين لبس مغري وماشيين يتقصعوا علي حد ذكره
وده اداله الحق في لحظة هياج انو يتحرش بيهم
هي قالت انها كانت لابسه عادي خالص وكمان صاحبتها كانت لابسه فانلة رونالدينيو( بتفهم والله ههههههههههه)
يعني لبس ملوش دعوة بالانوثة وانا كانسان ليبرالي شايف انها انشالله تنزل عريانة خالص هي حرة
ده ميديلوش الحق في انويتحرش بيها او حتي يعاكسها وهنا عايزا قول رايي في الجزئية دي
في فرق بين واحده نازلة الشارع ولابسه لبس معين عشان هي حابه تلبس كده سواء رونالدينيو او حتي ابو تريكة هي حره ربنا بس رقيب عليها وفي واحده نازلة لابسه لبس بغرض الاثارة هي مش حابة تلبس كده بس نازلة عشان تتعاكس ممكن نفرق بين الاتنين بسهولة اوي وملناش حق في التحرش باحداهما دي وجهة نظري (بس ممكن نبقي نعاكس التانية ههههههههه)
كمان ليا كومنت علي اللي حصل في القسم لما الناس نصحوا ابوها وقالوله انت كده بتسوء سمعة بنتك
هنرقعهولك علقة ويادار مدخلك شر
طبعا في ناس كتير اوي بيحصلهم كده وياما بيحصل كده وبتنتهي المشكلة ان اللي بيتحرش بياكل علقة وينتهي الموضوع
طيب فين نفسية البنت اللي حصلها كده وفين ادميتها وفين كرامتها قدام نفسها لما شخص اقل منها يدوس علي كرامتها
انا شايف ان اللي حصل ده رد ليها كرامتها وانا شخصيا لو مرتبط بواحده زي نهي وحصلها كده هيزيد تمسكي بيها وهحبها اكتر ومتهيالي اي شخص بيفكر صح هتبقي دي وجهة نظرة
(للصدفة البحتة قبل متفرج علي نهي في العاشرة كنت بتفرج علي برنامج مش فاكر علي قناة ايه بيقول هل تقبل الزواج
من فتاة مغتصبة انا ملقيتش رد علي السؤال ده جوايا سالت امي قولتيلها ايه رايك قالتلي في ايه
قولتلها لو يوم واحد فينا حب يتجوز واحده كده قالتلي لا قولتلها ليه طيب دي غلبانة ومنكسرة وملهاش ذنب قالتلي واحنا كمان ملناش ذنب)
طبعا تفكير امي كتفكير اي شخص مش بيفكر في الناس دي كضحايا زي مهو شايفهم ناس اصبحوا غير ملائمين
وهي ليها العزر طبعا دي ثقافة مجتمع بشكل عام وعموما الاغتصاب غير التحرش وهي غيرت رايها لما اتفرجت معايا علي نهي
يعني واحده متحرش بيها ماشي بس مغتصبه لا وده انا بعتبره ايجابي كمقياس لنظرة المجتمع
اللي البعض اتصل بيها وقالها انا بحملك نسبة من اللي حصلك
واللي البعض قال عليها مجنونة وبتشهر بنفسها
طبعا لو هي مجنونة فانا معاها في جنانها ومعاها انها دورت علي حقها في بلد كلنا فيه بننضرب علي قفانا وبنسكت مش لازم معركتنا تكون مع الحكومة ممكن اوي معركتنا تكون مع ظروف المجتمع ومع المجتمع نفسه
وقد تكون اصعب من معركة مع الحكومة من اجل وضع اقصادي
وقد تكون المعركة مع الحكومة نفسها ولكن بشكل غير مباشر لما سواق في لحظة هياج شافها صيدة زي مقولت واعتبر انها عشان انثي لازم تكون منكسرة وملهاش حق
السائق ده انا بحملة المسئولية بنسبة تسعين في المية والعشرة في المية بحملهم للمجتمع اللي احنا عايشينه لان السواق غير انو جاني فهو مجني عليه مش بعفية من المسئولية ولكن اكيد لو هو عايش في وضع احسن من اللي هو فيه ومتجوز وحياته فل مكنش هيحتاج يورط نفسه مقابل لحظات قليلة من المتعة الزائفة.
وبتمني ان ده يكون درس لكل شخص تسول ليه نفسه انو يتعدي علي حرية شخص تاني
حتي لو الشخص التاني ده ماشي يتقصع
وختاما بقول لنهي ولكل بنت زي نهي جميل انك تدوري علي حقك وانا لو لي اخت وحصلها كده هساندها في حاجه زي دي انشالله كل مصر تعرف اللي حصلها وحتي لو المجتمع شايف اني غلط
لان لو كده محصلش واختارنا الاسهل وهو اننا ندفن راسنا في الرمال ونكتم علي الموضوع
نفسية البنت ممكن تنهار مع عدم احساسها بالامان في بلدها وممكن تنتهي اي معاني جميلة جواها من غير منحس كالحب والايمان بالقيم وينتهي دورها كامل لما تتجوز وتصبح في الحياة كما لو كانت موظفة بتأدي دور بدون اي احاسيس او عواطف وتبتدي الكارثة وهي الانهيار التام
الموقف ده بيربطني بحوار مع صديقة من النمسا بتقضي اغلب الصيف في مصر
لما كانت بتحكيلي عن التحرش اللي بتقابله في البلد بتقولي ان مصربتعيش حالة من ال
Sexual repression
وحكتلي العديد من المواقف من شخص كانت تعرفه عن طريق النت
ولما قابلته قالها i wish to kiss you now وردها عليه try and you will die
and he said ok then let us marry just 3 month
وقالتلي بالعربي يعني هوا عايز ايه هو فاكرني (sharmota )
وموقف تاني مع سواق تاكسي
and when arrive home
i got a call so was concentrate with call and i give him money and he speak to me so i concentrate with call and not got him what he say to me when i look he was open his pantolon and show me .... i told him hemshy ya khawal he said ok and drive fast
حاولت اشرحلها الردود اللي ممكن تعملها في اللحظة دي وايه اللي ممكن تقوله بدل كاوال بتاعتها
قولتلها ممكن تقولي الحقوني او حاجه زي كده ردت عليا قالتلي انا قولتله فاك يور سيلف يا (كلمة تقال للشخص اللي معندوش حمية علي اهله) وعلي فكرة قالت كل ده بالعربي بس انا قايلة انجلش عشان اخف حده
ونزلت لقيت بوليس مان قولتله علي اللي حصل لقيته بيضحك قولتله (ياكاول تاني)
وبتقول انو كمل ضحك وقال ايه المزةالهبلة دي ردت نفس الرد وسابته
موقف تاني
and i was wear in village hejab and galabeja and even with that he told me ya mooza
ya mozza 7ata belgalabya
موقف تاني بتقول راكبة عجلة واربعة ولد راكبين عربية في المعمورة جه وقفها
وقالها ممكن اخد لفة وبتسالني يعني هو عايز ايه وطبعا كان ردها يا كلب يا كاوال والرد التاني بتاع سواق التاكسي

دي بعض المواقف هو كان في اكتر قالتهولي بس الشوية دول اللي كانوا عا لميل فلسه فاكرهم الباقي كان كلام
وهي الانجلش بتاعها بايظ اساسا والعربي مكسر فمش فاكر او مفهمتش اغلبهم

المواقف اغلبها مضحك وينطبق عليه شر البلية مايضحك
ولكن اللي استفدته من الموضوع ده التعبير اللي قالتلي عليه وهو
Sexual repression
واحط تحته خمسن خط
هل احنا فعلا عايشين كبت حنسي بالطريقة الموحشة دي وهل هو ده السبب في التحرش دايما وايه الحل لكده
وهل مصر بس اللي فيها الكبت ده وهل التحرش فيه حل لكده
موضوع طويل اوي عايز بوست تاني


الأحد، 28 سبتمبر، 2008

تاج علي متفرج

مساء الخير او صباح الفل عليكوا كلكوا كل حسب الفترة الزمنية اللي بيقرا فيها البوست
اولا انا بعتذر عن غيابي المفاجيء دون سابق انذار واني مقولتش لحد اني هغيب
وطبعا الغيبة دي مستمرة شوية ان شاء الله لظروف خارجة عن ارادتي
وميرسي بجد لاي حد سال عليا او علي الاقل حس بغيابي
واسف لاي حد مقدرتش اوفي حقه في المتابعة
انا كنت ناوي امسي عليكوا وبس واقولكوا نلتقي بعد اسبوعين تلاته كده ولكن بالصدفة لقيت
جايلي تاجين من ابلتي الغاليه ريمان والصديقة العزيزة قلب ينبض لله قولت فرصة ادردش معاكو لتاني مرة خصوصا مليش مزاج
اكتب في الشوية اللي انا داخل فيهم دول كفاية ابراهيم عيسي اتسجن بقي يبقي لازم نبطل كتابه عشان منتسجنش ونبقي
وحشين زيو حاجه تقرف بجد .....نرجع لموضوعنا بقي
تاج ريمان

1- الحالة الجسمانية بمعنى هل سيادتك تتمتع بصحة جيدة ولا الاخ صاحب مرض ؟
انا وبحمد الله كده ربنا اخد مني كل حاجه وسابلي الصحة كح كح كح كح (كحه يعني)
الحمد لله لحد دلوقتي مكتشفتش اني عندي حاجه لحد دلوقتي اوقات ضغطي بيوطي يمكن بسبب الافراط في التدخين ولكن محبيتش اقيسه ولكن اوقات لما بسمع اخبار في بلدنا الجميلة دي بحس ان عندي الضغط والسكر والمرارة


2-الحاله الاجتماعية بمعنى هل علاقتك بمن حولك جيدة ولا عامل مشاكل مع طوب الارض ؟
هي دي الحالة الاجتماعية انا اعرف الحالة الاجتماعية اللي هي متجوز ولا لا وكده يعني
بس عموما انا مطلق واعول سوري اقصد علاقتي الحمد لله حلوة بشكل كبير وبتقبل اللي قدامي
لدرجة فوق متتخيل وعندي استعداد اتحاور واتناقش لاقصي درجة والحمد لله بعرف اتعامل مع اي
شخص بشكل كويس اوي واقدر اتعامل مع كل واحد علي قد مستوي ثقافتة وتفكيره حتي لو كان في منتهي التدني وحتي لما بنهي علاقتي باي شخص بحب انو يحتفظ عني بفكرة كويسة

3-الحاله العقلية بمعنى هل تشعر ان عقلك يعمل ولا حضرتك منيم دماغك ؟
الحمد لله في اي حال بحاول اشغل عقلي بشكل كبير وبحاول دايما اكون بفكر وبحاول اشغل دماغي
في اي حاجه عشان مخي ميعطلش ولكن في اوقات بيبقي ضروري انيم فيها دماغي

4-الحاله العاطفية مش محتاجة تفسير ومش عايز استعباط ؟
من غير استعباط وبكل بساطة سنجل

5-الحاله الروحية بمعنى هل علاقتك بربنا كويسة ولا الكلام على ابو لهب ؟
والله لو كان البوست ده من سنتين كده كان يبقي الكلام علي ابو ابو لهب كمان بس
دلوقتي الحمد لله علاقتي بربنا كويسة اوي وملتزم وحتي في اشد لحظاتي الانسانية ضعف بحس
ان ربنا قريب مني وانو بيفتحلي باب للرجوع اليه


الخمس اسئلة اللى جاية دى اسئلة متنوعة
الاول : اكتر عيب فيك ونفسك تتخلص منه ؟
الكسل

الثانى : ايه الحاجة اللى عملتها وندمت انك عملتها قوى ؟
ممممممممممم هو بصراحة كل حاجه عملتها مهما كانت سيئة رغم ندمي عليها الا اني
موقن اني طلعت بمكسب منها وبازدياد خبره وبحس اني اخدت مصل ضدها
ولكن لو حاجه محدده يبقوا موقفين فعلا
موقف اديت فيه من غير حدود لانسانه مكنتش تستاهل كده مني
وموقف كان تجربة مثيرة مع اصدقائي وندمت اني خضت فيها
االثالث : اية الحاجة اللى لسة معملتهاش وحتموت وتعملها ؟
ان مجال عملي يبقي في امريكا
الرابع : اكتر دعاء بتقوله وبتردده دائما؟
-اللهم انت ربي لا اله الا انت خلقتني وانا عبدك وانا علي عهدك ووعدك مااستطعت اعوذ بك من شر ماصنعت ابوء لك بنعمتك علي وابوء بذنبي فاغفر لي فانه لا يغفر الذنوب الا انت

الخامس: لو عرفت انك هتموت دلوقتى وقالولك اخر حاجة نفسك فيها ايه ؟
اشوف رئيس تاني غير حسني مبارك قبل مموت
واشوف بلدنا احسن من كده
واقول الشهادتين واتكل علي الله

ده كان تاج الابلة العزيزة ريمان

اللي جاي بقي تاج الصديقة الغالية قلب ينبض لله


أعطيتك ثلاث وردات .. من هم الثلاث أشخاص اللى هتهديهم الورد اللى معاك ؟؟
والله انا مش رومانسي اوي كده وبتاع ورد وحاجات من دي ولكن لو تلت وردات فعلا صعب اوي احدد تلت اشخاص
ولكن متهيالي امي هتبقي اول التلاته دول


لو أعطيتك ورقة بيها 3 سطور فقط و قلت لك أكتب فيهم اللى أنت عايزه هتكتب إيه ؟؟

ما هو هدفك فى الحياة ؟
الا اضيع حق ربي في دنيتي والا انسي نصيبي من الدنيا وابقي ناجح ومحبوب واعمل حاجه فعلا تستحق
اني اموت وانا راضي اني عملتها ويرتبط اسمي بيها


إن شاء الله بكرة هيكون أحسن من النهاردة "


هل تصدق هذه المقولة ولماذا !!
لو بالنسبالي لازم اعيش علي المقولة دي عشان يبقي فيه معني للحياة وعشان يبقي فيه مبرر لاي انكسار الواحد بيمر بيه
لو بالنسبة للبلد فانا لا اؤمن بالمقولة اطلاقا ولكن اتمني


أجمل مقولة سمعتها فى حياتك ؟؟
الا كل شيء خلا الله باطل وكل نعيم لا محالة زائل
اما مقولتي في الحياة الضربة اللي متقسمش ضهرك بتقويه

من المغنى اللى بتحبه أوى ؟؟
بحب فيروز ومنير واصالة دول رقم واحد فيه رقم اتنين كتير اوي

ايه احلي اغاني بتحبها
يووووووووووووووووووه دول كتير جدا ولمغنيين غير دول بس لو هختار لكل مغني اغنيتين
اصالة: حقيقة واقعي-اغضب
منير :علي صوتك-بحر الحياة
فيروز: امس انتهينا-كنا نتلاقي
جورج: ومشينا يا حبيبي-ليه وداعنا
كاظم: يامستبده- مدينة الحب
بجد في كتير اوي ومغنيين كتير ولو كملت مش هنخلص

غزة " تمثل لك إيه فى حياتك ؟؟
جرح في القلب لا نقوي الا علي تعميقة

أعطى لإنتمائك لوطنك درجة من مائة ؟؟
للاسف 100%وصدقوني في دي ومش معني اني بنقد قسوتها علينا يبقي مش وطني
بالعكس انا وطني بنشد وبطنطن واتباهي بمجدك يا وطنطن

لو تزوجت و أنجبت بنتين و ولدين أى الأسماء تختار لهم ؟؟
غالبا مش انا اللي هختار الاربعة هسيب المودام تسمي ولو اتنين منهم
ولكن لو كده فعلا يبقي احمد وامير وسهير وسارة

عمرك غشيت وأنت صغير؟
لا لم اسعي للغش اطلاقا سواء وانا صغير او وانا كبير وعمري مبرشمت لاني بعتمد علي ربنا دايما اوقات الامتحانات
ومبحبش اخالفة ولكن في اوقات دردشنا بشان الامتحان في اللجنة خصوصا ان في القسم الامتحانات بتوصل ل7 ساعات وبنتكلم عادي في الامتحانات حاجات زي كده لكن وانا صغير كنت مستقيم اوي وكانت امي دايما تنبهني سندوتشاتك في كيسك معلوماتك في راسك مطوتك في جيبك اللي يقولك غششني قطعه وفي الثانوي طبيعي مفيش غش وفي الكلية زي مقولتلكوا يعني حاجات شبه الغش ولكن مش الغش غش يعني

لو أتعرض عليك رشوة كبيرة و انت فى زنقة مالية هتعمل إيه؟؟
مش عارف بس لو تفكيري استمر زي منا كده ومتغيرش وبقي مادي هرفض !!!!!!!!!!!!!!!!!!

قول 3 صفات ب 3 كلمات بس توصف بيهم شخصيتك ..

صعب اوي علي فكرة اوصف نفسي ولكن انا طموح لدرجة الخيال عقلاني في تصرفاتي بشكل كبير واعتقد نفسي زكي
مقولتلكوا بلاش من الاول

برضه بكلمة واحدة ايه اهم صفة عايزها في شريك حياتك

تكون مزة ههههههههههههههههههههههههههه
طبعا هو صعب صفة واحده بس لو ضروري اوي كلمة واحده تكون (بتحبني)


ايه المجال اللى غير دراستك وشايف نفسك فيه قوي ؟؟
المحاماه


بتحب السفر ؟؟
لو ليه لازمة وهشوف حاجه جديده او هعمل حاجه لازم احبه بس لو مجرد السفر وكده اطلاقا مش بحبه

طب دلوقتى حالا ايه المكان اللى نفسك تكون فيه ؟؟
نيويورك



واخيرا سامحوني بقي في الغياب القادم هتوحشوني

الأحد، 14 سبتمبر، 2008

مصر التي كانت امك ماتت اترحم عليها بقي !!!!!!!!!!

اللي حصل في الدويقة مؤخرا خلانا نتاكد ان اللي احنا عايشين فيها دلوقتي
لاهي امي ولا امك
مش دي اللي ورد ذكرها في القران ولا دي اللي اتكلم عنها الرسول
ولا حتي دي اللي اتغني بيها الشعراء ولا دي اللي كانت بخاطري ولا دي اللي عادت في دمي
امال امي فين يا بيه؟؟
سؤال وجيه من قاريء وجيه
امك يا سيدي ماتت بعد صراع طويل مع المرض بقالو ييجي سبعة وعشرين سنة من ساعة ماطويل العمر يقصر عمره مسك
وامك بتعاني والادلة كتير اوي
وشوف الفساد دلوقتي بقي عامل ازاي وشوف التعليم واحواله وشوف الاعلام مغذي الثقافة دلوقتي
بقي عامل ازاي وشوف الناس اللي كل واحد فيهم عايز يكت ويهرب م البلد علي مراكب بتاخدهم وتغرق
في هجرة غير شرعية والحكومة نايمة علي ودانها وسايبة الدنيا تولع في ظل الحزن الوطني اللي ماسكنا
بقالو اكتر من خمسين سنة لدرجة ان الاحباط دلوقتي بقي مسيطر ع الناس لمستوي لم يحدث
من قبل في تاريخ مصر
مصر اللي دلوقتي المواطن فيها بقي ببلاش وكل مدي والطبقة الوسطي بيحصلها تاكل لدرجة ان الطبقة
المستورة قربت تختفي والفقراء كل مدي بيزيدوا فقر وبيزيدوا في العدد والعشوائيات عماله بتزيد عشان
الناس تعرف تعيش وسكان المقابر دلوقتي بقوا اكتر من زوارها خلافا لاطفال الشوارع اللي مش بنشوف
ليهم علاج غير في المسلسلات والافلام كل ده وتقولي امي امك ايه بقي
امك متموتش بمبوطي برصاص اجنبي في بلده
امك متغرقش الف واحد في البحر وتمتنع عن انقاذهم وتبرأ الجاني
وامك متوقعش الجبل ع الدويقة وتتاخر في الانقاذ وتحول المنطقة لمقبرة جماعية
وامك وامك وامك وامك
لو قعدت اعدلك هتلاقيها بحسبة بسيطة اوي لا تنفع تبقي امي ولا امك
ومجاراة لما قاله العقاد اقول
لعنها الله من أم اذا ما أنجبت تئد ..... تغذى الكبار بالصغار و تأكل لحم ما تلد
كل دي دلائل تؤدي ان المصري في بلده ملوش اي تمن
وخارج بلده طبعا ملوش تمن دي من زمان اوي
وللاسف اي حد طموح دلوقتي بقت اقصي اماله انو يهاجر ويسيب البلد
او يغووور منها زي مبيقولو
اذن يبقي
قدامك حل من اتنين يا اما تنضم لقطاع المهاجرين بره البلد
يا اما تنضم لقطاع المأنتحين داخل البلد وهو ما يعرف بقطاع المقاهي
وكما قال نجيب سرور

عقود عمل ع القفا بس العمل بره

هاجر وسيب البلد مفروشه للغربان

يعنى يا إما السجون يا الشنق يا الهجره

يا اما تهمه جنون يا العيشه ع الصلبان

بجد الفساد دلوقتي بقي مالي الدنيا
وفي كل حاجه
نقرا عن هشام طلعت فساد احمد عز فساد منصور فساد
اي رجل اعمال او مسئول دلوقتي
قول وانت حاطط في بطنك بطيخة صيفي انو فاسد
حتي المساكن اللي بيقولوا خصصوها لاهالي الدويقة اتوزعت بالمحسوبية وبالفساد برده
اي خبر دلوقتي في البلد بقي ليه دعوة بالفساد حتي الاوليمبياد فيها فساد
افتكر مقولة لواحد صاحبي قالي انت مستغرب ليه ان الناس بتاخد رشوة وبتسرق
انت لو حسبتها مع نفسك كده
هتلاقي ان البلد خربانه وانك لو مسرقتش مش هتقدر
تعيش وانت دلوقتي في حكم المضطر
بصراحة انا كنت مصدوم من الكلام هو صحيح مقاليش انو بيحلل لنفسه الرشوة
ولكن هو شايف ان دي طريقة للتفكير ممكن ناس كتير اوي تتبعها
وكان ضربلي مثل لواحد بياخد 700 جنية وعنده تلت عيال
وقالي ان ده متوسط دخل الموظف وده متوسط افراد الاسرة وحسبلي انو
لازم يسرق عشان ياكلهم
بصراحة انا لما مسكت ميزانية نفسي انا مش قادر اعرف
ازاي الناس دي عايشة بجد انا بصراحة لو مكانهم مش هرتشي
دانا هنتهز اي فرصة تجيلي عشان ارتشي وعشان ابقي فاسد
دا اذا كنت انا طالب اهه ويادوب المبلغ ده مرة ونص
بيقضيني كطالب بالعافية فما بالك بقي ده يعيش ازاي
ده بالنسبة لصغار المرتشين والفاسدين فما بالك بالحيتان اللي عمالين يسرقوا لحد مالبلد خربت
كل حاجه دلوقتي في مصر بقيت فاسدة لدرجة ان
الفساد بقي قاعدة في مصر!!!!!
سواء في صورة رشوة او سرقة او واسطة ومحسوبية
وبقي
المجتمع دلوقتي متقسم لمجتميعات فكرية كل منها بقي ليه
قانونة الخاص اللي عايش بيه وفكره اللي بيفكر فيه خارج نطاق القانون والعرف
والاخلاق والدين والدستوروالاعراف والقيم النبيلة والمباديء
كل حد دلوقتي لما يفيض بيه يقولك جمال مبارك هو السبب هو واصحابه
وانا اكره التوريث وانا ضد التوريث
طيب اشمعن في دي انت ضد التوريث هو في ايه في مصر مش بيتورث ؟؟؟؟!!!!!!!!!
كليات الشرطة بتتورث وكل طالب او ملازم دلوقتي لازم يكون ابوه لواء ولا عميد
حربية نفس النظام في التوريث والوسايط
الجامعة دلوقتي تبص علي كشف الاوائل لازم يكونوا اولاد الدكاترة
وكان في صديق ليا في جامعة القاهرة فاتت عليه فرصة التعيين بيقول
ان التعيين دلوقتي بقي لاولاد الدكاترة وفي عائلات معينة معروفه في مجال
احتكار المناصب الجامعية يعني ده نقبة كذا يبقي لازم هيبقي دكتور حتي لو كان حمار
لاعيب الكورة دلوقتي لازم ابنو يطلع لعيب الممثل لازم ابنو يمثل حتي لو كان عندو
كل الامكانيات الا انو يبقي ممثل والامثلة كتييير
حتي في الصحافة الصحفيين اللي طالعين في الجرايد الحكومية كلهم اولاد الحيتان
بتوع زمان الوزرا دلوقتي بقوا اولاد الوزرا بتوع زمان او من نفس العيلة
اشمعن جت علي جمال مبارك يعني سيبوه يورثها خليها تخرب اكتر مهي خربانه
بجد الواحد شايف الدنيا سودا اوي
طيب اقولكوا علي حاجه انا كنت سعيد جدا ومنشكح اوي وانا بشوف مجلس الشوري
بيولع
ولو شفت البلد كلها بتولع هبقي مبسوط اوي !!!!
رجعت قولت طيب ازاي انا بحب البلد وازاي انا مبسوط وانا شايفها بتولع
جايز ده راجع لانها لما تولع ممكن يحصل تغيير ولكن هيهات هيهات
قولت طيب والافراد اللي المفروض مش بيحبوها من الاول عاملين ايه دلوقتي
بجد النظرة دلوقتي بقيت مادية في كل حاجه
والمشاعر محظورة والتقدم محظور
والحب محظور والرغبة في النجاح محظورة الا اذا ارتبطت كلا منها بقاعده المجتمع
الحالي وهي الواسطة والفساد والمحسوبية يعني لو عايز تنجح دلوقتي لازم تبقي مؤهل
للنجاح مش يعني زكي ولا طموح ولا عندك الاستعداد ولا الرغبة
لا عشان تنجح لازم يبقي عندك الواسطة وتبقي فاسد ويبقي معاك لزوم الرشاوي
وتبقي بايع ضميرك وبايع نفسك قبل متدخل في اي مجال عايز تنجح فيه
المجتمع اللي عايشينه بجد اصبح مادي لدرجة ان روحة قد خلصت الي بارئها
واصبح عبارة عن جسد بلا روح ولا انسانية وهو ما يبدو جليا
وواضحا لكل قضية نناقشها

وفيه الحل لكل تساؤل بنسأله دلوقتي
س: ليه مفيش راي عام موحد في مصر؟
ج :لان مفيش رد فعل لانعدام الروح عند الناس
س: ليه رجال الاعمال واكلينها والعة والحكومة ضاربة الناس علي قفاها؟
ج:عشان الناس معندهاش استعداد تعمل اي حاجه عشان معدش عندنا روح فعلا
س: ليه مهما حصل في الناس وانضربوا بالجزمة بننسي علي طول ومهما كان حجم الكارثة مفيش رد فعل؟
ج:عشان طول محنا معندناش روح مش هنعمل حاجه ومفيش اي تغيير هيحصل
س :ليه فيه تحرش بيحصل في كل حته وانعدام انسانية؟
ج:عشان الكبت اللي موجود في الناس ناتج عن غياب الروح وبالتالي غياب القيم
حتي اصبح كلا منا عبارة عن جسد بلا روح
س: ليه التعذيب اللي بيحصل في اقسام الشرطة واتهامنا للظباط انهم بلا روح؟
ج: مش بس الظباط بلا روح وبلا انسانية في تعذيب الضحايا ده الناس كلها بقوا كده
ولو اي حد طال يدوس علي رقبة اخوه بالجزمة هيعملها بلا اي سبب سوي مرض العيش بدون روح

فعلا فكر دلوقتي في اي مشكلة بتحصل في البلد ومن قبل متدور علي سبب هتلاقي انفصال الروح
عن الجسد السبب في اي مشكلة مهما كانت كبيرة ومهما كانت صغيره
ومازلنا في انتظار بعث الروح الي الجسد وبعث الام الي الولد ........................

الجمعة، 29 أغسطس، 2008

حمدي بالالا



من مدة كده اتفاجئنا بصورة رئة مؤلمة علي غلاف علب السجاير الكيلوباترا
قولنا ان الشركة عايزة تخفف استخدامها شوية وتشجع الاجنبي وبما اني بشرب م الاجنبي علي راي واحد صاحبي
فالموضوع مش فارق معايا
جت الشركة وقامت غيرت صورة الرئة ونزلت صورة حمدي بالالا علي كل العلب حتي الاجنبي
وكان في تساؤلات حول ماهية الراجل ده وبيضحك ليه في الصورة
وفيه اللي قال انو بقي اشهر من الريس دلوقتي بدليل تواجده في جيب كل واحد فينا
اتفاجئنا بعم حمدي في البيت بيتك بيقول انو مش تعبان م السجاير ولا حاجه
-وعلي فكرة ده باين اوي قي الصورة من عضلات رقبته وعروقها المشدوده وكمان من الضحكة-
وبيشرب سجاير لسه وصحته زي الفل
وان هوا بيشتغل مساعد مخرج وانضحك عليه وقالولو انت بتعمل عمل عشان مصر ياحمدي
اللي هو زي مصر مش هتنساك يا رأفت لما كنا بنشوفها
زمان ونعد نعيط ونقوم تشغل اغنية شادية يا حبيبتي يا مصر يا مصر
المهم جه دلوقتي يقول انا مقبضتش من الموضوع ده
والوزارة قرطستني وماخدتش فلوس وانا بطالب برفع الصورة من علي علب السجاير
لانها سبتتلي اضرار نفسية ومعنوية والناس في الحتة عندنا بيسموني حمدي الميت
قولت فرصة اقول لحمدي بيومي او بالالا او حتي حمدي الميت
علي المكاسب اللي بيستفادها من الموضوع ده
وهو ان الحسنات اللي اخدها من ذنوبنا كافية انها تدخلة الجنة
بجد الراجل ده بيتشتم وبيتلعن كل يوم ملايين المرات من الناس اللي سببلها الام نفسية بسبب صورته اللي علي السجاير
اسمع حد يقولي ان وزارة الصحة عندها حق في الصورة دي وبسببها ناس كتير بطلو سجاير
اقولهم
بطلو سجاير بس مش بمزاجهم ومهتدوش كده وربنا هداهم وكل واحد فيهم بقي مقطع السجاده
وم البيت للجامع ومن الجامع للبيت
داللي بطلها بسبب حمدي ده اتجه للمخدرات اوعلي اقل تقدير سابها وراح يشرب شيشة
واكيد هما مش هيقدرو ينزلولنا صورة زي صورت جنابة علي خرطوم الشيشة او علي الحجر نفسه
حاجة تانية استفدها حمدي انو معاه اثبات الشخصية بتاعه في جيبة في اي وقت
لو حد طلبه منه يطلعلو علبه سجاير
او علي اقل تقدير يروح يشتري علبه من اي مكان ويثبت بيه شخصيته
كمان لو احتاج اربع صور شخصية زي مبيحصللنا كده
يروح يشتري علبتين بس وكل علبه عليها صورة وش وصورة ضهر
وبالتالي هو لا هيحتاج يشيل بطاقة ولا يطلع رقم قومي
هو بس يروح يشتري قاروصة سجاير ويبقي معاه اثبات شخصية دائم
كل دي فوايد
الاضرار بقي
ان صورة في الزبالة دلوقتي اكتر من صور مرشحين الخزب الوطني اوقات الانتخابات علي الحوايط
واكتر من صورة السيد القائد وقت الانتخابات والوعود الانتخابية

وبقول للناس بتوع الصحة الاذكية لو انتو فعلا عايزينا نبطل سجاير
ادي نصيحة منطقية ومقبولة اوي اهي
تجيبولنا اي حد من بتوع الوطني علي الصورة
وتكتبو تحتها البرنامج الانتخابي اللي مش بيتحقق
او صورة الزعيم القائد وتخطو تحتها برنامجه الانتخابي
او تكتبو تحتها مصر بتتقدم بينا واهو كلنا عارفين بتتقدم بينا ازاي

ممكن كمان يرسموا صورة شعبولا
ويكتبو تحتها هبطل السجاير واكون انسان جديد ومن اول يناير خلاص هشيل حديد
بس يرسموه ماسك سيجارة زي مبيحصل في البرامج
ولما حد يسالو مش قولت هبتطل سجايريقولهم يناير اللي جاي
فانا برده بقول يرسمو شعبولا ويكتبو هو لسه بيشرب بس هيبطل يناير الجاي
ياريت كلنا ياولاد مصر نعمل زي الاديب شعبان عبد الرحيم ونبطل سجاير


الأربعاء، 27 أغسطس، 2008

تاج وامري لله

بقالي كتير مليش مزاج اكتب اي حاجه المهم قولت فرصة التاج ده من ميوشة
الرائعة اللي معاها بجد بتعرف الفشل الصح والمتعة في بوستاتها بلا انقطاع
قولت اديني ارغي معاكو شوية وده هيبقي اول تاج في حياتي التدوينية اجاوب عليه
جالي اكتر من تاج قبل كده بس كلهم من بتوع قول مية وستاشر صفة عن نفسك
وانا مش ليا في الليلة دي او مش بعرف اتكلم عن نفسي
المهم اليكم التاج
بدأت التدوين من إمتى؟ودخلت العالم ده إزاى؟
اول مرة عملت مدونة كان في ديسمبر السنة اللي فاتت
بس مجتش فرصة ان المولود يكبر ونسيت الباسورد بتاعها
كان اسمها مصر الحبيبة المحلوبة ولم يشأ الله لها المعيشة
وكان توجهي فيها هيبقي سياسي بشكل كبير المهم قولت
ملوش لازمة دلوقتي
لحد مجت الفرصة من شهر يونيو اللي فات قولت فرصة
ادخل العالم ده واشوف الناس دي عايشة ازاي السبب في كده
كان احساسي اني عندي حاجه عايز اكتبها وللاسف لحد دلوقتي
مكتبتش اي حاجه من اللي في دماغي يمكن لان في اوقات ببقي
مستثار فكريا واوقات كتير لأ او جايز لاني ببقي احسن في التحاور
يعني لما يكون
في رياكشن معايا .
لان اوقات لما بتكلم مع نفسي بحس ان في حاجات كتير اوي كنت
عايز اقولها ونسيت لعدم وجود تحاور اللي هي الحالة اللي بحبها اكتر
عشان كده بحس ان اللي اكتشفني في العالم ده هو اللي اعرفه من علي
الميل وخلافة بس لحد دلوقتي مقولتش فعلا حاجه من اللي في دماغي
واحيانا بجد في الردود في مدونات الناس فرصة للتعبير عن رايي
بشكل افضل من الكتابة في المدونة واوقات بقول اراء بحس فعلا
اني عايز اعمل بوست عنها بس برده موضوع التفاعل هو اللي
بيخليني اقف ودي مشكلة لحد دلوقتي
2- إيه كان إنطباعك فى البداية؟
في البداية كنت مذهول اوي من العالم ده
لاني شفته اكبر مما اتخيل وكان في افكار
فعلا اتمني اشارك الناس دي واعلق عندهم
واعرف الناس دي بتفكر ازاي مما لم يتح
لي في الحقيقة التعامل معهم
زي الملحدين والمثليين والعلمانيين
والمتشددين والمنغلقين فكريا والتفاعل معهم
والنقاش دون الخلاف
لان في ناس اعرفهم في الحقيقة لو حصل بينا
نقاش في وجهة نظر معينة ممكن نصل للخلاف
لو الموضوع يتعلق بامور حساسة
- مين أول واحد بتهتم بتعليقاته على بوستك الجديد؟
في البداية كنت فعلا بستني تعليق انجي فعلا لان دمه خفيف
اوي ورايها بيعجبني اوي وبتبص للامور من زاوية تانية
كنت بحس ان في حد بيتابعني
دلوقتي بقيت بستني اي تعليق احس ان البوست فرق معاه
فعلا وانو استفاد حاجه منه او ان ليه وجهة نظر فيه
وفي ناس كتير اوي تعليقاتها بتبقي صائبة وبتقول راي
جميل اوي بحس ان فيه عمق وبحس انو مكمل للبوست
زي راي نعناعه مثلا في بوست الحجاب والنقاب
وفي اراء شجعتني اوي وحسيت فعلا ان عندي اسلوب
السخرية في الكتابة واخرهم كان راي
ولاء و شفقة هانم واحسان بك في اخر بوست
وكان فيه راي جميل اوي لواحده اسمها
جيلان صالح مدونة الم او دموع الملائكة فعلا شاعرة موهوبة اوي
ومدونتها اكثر من رائعةوكنت بستني رايها بس فجاة المدونة اتحذفت
لو حد يعرفها ياريت يقولي
في كمان دلوقتي افنان وياسمين وريمان وايه و وبيري وامنيه ودينا
وطبعا دكتورة نور وفيه دلوقتي مشاريع ناس جديده متابعين واصدقاء جدد
اتمني صداقتنا تستمر وسعيد لاني باديء اتعرف علي مدونات ناس جداد من
الجنس الاخر اللي هما الرجاله ههههههههههه
وفي ان شاء الله ليست مدونات جديد هنزلها هتبقي رجاله بس
-إيه أهم حاجة إتعلمتها فى عالم التدوين؟
زادت خبراتي بشكل كبير في الاطلاع واتعلمت
اقرا البوست لاخره ماخدش المحتوي زي مبعمل
في نشرات الاخبار ولقتي في مدونات فعلا نقلتلي
اخبار جديده واراء غاية في الروعة اضافة الي
مواهب انا مكنتش متوقع تواجدها بالشكل الكبير ده
ام اهم مكاسبي فهما الاصدقاء الجدعان اوي
وبالذات اللي فيهم حرف النون ههههههههه
إيه أكتر حاجة كرهتها؟
اكتر حاجه فعلا كرهتها وكنت بكرهها
هي ان حد يعمل مدونة ومعندوش فكر
فيضطر انو يسرق حاجات مش بتاعته
من حد تاني او ياخد كلام منتديات وينزلو
باسمو او يشتري كتاب ويكتب شوية
كلام مش بتوعة خالص في البوست
وعلي فكرة اغلبهم بيبقي عامل الموديراشن
اكسبت يعني لازم يوافق علي التعليقات
وانا بستغرب ازاي الشخص فيهم بيحترم
نفسه لما يقرا كلام مش بتاعة ويجاوب عليه كانه
كلامه بجد شعور غريب اوي
لا ده في واحده مرة شكتلي ان بوستاتها بتتسرق
ومش بس كده ده التعليقات عليها كمان
قولتلها الشخص ده عمرو مهيبقي محترم قدام نفسه عشان
يبقي محترم قدام الناس ولما الاقي اشعار مسروقة كوبي
باست ولما بلاقي بعضهم اغبية كاتبين بوست نزل قبل كده
علي الف منتدي وكفاية ان تاخد اي حتة منه علي جوجل
هتلاقي الف واحد نزله دول بيصعبو عيا في مرة برده
دخلت عند واحد عندو تسعتاشر سنة بدون ذكر مدونات
منزل بوست عن مواقف الخطوبة المحرجه وهو لسه
مخطبش طيب جبتها منين اتاريها من كتاب لعمر طاهر اسمو شكلها باظت
وكانه كان متنبيء ان شكلها هتبوظ فعلا
فعلا الناس دي بتصعب عليا واحب اقول لاي حد
كده انت حرامي فاشل ومفقوس حتي السرقة فشلت فيها
اللي ينرفزني فعل لما الاقي حد بيعلق عندو
ومش فاهم ان ده مسروق والاقيه بيرد عليه
علي اساس انو ده كلامه وفكره فعلا
في حاجت تانية بتتضايقني نسبيا
لما الاقي حد دخل عندي ساب تعليق وهو
مقراش البوست اساسا ودي بتبان اوي في التعليق
وبقوله لو معنكش وقت تقرا البوست بلاش تيجي هنا تاني
كمان بكره لما بحس ان في حد اخد قلم في نفسه
وبيتعامل بتعالي او بيحس انو بقي مشهور
حاسس ان التدوين له تاثير؟؟
بشكل كبير بحس ان ليا اراء مجمعها في حته
واحده وممكن اي حد عايز يقراني يطلع عليها
بحس اني دخلت مجتمع في ناس فعلا اتمني اعرفها
او علي الاقي اشاركها الراي وممكن اقراها او تقراني
من خلال لينك
حسيت كمان ان لما بيبقي جوايا كلام ممكن اقوله او
تعبير عن راي او موقف او حاجه حصلت فيه مكان
اقدر اقول فيه كده
اللي هو تجميع ارائي بشكل كبير
بحس ان كوني مدون ده بيعمل انفتاح علي ناس
جامده اوي ومدونين مشهورين اقدر علي الاقل
اشاركهم الراي في حاجات معينه
شفت ناس علي قدر كبير اوي من الدماغ
والتمخيخ وناس بتعرف فعلا تفكر وناس ممكن
اتناقش معاها في اراء واطلع من المناقشة دي
بمكسب
في كمان مدونات بتبسط اوي لما ادخلها
زي اللينكات اللي في الجمب عندي وبوجه تحية
وباقة ورد لكل منهم وبحس بجد ان كل حد فيهم
عندو موهبة جبارة في مجال معين وعنده ملكة التفكير
- تهدى التاج لمين ؟
لافنان
لياسمين
وايه
وللتور جايد
ولحماده زيدان

الجمعة، 15 أغسطس، 2008

ممبار بطعم الحمار ........................محدش فاهم حاجة


العنوان محير شوية بس الحكاية ايه بقي
الحكاية ان في 7300 حمار اندبحوا عشان جلودهم تتصدر والحكومة مش عارفة بقيت الحمير بعد خلع الجلود راحت فين
الاجابة بسيطة اوي هي يعني لازم الحمير تندبح عشان ناخد منها الجلود
دي الحكومة الطيبة بتاعتنا عملت زي بوحة كده ماعمل في الخروف سلخ قبل مايدبح
الحكومة سلخت الحمار واخدت الجلد وسابته يعيش في تبات ونبات بلاش نظلم الناس من غير دليل
جاء في الاستجواب ان النائب اعتبر انه "من الطبيعى تفهم طبيعة الشعب الصيني، الذي يأكل لحوم الحمير والقطط والكلاب، كما من الطبيعي تفهم ان الصين تنظم حاليا دورة الالعاب الأولمبية، وقد تكون في حاجة ماسة لهذه اللحوم، كما قد تكون فى حاجة ايضا الى جلودها من أجل التصنيع، أما ما لا يمكن فهمه، فهو أن تستورد الصين هذا الكم الهائل من جلود الحمير دون لحومها"، متسائلا "أين ذهبت هذه اللحوم؟".
طبعا الجواب المنطقي انها في بطن سعادتك وسعادتي
اتخيل حوارا يدور بيني وبين احد المسئولين واساله
احنا من امتي بندبح الحمير وما فائدة جلودها وماذا سيحدث لو خلصت الحمير من البلد ؟
يقولي
احنا في زمن دلوقتي تتوقع فيه اي حاجه حتي لو ملهاش لازمة
اما بخصوص نفاذ الحمير فاطمن الحمير في مصر مفيش اكتر منها
التساؤل دلوقتي هل جلد الحمار بيغطي تمنة عشان يندبح بسبب كده
وهل الصين اللي اتصدرت ليها الجلود دي محتاجه جلد الحمار اللي جاي من مصر
هل الصين معندهاش جلود صناعية افضل من جلد الحمار الرديء وهل لو جلد الحمار ده مهم اوي
متقدرش الصين تعمل مزارع حمير عندها
نستنتج من ده كله ان الحمير دي اندبحت عشان تتصدر في بطونا انا وانت
طبعا انا مش عامل البوست ده عشان انقد الحكومة حاشا لله
ولكن عشان انصح كل مواطن يلحق يربيله حمارين تلاته اهو رمضان داخل
والعيد الكبير قرب وهتبقي فيه ازمة في اللحمة
دا حتي لحمة الحمير بيقولو بتبقي حمرة ومفيهاش دهون وطعمها مسكر شويتين
ولو عايز تعرف انت اكلت لحمة حمير ولا لأ سهلة اوي
اخطف رجلك واعمل زيارة لاي مكان فيه حمير وبص هتلاقي في شوق جامد اوي بينك وبين الحمار وهتلاقيه صعبان عليك ونفسك تحضنة وتقطعة من البوس اذن انتوا اصبحتو فصيلة واحده وانت سبق ليك واكلت حمير
علي فكرة المشكلة مش في لحم الحمير خالص ده صحي وطعمو لذيذ وانا واكل دلوقتي لواحدي ييجي نص حمار
المشكلة دلوقتي ان معدش في ثقة بين الشعب والحمير
يعني الفلاحين بيشتكو دلوقتي بيقولو ان حميرهم معدتش بتثق فيهم كل لما واحد يقرب من الحمار الحمار يجري
اتاريه يا ولدااااه مش حاسس بامان وخايف لصاحبة ياكله
انتو متصورين حجم الماساة اللي اصبحنا فيها
لما الحمار يقولك انا حمار منفعش غير اني اضرب وامشي واجر عربية كارو
فبلاش تاكلني اتوسل اليك
لما الحمار بفتخر انو حمار ويطلب ابسط حقوقة في البلد دي وهي انو يتعامل كحمار
يعني ميندبحش
في النهاية احب اقول لو عايزين تاكلونا حمير ولا يهمنا دا الشعب المصري يهضم الظلط
وعلي فكرة انك تنهق بعد ماتاكل لحم حمير او تحس برفس في قفاك كل دي اشاعات مغرضة
الهدف منها هز السلام الاجتماعي وزعزعة الاستقرار والنيل من الحكومة
لو عايزين تاكلونا حمير ممكن تعلنو كده وتسعروا لحم الحمير
وانا اضمنلكو ان اللحوم دي هتتباع هو الشعب لاقي يا كل لحمة
حمير حمير بس ندوقها ده في ناس متعرفش اساسا يعني ايه لحمة
بس المهم ان الواحد ياكل حمير بمزاجة لانه لما ياكل حمار غصب عنه
وقتها بس ممكن يحس انو عايز ينهق
واتذكر حديثا لجدتي
كانت بتحكيلي بتقولي ان كان في مطعم لحوم قريب منها
تفاجئت بانو تم تشميعة بالشمع الاحمر
وسبب ذلك ان المحل ده كان بيبيع لحم قطط
وقتها بس تذكر الناس الكلمة غير المفهومة التي كان يقولها
الندبجي اللي هو الويتر يعني
-لحم البسة طازة لسه-
مكنش في حد فاهم هو بيقول ايه
واديهم بيسيبوله فارغة وبيقولو ناخده علي قد عقله
اتاريه هو اللي قرطسهم كلهم
وان كنت التمس له العذر فقد نقح عليه ضميرة
ونتيجة لذلك وجد مايبرر له فعلته
وهي تلك المقولة
المهم انو عرف الناس هما بياكلو ايه
معني ان مفيش حد سالو يعني ايه لحم البسة طازة لسه
او محدش طلب منه تفسير لما يقوله فدي مش مشكلتة
دي مشكلة الشعب اللي رايح ياكل وبس
كنت اتمني الحكومة تعمل كده
وتعلق يافطات تقول ممبار بطعم الحمار
واغلب ظني ان محدش كان هيطلب تفسير لسبب بسيط اوي هو ان

محدش فاهم حاجه

الأربعاء، 6 أغسطس، 2008

حبة شعر ................حاجه كده علي ما قسم


القصيدة دي قديمة اوي معايا
كنت كتبتها في تالته ثانوي
ومكانها الوحيد دماغي
حتي مكتبتهاش في اي ورقة علي وجه البسيطة الا كراسة مذاكرة واكيد مصيرها دلوقتي الريسايكلنج علي اساس اننا دولة متحضرة المهم قولت اشوف راي الناس فيها ودي احدي الحاجات القليلة اوي اللي من تفكيري الماضي لسه بعتز بيها واليكم القصيدة ان صح التعبير ................. اتمني رايكو بصراحة حتي لو كان سيء جدا



انــتي وحــدك مـــلكة الــدلال
................... وجمالك بلغ حد الكمــــــال
ولــو وصـــفتك لـــن اوفـيكي
.................. شطر حقك في الجمـــــــال
وانـــا كــالـطـفـل فـي حــبكي
................. مهما الحق عن رجولتي قال
ســاتـعـب مــعـكـي لا مــحالة
................. لان حبك صعب المنـــــــال
فــلا تـتـركـيـنـي –رافة بــي-
.. .............. حتي لا اقع في الضـــــــلال
اعـــــلـم ان حـــــبـك صــعبا
................. فلا تجعليه لي في المحــــال
هناك صراع بين قلبي وعقلي
. ............... فلا تقطعي عليا الحبـــــــال
كــي لا اسـقــط فــاموت كمن
................. يسقط من فوق الجبــــــــال
او اجـــــرح جــرحا عـمـيقـا
.................. يأبي عقلي عليه اندمــــــال
اعــلـمـي ان حــبك غـــيرني
.................. وحول حالي لاسوأ حــــال
لــعن الله الـــحب ولا رعــاه
................... فقد قيدني بالأغـــــــــــلال
وفــي الـــنهـاية اريد اجــابة
................... منكي عن هذا الســـــــؤال
هــل تــحـبـيـنـنـي ام ان كـل
................... ما اعيش فيه خيــــــــــــال
هـل تـحـبـيـنـنـي ام اقــــــتل
................... نفسي ومصيري الرمــــال
لاكــون اضـــــــــحوكة بين
................... النساء وبين الرجــــــــــال
وتـــــضرب بي –عما قليل-
.................. في التضحية الامثـــــــــال

الجمعة، 25 يوليو، 2008

انواع الحجاب والنقاب ايضا



حديثا قرات عمود صحفي لعمر طاهر بيرصد انواع الحجاب الموجودة دلوقتي

الحقيقة المقال شدني اوي واليكم الانواع اللي رصدها مع توضيح لكل معني بفهمي واسلوبي ولكن الانواع علي حسب مهو صنفها

-حجاب المناسبات زي رمضان البنت اللي سايبة شعرها بتتحجب وبعد الشهر ترجع ريمة لعادتها القديمة

وحجاب الصدمة والخوف وبيقول انو لما الواحده ربنا يبتليها(وفاة –طلاق...وخلافة) وتبقي عايزة تبقي قريبة من ربنا فتتحجب ورايي هنا انو بيبقي سبب نفسي بنسبة كبيرة اوي نابع للمخزون الديني عندنا

وحجاب اطلعو من دماغي :يعني لما تكون البنت مزة شويتين والناس مش سايباها في الراحة والجاية تقوم تتحجب يعني انا مش (شرشورة) ولا حاجه انا بس كنت متحررة شوية وبعدين لقيت المجتمع بتاعنا عايز كده فاطلعو من دماغي بقي وفككو مني

وافتكر قال كمان ان في حجاب بالفطرة اللي هو حجاب المحتشمات تلقائيا

وحجاب منورة يا حاجه اللي هو قصده يعني لما الواحده تكبر تقول حسن الخاتمة بقي وتلبس حجاب

وربما تكون لبستو عشان شكلها ميبقاش وحش

وحجاب المضطرة اللي هي لابساه غصم واقتدار ههههههههههه علي راي اللمبي

طبعا هو نسي المسلمات اللي لبسووه علي اساس انو فريضة من ربنا وان انا مقتنعة اني هبقي متبرجة من غير حجاب فلبستو عشان ده فريضة عليا كمسلمة وانا مش باديها عشان هي بس فريضة لا دا انا مقتنعة تمام الاقتناع بالحجاب وحاسة براحة نفسية شديدة فيه وبافتناع تام اني مينفعش اكون غير كده

هو قال رايه عن الانواع اللي ممكن يكون ده شكل الحجاب فيها طبعا انا بتفق معاه فيما عدا النوع اللي نساه

ولكن هو قال ان دي بعض الامثلة يبقي اكيد مكنش يقصد ان ده كل حاجه

اللي شدني بقي للمقال انو كان رصد لحالة بس يعني هو مقالش رايه في اي حاجه وسابلك بقي نقد الاوضاع دي

حبيت اضيف بقي ان

المنقيات انواع ايضا

ودون الدخول في فرضية او عدم فرضية النقاب ده مجرد رصد لبعض انواع التنقب.... منه الخاطيء

واحده اتنقبت لما اتجوزت لانها (علي حد تعبيرها) كانت في انتظار العدل حتي تتنقب ودي مقدرتش اقرا دماغها بس اكيد ده نابع من المخزون الديني الفطري عندنا او ان الفطرة دلتها علي الاحوط (يعني النقاب اكثر حيطة من الحجاب)

واحده اتنقبت غصبن عنها لما ابوها ضغط عليها( يعني كانت عايشة حياتها ولما سيرتها اتنتورت هنا وهنا قام ابوها عشان يريح دماغه لبسها نقاب ودي ممكن تقلعو بره البيت عادي وكنت اعرف واحده كده .ابوها سمع عنها كلام قام لبسها نقاب ولسه بتخرج مع شباب ومقضياها وعايشة حياتها رغم النقاب

وفي واحده لبستو برستيج .يعني علي اساس انها لما تلبس نقاب بقي ليها وضع وسط الفتيات هي اللي تتكلم في امور الدين وخلافة

وفي واحده جوزها لبسها النقاب غصين عنها

وتحضرني الزاكرة لما كنت قاعد علي قهوة ورميت ودني مع حوار بين شباب صنايعية علي وش جواز

قال احدهم انا لما اجيوز(اتجوز يعني)اول حاجه هعملها اني البس مراتي نقاب طبعا هو ميعرفش طريق الجامع ولا عمره ركعها ولكن هو حاسس اننا عايشين في مجتمع صعب

لو مراته خرجت علي اي هيئة هيبقي عليها كلام فقال يريح دماغه وربما من باب التحكم في المراة وربما من باب الغيرة الخانقة ولكنه ليس ابدا من باب التدين

وفي واحده سافرت عملت عمرة او حج وقالت ازاي احج او اعتمر وانا مش منقبة رجعت من الحج او العمرة تنقبت لمجرد ان تكون منقبة وقد يكون نابع من المخزون الديني ايضا يعني حست انها عاصية فقالت النقاب هو اللي هيعوضني

وفي اللي لبستو علي اساس انهم من عيلة محافظة وازاي البنت تعدي ال18 من غير نقاب وده بيبقي عرف في العيلة وده ممكن ميكونش عن تدين اطلاقا

ونتيجة لما سبق سمعت عن بنات تعقن امهاتهن رغن نقابهن واخريات تستولين علي حقوق اخواتهن رغم نقابهم برده

وفيه اللي لبستو عن اقتناع تام ونداء داخلي وتنفيذ لامر ربها يعني حست الموضوع ولمسته ولبسته عن اقتناع وليس عن ضغط او لاحد الاسباب اعلاه

انا عايز اقول بس ان ده سرد لازاي البنت او الست بتلبس نقاب يعني تكملة لموضوع الحجاب بس

وعايز اوضح اني لست مع او ضد النقاب ومش بقول رايي خالص

جاست(يعني فقط بلغة الفرنجة) انا برصد حالة وبنقد وضع


الثلاثاء، 8 يوليو، 2008

تخاريف داخلية..........................شخبطة مع نفسي

خلصت الحكاية وانتهت الدراســــــــة
وبدات الاجازة
عايشين بقالنا يومين ورمينا الكراسة
ولا ندري لماذا

عايشين بـــــساجة
بلا غرض بلا لازمـــــة
مطنشين لكل حاجه
وضاربينها اوسخ جزمة


من البحر للبيت للقهوة ومن القهوة للبيت للبحر
ناكل نعيش ننام .............اغنام نستحق النحر

-يعني كانت ايام الدراسة اللي نافعة
يـــــــــــــــــــاعم
-بس كانت اكيد شــــــــــــــــــــــافعة
وشايلة عني الهم

كنت بحس اني مش عايش زي البيه
واديني بعمل حاجـــــــــــه
ومبفكرش انا عايش لـيـــــــــــــــــه
وحاطط دماغي ف تلاجة

الخميس، 26 يونيو، 2008

دلوقتي فهمت...............محدش فاهم حاجه

محدش فاهم حاجه ومحدش فاهم يعني ايه بلدنا بتتقدم بينا الشعار اللي الحزب الوطني واخده اليومين اللي فاتو دول
انا بقي هرشت التيته وفهمت ازاي بلدنا بتتقدم بينا لما مجلة
فورن بوليسي او السياسات الاجنبية قالت في تقرير ليها ان مصر في العام الجديد ترتيبها ال40 علي مستوي العالم من حيث افشل الدول
و فشل الدولة حسب تصنيف المجلة خاضع لعدم قدرتها علي السيطرة علي أراضيها ولجوئها للقوة وفشلها في اتخاذ قرارات مؤثرة وعدم قدرتها علي توفير الخدمات وفشلها في التعامل بفاعلية مع المجتمع الدولي، وعدم قدرتها علي جمع الضرائب، إضافة إلي معدلات الفساد والجريمة

و اعتقد ان علي ايد ابو جمال هنبقي ان شاء الله ال30 السنة اللي جاية وربنا يديلو طولة العمر ونتقدم ف الترتيب ونوصل للمركز الاول ان شاء الله ف عهد الرئيس تامر جمال
وهكذا تكون مصر فعلا بتتقدم بينا .......................ف ترتيب الاسوأ

مش عارف اقول ايه

امبارح وانا بتفرج علي90 دقيقة ع المحور لقيت واحده متصلة اسمها طروب خالد سعودي طالبه مصرية المهم كانت مصورة كليب ف امتحان الثانوية العامة للجنة بتاعتها وبتقول ان الامتحان جه صعب جدا وقالت احاول احل بس كانت اللجنة سايبه فجاه لقت مريم اللي هي احدي زميلتها طلعت الموبايل وكلمت ميس الاقتصاد علي حد زكرها وفضلت مده الامتحان تتملي الاجابات م الميس وكان ف التاحية التانية بنات قاعدين جمب بعض وبنات تانية وشهم في وش بعض واضافت ان المراقبين كانو بيزعقولهم عشان يوطو الصوت عشان مريم تعرف تتكلم ف الموبايل
انا شخصيا معجب بشخصية طروب جدا لانها جريئة ومسكتتش علي اللي حصل وعملت عمل ايجابي غير انها شخصية لبقة جدا وجريئة لما الاخ معتز الدمرداش مش مصدقها وبيقولها انا مليش دعوة الكلام ده كله علي مسئوليتك قالتلو طبعا
طبعا لا تعليق علي اللي حاصل لاني مش عارف اقول ايه بعد لما شفت الكليب
ولكن اللي عايز اعرفو فعلا مريم دي بنت مين عشان يتعمل معاها كده
توقعي ان الموضوع يتكوس يعني يخلص بالكوسة ومش بعيد تتعاقب طروب انها طلعت الموبايل ف اللجنة ويتلغي امتحانها او تتحول للتحقيق علي التصوير من غير اذن نيابة

مشربتش م المسيسبي

بلدناغلبانة ف ايديهم
بناخد علي قفانا منيهم
واهي ماشية وادينه عايشين
نعيش فيها سنين وسنين واحنا علي القفا واخدين

ارتجلت الجملتين دول وقت لما كنت بحاول احط التصور الحقيقي للاغنية اللي غنتها الوطنية شيرين خد بالك شيرين هيا اللي وطنية مش الاغنية وبامانة شديده الاغنية دي كنت بحسها اوي غير باقي اغاني لجنة السياسات وكنت سعيد لان كانت في ناس بتغنيها وده كان بيعلي انتمائهم وحبهم للبلد... انشالله حتي بالكلام ...اللي بعضنا افتقده ومقدرش يحسها ويديلها حقها
مين بقي اللي قدر شيرين
اتذكر وانا بسمع الاغنية مع احد اصدقائي قالي تخيل الاغنية دي اي حد ممكن يغنيها الا شيرين قولتلو اشمعزة قالي لان طفولتها كانت تقريبا طفولة اطفال شوارع واتبهدلت واتمرطط كتير ورغم عدم تاكدي م المعلومة قولت له مهما اللي اتبهدلو ف البلدي هم اكتر الناس بيحبوها
اتاريني اخدت بايلpile كبير لما لقيتها سافرت امريكا عشان بنتها تتولد هناك وتاخد الجنسية
وهي بعملتها دي غير انها بتنكر حب البلد وغير انها ادتنا كلنا بايلز مش انا بس. فانا بقترح عليها تغني
مشربتش م الامازووون نكون او لا نكون
او
مشربتش م المسيسبي حبيكو يا حبيبي اه حبي

الأربعاء، 25 يونيو، 2008

ام اجوجو

اخر شيء كان ممكن اتخيلة ان اجوجو بيه ميلعبش ف الزمالك وخلاص قولنا وش انو ف الزمالك واصحابنا الزملكاوية يقولولك خبي عيالكو اجوجو جالكو اتاريه هو اللي اديهالكو وضحك عليكو
انا شخصيا كنت مقتنع انو وش في الزمالك بسبب الصورة اللي شفتها وهو ماسك فانلة الزمالك وبالامارة رقم 26 قولت يبقي بيحصل زي اي دولة محترمة لما لاعب بياخد الرقم الموضوع انتهي والخلاف انتهي اتاريني مضحوك عليا والصورة كانت ف المطار ومكتوب وراه الوصول وباين اوي انهم ادوهالو يفرجوله نوع القماشة زي مهو باين ف الصورة وهوب صور يا جدع واضحك ع الناس بجد انا ضحكت اوي لما اكتشفت ان الموضوع ضحك ع الدقون ويفضلو يشتغلونا شهرين كاملين ان اجوجو جاي وييجي اجوجو يقولك انا لا افضل اللعب في الدوري المصري بصراحة معاه حق والله بس هو جه القاهرة ليه ورجع تاني مكان يريح دماغه وجيوبنا من الاول

وعلي راي رجاء الجداوي يا شماتة ام اجوجو فيا
ام اجوجو مين؟

الثلاثاء، 24 يونيو، 2008

اعدام احد افراد العائلة الحاكمة ف الكويت

اكدت محكمة التمييز الكويتية الثلاثاء عقوبة الاعدام الصادرة بحق الشيخ طلال ناصر الصباح احد افراد العائلة الحاكمة في الكويت بعد ادانته بتهريب مخدرات والحكم دلوقتي ف انتظار موافقة امير الكويت اللي يقدر يخفف الحكم شوية بس انا شايف ان لما عمنا طلال ناصر يتحاكم ويتحكم عليه بالاعدام ويتصدق علي الحكم انا شايف ان ده حدث تاريخي ويستحق انو ميعديش بالساهل لان عندنا ف مصر لو واحد جوز خالته شغال امين شرطة واتمسك ف نفس القضية المحضر بيتقطع قبل ميوصل للنيابة واهي ماشية
بس انا نفسي افهم دلوقتي هو الشيخ ده كان بيتاجر ف المخدرات ليه عايز يكون نفسة ولا عايز يشتري مهر ولا بيجري علي ايتام ولا عليه شيكات المعروف ان عائلة الصباح ف الكويت اغني عائلة عربية واغني من عائلة ساويرس ف مصر وتتميز بالترف والغني الفاحش

بقيت ماحوظة صغيرة
من اكتر من عشر سنين صاحبنا ده علي مايزكر خدر عدوية وقطعله لغلوغه وسابة ينزف بين الحياه والموت ومنعه من ممارسة الحياة الزوجية او الانجاب طبعا الحكاية دي مش من عندي دي مشهورة جدا وعدوية اعترف بيها وحفظا لماء وجهة قال ان ربنا شفاه
ودلوقتي عدوية هايص وبيقول ان ربنا اقتص ليه بركاتك يا شيخ عدوية

انتحر لما شاف كارلا بروني

غزة - أطلق جندى اسرائيلى النار على نفسه اثناء وداع الرئيس الفرنسى نيكولا ساركوزى فى مطار بن جوريون عصر الثلاثاء
وطبعا اخوانا بتوع الحرس الجمهوري لساراكوزي مصدقو سمعو الطلقة من هنا وقالك هوب ارهابيين وخبي عمك ساراكوزي ومزته كارلا اللي ف اغلب ظني ان المجند ده انتحر لما شافها وبرده حرس شيمون بيريز عمل نفس الليلة
السؤال دلوقتي الراجل ده انتحر ليه
ممكن يكون كان عايز يعرف كارلا انها اغلي حاجه عندو وانه ميقدرش علي بعدها او صعبت عليه نفسه لما مشت وسابته بجد مش لاقي تحليل لانتحارة ف الوقت ده بالذات غير كده

الاثنين، 23 يونيو، 2008

معلومات اثرائية..........طبعا مش من عندي

معلومات غريبة لا يعلمها الكثير من الناس
هل تعلم انك إذا التقطت صورة بالكاميرا في يوم
اكتمال القمر.. فانك سترى أشباحا .. ويمكنك ملاحظتهم
بوضوح..
هل تعلم انك إذا أضفت بصلا إلى كميه من
الصودا.. فانه سيتكون لديك غاز الاسيد السام
والقاتل
هل تعلم انه في إحدى المحيطات البعيدة توجد
دوامة بحرية من يسقط بها يجد نفسه في الفضاء
خارج الغلاف الجوي..
هل تعلم انك إذا أكلت فاكهة بعد شربك للقهوة
فانك ستموت فورا ..... وهذه حقيقة لم يستطع العلماء
تفسيرها..
هل تعلم انك إذا تحدثت في اليوم الواحد أكثر
من 1400 كلمة.. فانك مهدد بالإصابة بجلطه دماغية..
هل تعلم انك إذا استلقيت على الرمال لمدة 5
ساعات متواصلة فانك ستجد نفسك
في الجهة الثانية من الكرة الأرضية.. وهذه حقيقة
غير مجربة حتى الان
هل تعلم انك اذا قلت.. زوباغ.. ريباغ..عسواج..
مزهاغ.. فانك سوف تسمع أصوات أشباح
هل تعلم انك إذا صدقت كل الكلام الي فوق
حرام فيك الكمبيوتر!

خلاصة الكلام وغلقا لموضوع الثانوية

يا جماعه كل الموضوع ان الناس اتعودت ومن فتره مش بسيطه ان الامتحانات بتيجى سهله وكمان فيها فرص للاعاده وعلى سنتين بحيث ان كل الطلاب تعدى المئه فى المئه وان اخيب طالب يدوب يجيب تسعين فى المئه ودا طبعا كلام فارغ والا فأن مصر بلد كل ابنائه عباقره , فاللى حاصل دا أمر طبيعى علشان اولا تبقى صوره المجاميع طبيعيه وكمان علشان يحصل تفاوت فى الدرجات ما بين الطلاب ودا غرض الامتحانات لكن ان الكل يحفظ ويدخل امتحان سهل يكتب اللى حفظه ولو لقى نفسه انه اقل من 100% يعيد الامتحان علشان يظبط نفسه على ال100% فدا عبط واستهبال , وبعدين هو لو الامتحانات صعبه ماهى على الكل ولازم هتنعكس على مجاميع القبول بالجامعات والا الناس فاكره ان الولاد يعينى هما اللى مجاميعهم هتقل وهتفضل مجاميع القبول متشعلئه فى الهوا لوحدها , ماهى لازم هتقل بالتبعيه لانها انعكاس لدرجات الطلاب انفسهم سوا بالزياده او النقصان فمشلازم الخوف والاحزان دى , لازم نعترف ان الوضع فى العشر سنين الاخيره هو اللى كان غلط وكان لازم يتغير
اغرب حاجه ان اولياء الامور تسمعهم الواحد منهم يقولك ان ابنى جاب فى تانيه ثانوى خمسه وتسعين فى المئه واخر يقولك انا ابنى جاب مئه ونص ازاى يدخل الامتحانات السنه دى وميحلش سؤالين او ميحلش نص الامتحان دا متفوق وعبقرى , طبعا دا عبط لان الابن لابيكون عبقرى ولا حتى متوسط كل ماهنالك انه حفظ ورص اللى حفظه والمجموع دا مجرد رقم لا يدل على شئ والدليل على كلامى ان كل الطلاب اللى دخلوا كليات القمه فى السنوات الاخيره فى ظل نظام سهوله المجاميع وارتفاعها بيفشلوا فى الجامعه فشل ذريع

محدش فاهم حاجه

قال الدكتوراحمد نظيف إن هدف الحكومة هو الاستمرار فى السعى لثبات معدلات النمو الحالية للسنوات القادمة.

وأكد أن السبيل لتحقيق شبكة الامان الاجتماعى ورفع مستوى معيشة المواطن انما سيكون

عن طريق تحقيق معدلات نمو اقتصادية اعلى من 6% للسنوات العشر القادمة.

اقطع دراعي لو كان حد فاهم حاجه

وتدعوني الحاجه الي تذكر الكاريكاتور

لما اب علي فراش الموت بيقول لابنه اللي مهون عليا موتي انك هتعيش لما تشوف اثار النمو الاقتصادي

وعلي راي المثل اديني ف الهايف وانا احبك يا نظنظ

الاحتقان الطائفي

استفذني كثيرا ما يحدث في مصر من احتقان بين الاقباط والمسلمون وبالذات لما الموضوع وسع اوي وشرخ وامتد لاكتر من منطقة ف الجمهورية وخصوصا دير ابوفانا المهم افتكرت الموضوع ده كله لما شفت صورة تظاهرية لاقباط هولندا رافعين لوحة مكتوب عليها بالعربي البيت بيت ابونا وييجي الاعراب يطردونا وردا علي اليافطة دي بقول لكل قبطي فاكر نفسة صاحب البلد واحنا الدخلاء عليه علي اعتبار ان مصر كانت مسيحية قبل اسلامها أننا جميعا - مسلمين ومسيحيين - أصحاب البلد و أجدادنا جميعا هم المصريون القدماء المعروفون ب"الفراعنة" وإنما دخول معظم المصريين آن ذاك فى الإسلام وبقاء الأقلية على دينهم إنما يدل على سماحة الإسلام الذى اختاره معظم المصريين و ترك الحرية لمن أراد الاحتفاظ بدينه بدليل احتفاظهم بدينهم إلى اليوم وفى النهاية نحن نحب إخواننا المسيحيين فى مصر ونفديهم بأرواحنا لأننا جميعا شركاء فى الوطن ونحن جميعا "أصحاب البلد"!!.

المشكلة ف الاهالي

لقيت طالبة بالمرحلة الثانية للثانوية العامة بمحافظة بورسعيد مصرعها "الإثنين" بعد أن ألقت بنفسها من الطابق السادس من مسكنها بسبب الخوف من الإمتحان بعد أن أصيبت بحالة من الهياج العصبى.
انا شايف ان الاعلام مافور الموضوع اوي وبيثتير الاهالي عشان يلاقي حاجة يرغي فيها وبعدين لما كل الناس تطلع مبسوطة من الامتحان ويكون امتحان عبيط...طيب احنا كده سمحنا للاغبياء بالتفوق كالعاده ..الجمل ملوش دعوة لان ده المفرض والصح ..وانا شايف ان السبب في انتحار العيال دول هما الاهل اللي بيعملوا ضغط رهيب ع الطلبة ..انهم لو مدخلوش كلية معينة معناه ان فاشل ومعناها انها اند اوف ذي وورلد وده طبعا غلط بعدين دي ينت مش عارف ايه اللي الضغط العصبي اللي يخليها تنتحر عشان كده بقول ان الاهل السبب والاعلام مدان معانا يعني البنت كانت هتخلص ومش هتلاقي شغل هما الرجالة لاقيين لما البنات هيلاقو وتعد جمب امها تستني عدلها الي مش هييجي لان محدش لاقي ياكل عشان يتجوز لحد متعنس وقتها كان يبقي ليها حق ف الانتحار اللهم ارحمها واغفر لها

لو كل كلب عوا القمته حجرا لصار قدر الحجر مقداره ذهب

افتكرت الحكمة دي وانا بقرا الخبر ....شن الروائي البريطاني "ايان ماكيوان" هجوما عنيفا على ما اسماها "الجماعات الإسلامية" في أوروبا وقال انه "يحتقرهم" ويكره تجمعاتهم ..... وقبلها علي طول الشخص اللي قال لا لاسلمة الدانمارك ورسم ف الجرايد قاضيات محجبات علي اساس ان مهنة القضاء هناك بيمارسها الستات في حين ان مفيش ولا قاضية مسلمة هناك وقبليهم اخينا بتاع الرسومات المسيئة والحادثة الاشهر ايات سلمات رشدي وقبليها الكلب مؤسس البروتستانية اللي اسمو مارتن لوثر الموضوع كتر اوي واي كلب دلوقتي عايز يتشهر يقوم يشتم الاسلام والمسلمين وانا بدعو من خلال المدونة اي مسلم انو ميلتفتش للحاجات اللي زي كده لان احنا اللي بنشهر الاسائات دي وتزكرو المثل اعلاه