الجمعة، 25 يوليو، 2008

انواع الحجاب والنقاب ايضا



حديثا قرات عمود صحفي لعمر طاهر بيرصد انواع الحجاب الموجودة دلوقتي

الحقيقة المقال شدني اوي واليكم الانواع اللي رصدها مع توضيح لكل معني بفهمي واسلوبي ولكن الانواع علي حسب مهو صنفها

-حجاب المناسبات زي رمضان البنت اللي سايبة شعرها بتتحجب وبعد الشهر ترجع ريمة لعادتها القديمة

وحجاب الصدمة والخوف وبيقول انو لما الواحده ربنا يبتليها(وفاة –طلاق...وخلافة) وتبقي عايزة تبقي قريبة من ربنا فتتحجب ورايي هنا انو بيبقي سبب نفسي بنسبة كبيرة اوي نابع للمخزون الديني عندنا

وحجاب اطلعو من دماغي :يعني لما تكون البنت مزة شويتين والناس مش سايباها في الراحة والجاية تقوم تتحجب يعني انا مش (شرشورة) ولا حاجه انا بس كنت متحررة شوية وبعدين لقيت المجتمع بتاعنا عايز كده فاطلعو من دماغي بقي وفككو مني

وافتكر قال كمان ان في حجاب بالفطرة اللي هو حجاب المحتشمات تلقائيا

وحجاب منورة يا حاجه اللي هو قصده يعني لما الواحده تكبر تقول حسن الخاتمة بقي وتلبس حجاب

وربما تكون لبستو عشان شكلها ميبقاش وحش

وحجاب المضطرة اللي هي لابساه غصم واقتدار ههههههههههه علي راي اللمبي

طبعا هو نسي المسلمات اللي لبسووه علي اساس انو فريضة من ربنا وان انا مقتنعة اني هبقي متبرجة من غير حجاب فلبستو عشان ده فريضة عليا كمسلمة وانا مش باديها عشان هي بس فريضة لا دا انا مقتنعة تمام الاقتناع بالحجاب وحاسة براحة نفسية شديدة فيه وبافتناع تام اني مينفعش اكون غير كده

هو قال رايه عن الانواع اللي ممكن يكون ده شكل الحجاب فيها طبعا انا بتفق معاه فيما عدا النوع اللي نساه

ولكن هو قال ان دي بعض الامثلة يبقي اكيد مكنش يقصد ان ده كل حاجه

اللي شدني بقي للمقال انو كان رصد لحالة بس يعني هو مقالش رايه في اي حاجه وسابلك بقي نقد الاوضاع دي

حبيت اضيف بقي ان

المنقيات انواع ايضا

ودون الدخول في فرضية او عدم فرضية النقاب ده مجرد رصد لبعض انواع التنقب.... منه الخاطيء

واحده اتنقبت لما اتجوزت لانها (علي حد تعبيرها) كانت في انتظار العدل حتي تتنقب ودي مقدرتش اقرا دماغها بس اكيد ده نابع من المخزون الديني الفطري عندنا او ان الفطرة دلتها علي الاحوط (يعني النقاب اكثر حيطة من الحجاب)

واحده اتنقبت غصبن عنها لما ابوها ضغط عليها( يعني كانت عايشة حياتها ولما سيرتها اتنتورت هنا وهنا قام ابوها عشان يريح دماغه لبسها نقاب ودي ممكن تقلعو بره البيت عادي وكنت اعرف واحده كده .ابوها سمع عنها كلام قام لبسها نقاب ولسه بتخرج مع شباب ومقضياها وعايشة حياتها رغم النقاب

وفي واحده لبستو برستيج .يعني علي اساس انها لما تلبس نقاب بقي ليها وضع وسط الفتيات هي اللي تتكلم في امور الدين وخلافة

وفي واحده جوزها لبسها النقاب غصين عنها

وتحضرني الزاكرة لما كنت قاعد علي قهوة ورميت ودني مع حوار بين شباب صنايعية علي وش جواز

قال احدهم انا لما اجيوز(اتجوز يعني)اول حاجه هعملها اني البس مراتي نقاب طبعا هو ميعرفش طريق الجامع ولا عمره ركعها ولكن هو حاسس اننا عايشين في مجتمع صعب

لو مراته خرجت علي اي هيئة هيبقي عليها كلام فقال يريح دماغه وربما من باب التحكم في المراة وربما من باب الغيرة الخانقة ولكنه ليس ابدا من باب التدين

وفي واحده سافرت عملت عمرة او حج وقالت ازاي احج او اعتمر وانا مش منقبة رجعت من الحج او العمرة تنقبت لمجرد ان تكون منقبة وقد يكون نابع من المخزون الديني ايضا يعني حست انها عاصية فقالت النقاب هو اللي هيعوضني

وفي اللي لبستو علي اساس انهم من عيلة محافظة وازاي البنت تعدي ال18 من غير نقاب وده بيبقي عرف في العيلة وده ممكن ميكونش عن تدين اطلاقا

ونتيجة لما سبق سمعت عن بنات تعقن امهاتهن رغن نقابهن واخريات تستولين علي حقوق اخواتهن رغم نقابهم برده

وفيه اللي لبستو عن اقتناع تام ونداء داخلي وتنفيذ لامر ربها يعني حست الموضوع ولمسته ولبسته عن اقتناع وليس عن ضغط او لاحد الاسباب اعلاه

انا عايز اقول بس ان ده سرد لازاي البنت او الست بتلبس نقاب يعني تكملة لموضوع الحجاب بس

وعايز اوضح اني لست مع او ضد النقاب ومش بقول رايي خالص

جاست(يعني فقط بلغة الفرنجة) انا برصد حالة وبنقد وضع


هناك 50 تعليقًا:

dina seliman يقول...

اخيرا موضوع جديد

موضوع جميل جدا
وعندك حق بالنسبه للمحجبات او المنتقبات

بس بجد انا فى طول معاملاتى مالقتش واحده منتقبه كويسه
دايما ضد تصرفاتهم
انا مش بسئ ليه ابدا
بس ده عن تجربه شخصيه
بيحسوا انهم احسن من الكل ووصلو لمرحله من الدين انهم يفتوا فيها

enjy يقول...

ميجو ازيك يا واد مبروك على النجاح والاحصاء خليها فى سرك وبلاش سياح والحاجة الساقعة سلم واستلم مش انت كمان نجحت؟؟؟؟؟
حلو البوست بس عندى مداخلة طبعا كالعادة .... بالنسبة للنقاب فى ناس بيلبسوه عشان بتبقى حاسة انها عورة ولازم تتدارى وكمان عشان تلاقى واحد ابن حلال مصفى لاخر قطرة يتجوزها و كدة يعنى...............
تحياتى على البوست دة بس والنبى يا اخويا ذاكرة بالذال مش بالزين فضحتونا قدام الاجانب...........

Amgad يقول...

دينا سليمان
اخيرا يا ستي موضوع جديد
مش عارف ليه مكنتش قادر اكتي الفترة اللي فاتت دي ربما ملقيتش ما يستحق التعليق عليه الفترة اللي فاتت او مكنش عندي حاجه اكتبها
المهم
بلاش تحكمي علي المنقبات كلهم حتي لو ملقيتيش واحده تستحق حتي الان اكيد هتلاقي في المستقبل فبلاش تكوني فكرة دلوقتي الا لما تنخرطي اكتر في التعامل
كلامك يؤيد موضوع البرستيج اللي انا اتكلمت عنه ان بعضهم لابساه برستيج
مبسوط اوي يا دينا انك لتاني مرة اول تعليق بحس ان بقي في حد فعلا بيدخل عندي يوميا ومرحبا بيكي كزائرة دائمة دايما
بس طبعا انا عاتب عليكي في حاجه انتي عارفاها دخولك بجد بيبسطني اوي تقبلي خالص تقديري

Amgad يقول...

انجي
انا قولت والله لازم تعليق لواحدك تتحطي في شباك تعليق خاص
تخيلي انا ممكن اعملك بوست مش بس تعليق لواحدك
الله يبارك فيكي
والاحصا خلاص مش هقول لاي حد انك شايله احصا ومش عارفة تنجحي فيها .
اما بمناسبة الحاجه الساقعة قطبعا انتي انسانة جميلة وحساسة التقدير المعنوي احسن لك من المادي
يعي مبروك احسن عندك من صندوق حاجه ساقعة ولا ايه...
اما انا بقي فانا لو كتبتي فيا شعر انا مصمم ع الحاجه الساقعة
مداخلتك مقبولة
وان كانت تتوافق بشكل كبير اوي مع النوع اللي لبسو عن اقتناع
مهو اقتناع يعني بيداري عورة
اما بقي موضوع المصفي فده غالبا بيجي قبل النقاب مش بعده
لانها لو اتنقبت قبله مش هييجي وده بيحصل في اكتر من تسعين ي المية من الحالات
هو انا كتبت زاكرة بالزين اشك لان كلمة (زاكرة)انا عارفها كويس وعمري منساها ...هاهاهاهاها

نعناعة يقول...

مشكلة رصد المظاهر رغم عدم تدخلة بالرأى انه لا يتعدى السطح لا يدخل الى العمق.. يعنى الاسباب التي دفعت الاب الى في موضوعك انه ينقب البنت عشان سمعتها بقت وحشه بدل ما يشوف اصلا السبب الى خلى سمعتها كده اكيد تربيته ليها والقيم الى زرعها جواها بقصد او بدون قصد
الراجل الي ما بيركعهاش زى ما بتقول لكن برده هاينقب مراته لما تجوزها .. غالبا لانه عارف هو نفسه بيعمل ايه ويقول ايه لما واحده لابسه لبس عادي بتعدى ادامه فقال لنفسه عشان ماحدش يعمل معاها او يسمعها من الى كنت بعمله او بقوله مع الأبلوات التانين

النقطة الى هاتلقيها مشتركة في معظم الامثلة و التصنيفات الى انت وصاحب المقال قدمتوها هي ان احنا مجتمع لا يهتم الا بالمظاهر و يظن ان المظاهر هي الحل وبننسى دايما ان تحت الى بره في جوه والى جوه ده غميييق أوى وان استبدال الشنيون بالطرحة أو رمي الاسترتش وسبغ النقاب مش هايحل الازمة الى جوة بكبيرة هايشتغل زي المسكن بس مسكن قصير المفعول اول ما ينتهى المفعول هايرجع جوة يوجعك .. عشان كده سعات بتلاقي واحدة اتحجبت حجاب مودرن ما يفوتش كام شهر ويبقى حجاب عادي بعدين تلبس عبايه بعدين اسدال وفي لاخر نقاب وانا هنا ما باتكلمش عن الناس الى بتبقى دى درجات ترقي لوعيهم و إلتزامهم الديني انا بتكلم على ناس أمثال بنت او زوجه الاخ الميكانيكى كل مرحلة من دول بتكون مسكن أو ما يبطل المفعول تلاقي ان رغم مظهرها برده ناس ما بتحترمهاش لان ضحكة ولا تصرف مش ولا بد فضحوها و بقي كل القماش الى هى مستخبيه فيه ولا كانه موجود .. تقوم تروح تجيبب قماش زيادة و تحط وهلم جرا

لازم قبل م نغير برا نغير جوا لما نتغير من جوا الاول بره ده هايبقى تحصيل حاصل لكن من بره بس جوه هايفضل ينغص علينا عيشيتنا

معلش طولت عليك (:

Amgad يقول...

نعناعة
معاكي حق في كل اللي قولتيه فروم ايه تو زد
بجد انتي جبتي كل اللي كنت عايز اقوله وكل اللي كان المفروض اقولة
رايك صائب مليون في المية معاكي حق بجد في كل اللي قولتيه
المشكلة جوه مش بره
خالص تحياتي وتقديري ليكي
واتمني تشاركينا علي طوول

قلب ينبض لله يقول...

هو مين بييجي الأول
اننا نتغير من جوا فتكون النتيجه ان تصرفاتنا ولبسنا يتغير هو كمان

ولا أننا لما نحاول نغير لبسنا وتصرفاتنا طبيعي هانتغير من جوا وهانكون كويسين

ربنا بيقول في كتابه الكريم "أن ربك هو أعلم بمن ضل عن سبيله وهو أعلم بمن أهتدي"

وبأمانه بوست حلو أوي طرحت في قضيه منتشرة جدا ولكن بطريقتك وأسلوبك

تحياتي

المبرمج المحترف يقول...

لا لا بجد مدونتك هايله يا هندسه

أما ف حكاية الحجاب دى انا والله شوفت حاجه غريبه النقاب المفروض بيبقا طرحه طويله عليها النقاب هيا بقا لابسه أشرب وعليه نقاب ..
مبقوش بيلبسوه عشان فرض اوسنه بيلبسوه زينه..

معلش الناس مش فاهمه سنه النبى

عمر

SD_M_O يقول...

إزيك يا امجد باشا :)
مبروك النجاح يا زعيم ما شاء الله ...
عندي ملاحظتين بعد إذنك :)

"قال احدهم انا لما اجيوز(اتجوز يعني)اول حاجه هعملها اني البس مراتي نقاب طبعا هو ميعرفش طريق الجامع ولا عمره ركعها ولكن هو حاسس اننا عايشين في مجتمع صعب

لو مراته خرجت علي اي هيئة هيبقي عليها كلام فقال يريح دماغه وربما من باب التحكم في المراة وربما من باب الغيرة الخانقة ولكنه ليس ابدا من باب التدين"

النقطة إنك جزمت بإنه ليس ابدا من باب التدين ..وإنه عمره ما ركعها .. وكأنك بتراقبه طول الوقت ..
ــــــــــــ
الملاحظة الثانية .. :)للأخت قلب ينبض لله ...
"اننا نتغير من جوا فتكون النتيجه ان تصرفاتنا ولبسنا يتغير هو كمان

ولا أننا لما نحاول نغير لبسنا وتصرفاتنا طبيعي هانتغير من جوا وهانكون كويسين"

جزاك الله خيرا على التوضيح .. ففعلا يجب أن يغير الإنسان نفسه نحو الأحسن .. ولا يلقاها إلا الصابرون ..
المشكلة بقى إن الواحدة تنتظر إنها تتغير من جوا وبعدين تلبس النقاب ..
علشان كده هتضطر تستنى طول عمرها ..

لكن مجرد التفكير في النقاب .. او في الحجاب .. خطوة للأمام تؤهلها لإنها تلبس النقاب اوالحجاب ...
من بعض الردود اللي ممكن نسمعها من بعض الفتيات "مقدرش البس النقاب إلا لو بقيت أده ".. فهي تنتظر أن تكون على قدر كافٍ من العلم الشرعي والخلق والدين .. حتى تكون مؤهلة لارتداء النقاب ..
مفيش إنسان مبيغلطش.. والإنسان بيبقى طول عمره بيتعلم .. حتى أعظم العلماء .. هم افقر الخلق إلى الله .. واكثرهم علما بجهلهم ..وكلما زاد الإنسان علما .. كلما زاد علما بجهله .. فبكده محدش هيلبس النقاب .. ولا حد هيطلق اللحية ..

مع العلم .. وهذا عن تجربة شخصية ..
اللحية والنقاب بتربي الإنسان . بغض النظر انا ملتحي ام لا ..

وصدق رسول الله صلى الله عليه وسلم.. الذي بلغ عن الله تعالى قوله في الحديث القدسي .. " من تقرب إلي شبرا .. تقربت إليه ذراعا .. إلى اخر الحديث .."

بالتوفيق إن شاء الله ..
جزاكم الله خيرا.. وشكرا يا امجد على عرض الموضوع .

منار يقول...

السلام عليكم ورحمة الله وبركاته

والله موضوع جميل جداااا وكويس أوى أنه اتطرح على مدونة جميلة زى دى.

أنا شايفة إن الرأى الصائب من بين اللى قرأتة رد"قلب ينبض لله".

لأن إحنا لازم نبدأ بالحاجة اللى تودينا لطريق ربنا.(يعنى مينفعش نقول نغير جوانا وبعدين بره)وسبحانه تعالى يقول:إسعى يا عبد وأنا أسعى معاك.

ومن ترك شيئاً لله عوضه الله خيرا منه.

{وَالَّذِينَ جَاهَدُوا فِينَا لَنَهْدِيَنَّهُمْ سُبُلَنَا وَإِنَّ اللَّهَ لَمَعَ الْمُحْسِنِينَ} (69) سورة العنكبوت

أي مجاهدة النفس على هذا الأمر.
والنقاب ده فريضه مينفعش حتى الجدال فيه.
وكان الإنسان أكثر شئاً جدلاً.

عَسَى أَن تَكْرَهُواْ شَيْئاً وَهُوَ خَيْرٌ لَّكُمْ وَعَسَى أَن تُحِبُّواْ شَيْئاً وَهُوَ شَرٌّ لَّكُمْ وَاللّهُ يَعْلَمُ وَأَنتُمْ لاَ تَعْلَمُونَ{216}سورة البقرة

وحكاية بقى إن فى منتقبات تصرفاتهم ضد نقابهم. فلكل قاعدة شواذ.
وربنا يهدينا ويهدى جميع المسلمين.
وأحب أنتقض حضرتك فى جملتين.
أولهما:إنك قولت إن فى نوع بيلبس النقاب لأنه عُرف فى العيلة.
وده خطأ تماماً مفيش حد بيلبس النقاب للسبب ده بس لأن لازم يكون مصاحب القرار إقتناع ,وتعود, وتدين.يعنى أقول مثلاً(أنا أتحجبت من 4 إبتدائى لأنى كنت دايماً بشوف ماما بتصلى ولابسه عباية سودة وصور ليها وهى صغيرة كده, ومكنتش بحب حد يبصلى فالحجاب لقيته أنفع حل لكده وكنت دايما بسمع آراء إعجاب بيا لتدينى من زمان جدا وحبب ناس فيا كتير, ده طبعا على عكس إن عيلتنا مش محافظه بالحجاب لأن عماتى كلهم لبسوه بعد الزواج والأطفال وفى ملبسهوش من أولاد عم بابا , لكن الحمد لله دلوقتى فى نقاب سائد فى العيلة)
وأى حد عايش فى المدينة صعب يكون متدين غصب عنه.
وتانى جملة:إن حضرتك قولت مش ضد أو مع النقاب:ودى جملة صعبة جدااا مكانش ينفع تتقال خالص لأن ده أمر من ربنا ومش لينا الحق نقول كده وأكيد قولته من غير قصد.

وبجد أسفه إنى طولت عليكم
وشكراااا جدا ااا على الموضوع

وَاللّهُ يَهْدِي مَن يَشَاءُ إِلَى صِرَاطٍ مُّسْتَقِيمٍ{213}سورة البقرة

دعاء مواجهات يقول...

رصد جميل وموضوعى

لكنة قد يثير الكثيرين

لجرأتة

لأننا لم نعتد لاحوار فى المسلمات اوع الاقل الاشياء التى ترتبط من قريب او بعيد بالدين والتدين

تحياتى ليك

البوست الجديد نزل

سلااام

Do not Press F1 يقول...

السلام عليكم
انا بعد ما قريت بعض الاسباب اللى ممكن البنت تتحجب عشانها سألت روحى هو انا اتحجبت امتى وازاى وليه؟؟
لقيت نفسى برجع لورا ايام تالتة اعدادى اول ما فكرت البس طرحة ساعتها مش عارفة هل كان السبب دينى ولا ايه ساعتها كنت حاسة انى بقيت بنت كبيرة ولازم البس طرحة وان اغلب صحاباتى بقوا محجبات فعيب اوى انى ابقى غير محجبة وخصوصا فى المجتمع اللى انا عايشة فيه.
لكن بسأل نفسى دلوقتى هل اقدر اخرج من غير حجابى ؟؟ بصراحه مش اقدر نهائى بسبب احساس انى لو خرجت فى يوم من الايام من غير حجابى هحس انى سورى فى اللفظ عريانة واحساس ان حجابى دا شئ من هويتى الاسلامية حاجه بعتز وافتخر بيها وباتمنى انى اكون قدها .


سلاموز

زى الهوا يقول...

حجاب الموضة


مقالة جميلة

enjy يقول...

بص انا باتلكك عشان اجى اعلق عندك واسلم واشرب الشاى والقهوة واتغدى.. كنت معدية لقيتك فهمت تعليقى غلط قلت اجى اتغدى ونتكلم واحنا بناكل................الا عندكوا اكل ايه؟؟؟؟؟؟؟؟؟
المهم انا كان قصدى باللى بتبقى شايفة انها عورة يعنى النوع اللى شايف ان ضل راجل ولا ضل حيطة وانها لازم تتدارى عشان هى فيها حاجة غلط وكدة يعنى..........النوع التانى بتلبس نقاب عشان تلاقى واحد يعرف ربنا و متدين و ابن حلال عشان يتجوزها ويسترها.......... هو فين الغدا ؟؟؟؟

Amgad يقول...

قلب ينبض لله

والله مش فاهم انتي تقصدي انهي فيهم قريت تعليقك اكتر من مرة عشان احاول استدل تقصدي انهي فيهم معرفتش
وان كان رايي اننا نغير من جوا اول بس النية تبقي موجوده مش نستني لما ربنا يفرجها لان الله لا يغير ما بقوم حتي يغيرو ما بانفسهم
خالص تحياتي


المبرمج المحترف

كلامك بيتفق بشكل كبير اوي مع حالات من اللي رصدتها
وموضوع الطرحة ده هتلاقيها لابساه ومش مقتنعة بيه
اخالص تقديري وانت اللي مدونتك هايلة

Amgad يقول...

ستاتيك ديزاينر محمود عوف

او sd_m_O
الله يبارك فيك يا صاحبي ومبروك ليك انت طبعا
انا مش براقبة طول الوقت ولكن هو والناس اللي قاعدين معاه دول بشوفهم كتير في حاجات لا تدل علي ان ايا منهم متدين او عايز يلبس مراته نقاب عن تدين وانما زي مقولتلك ..قد تخطيء نظرتي واتمناها كذلك مستقبلا ولكنها في الوقت الحاضر صحيحة بشكل كبير
اختلف معاك في ملاحظتك التانية
لان الخيار الموجود ان نغير من انفسنا داخليا حتي نتغير خارجيا لا ان ننتظر ان نتغير وتذكر ان الله لا يغير ما بقوم حتي يغيروا ما بانفسهم
بمعني اننا لو تغيرنا داخليا عن اقتناع سينعكس ذلك علينا خارجيا
اما لو تغيرنا خارجيا دون ان نتغير داخليا فسيكون زي عدمه
اما وجهة نظرك اننا ان فكرنا في التغير خارجيا حتي نتغير داخليا فتختلف من شخص لاخر قد تكون ايجابيه معك نظرا لفطرتك الطيبة وسريرتك الاصيلة
ولكني لا ارجح تعميمها
اما ردود بعض الفتيات فهي بالطبع خاطئة ومعرفش البس النقاب الا لما ابقي اده دي واحده عايزه تروش شوية وتلتزم شوية باختصار مش عايزة تبقي منقبة دايما بالرغم من انها قد تكون مقتنعة به كاقتناع اغلب الشباب بالصلاة ولكن مش عايز يلتزم الا لما يبطل مخدرات وبنات وخروجات وقهاوي ويمكن سجاير عشان كده عمره مهيصلي
اشكرك بشده علي مرورك وانتظرك دايما

Amgad يقول...

منار

ميرسي
حاسبي يا منار اسعي يا عبد وانا اسعي ثمعاك دي مش قران ولا حديث قدسي علي حد علمي فلا تنسبيها الي الله
الحجاب هو اللي فريضة مش النقاب
وقد اختلف الجمهور في تفسير الاية الدالة عليه في القران يعني مفيش اتفاق ان النقاب فريضة وان كنتي تقدري تقنعيني اتمني نتناقش مش نتجادل
اما موضوع انو عرف في العيلة فانا اعرف عائلات كده فعلا وحتي لو مكنش فيه اقتناع هتلبسو يعني هتلبسو
(وأى حد عايش فى المدينة صعب يكون متدين غصب عنه.)
مفيش حاجة اسمها متدين غصب عنه قد يدعي التدين ولكنه لا يكون متدين
انا اني مش مع او ضد النقاب فانا بكررها تاني مش معني انك مقتنعة بيه يبقي لازم اقتنع لان الشيوخ نفسهم في مختلف العصور لم يصلو الي التاكد من فرضيته
طولي براحتك انا متقبل وجهات النظر لاقصي درجة ومبسوط برايك جدا

Amgad يقول...

دعاء مواجهات

ميرسي ليكي
هو مش جريء اوي يعني لاني لم اعد احب عرض وجهات نظري الجريئة في الدين لاني بطلع مخطيء اوقات كتيرة وبخاف البعض يقتنع بارائي اللي ببقي غيرتها عشان كده بقتنع بيه داخليا اما بالنسبة للموضوع فهو مجرد رصد لنوع خاطيء تطور في التعليقات الي هل التغيير الداخلي اولا ام الخارجي
كنت اتمني سماع رأيك
سلام

dont press f1
انتي كاغلب المسلمات سبق حجاب الفطرة حجاب الاقتناع اي انك تحجبتي بفطرتك قبل اقتناعك الي ان وصلتي للسن الي تقدري تحكمي فيه لقيتي الصح هو مافعلتيه بفطرتك ولو لم تتحجبي فطريا لكنتي تحجبتي عن اقتناع فصار حجاب الفطرة اقتناعا عشان كده عمرك مهتقلعيه لانه بقي شيء من شخصيتك بعد مبقي شيء من هويتك الاسلامية
اعزك الله وجعلك فخرا للاسلام
مبسوط لمرورك وخليكي كده علي طول
سلاموووز


زي الهوا
تعليق مختصر لشخص مقراش اي حاجة في المقالة وبص بس علي الصور
ميرسي برده

Amgad يقول...

اووووجي
انا اللي بتهبل لما بشوف تعليقك يا قمر
انا مفهمتكيش غلط ولا حاجه
بس بحاول اعمل تقارب في وجهات النظر
وعموما يا باشا انت اللي صح برده
الغدا كوارع وفشة وطحال وكرشة وممبار ولحة راس
ايه تدوسي ولا نكنسل

mostafa rayan يقول...

امجد باشا
طبعا انا معاك في رأيك دة عارف كل واحدة مالبستش الحجاب عن اقتناع مع اول فرصة انها تخاعه هتخلعه
غير كمان ان الحجاب اللي ماشي دلوقتي لا يمت للحجاب الشرعي بأي صلة
ربنا يستر علينا يا امجد

- انت قرأت مقالة عمر طاهر فين ؟
تحياتي ليك

mostafa rayan يقول...

امجد باشا
طبعا انا معاك في رأيك دة عارف كل واحدة مالبستش النقاب عن اقتناع مع اول فرصة انها تخلعه هتخلعه
غير كمان ان الحجاب اللي ماشي دلوقتي لا يمت للحجاب الشرعي بأي صلة
ربنا يستر علينا يا امجد

- انت قرأت مقالة عمر طاهر فين ؟
تحياتي ليك

01 أغسطس, 2008

Amgad يقول...

صاصا ريان
منور يا برنس الليالي
وانا ليا الشرف ياباشا انك معايا في رايي
واستمر بقي
قريت المقال في الدستور
بس هو طبعا مش كده خالص
انا اخدت منه العناوين بس
خالص تحياتي

قررت أكون عانس يقول...

احيانا خجل البنت الزيادة و عدم قدرتها على التعامل مع الرجالة بيخليها تلبسه كحاجز هى بتستخبى وراه و الحالة دى حصلت قدامى

و قصص الحجاب و النقاب دى كتييرة ما بتخلصش

Amgad يقول...

قررت ان اكون عانس
حمد الله علي السلامة
معاكي حق الانواع كتير والاسباب متعدده ولكن انا رصدت اللي شفته
خالص تقديري

blue-wave يقول...

والله معاك حق
بس عارف ليه؟؟؟
لأننا اهتمينا بالمظهر
وتركنا الجوهر
يلا ربنا يلطف بينا
تحياتى

Amgad يقول...

بلوو ويف
جميل اوي انك ضميت صوتك لصوت التغير من الداخل اولا
انا بقول ان الجوهر اهم من المظهر
ولكن المظهر ايضا مهم
خالص نحياتي

maryooom يقول...

موضوع شيق وعاوز رد بالساعات اولا عاوزة اقولك حاجه ده زمن العجايب فامش حاجه غريبة ثانيا انا ليا واحده صحبتي مخطوبة خطيبها عاوز ينقبها وهيا رفضت المهم قالها انتي كده مش بتطيعيني فانا طبعا سوسه قلتلها الطاعه لله مش للزوج انتي كده بتلبسيه عشان ترضيه هو مش ترضي ربنا وبدال ماتلبسيه وتقلعيه تاني زي ما ناس كتير بتعمل كده
ربنا يهدي تحياتي

safaa يقول...

هو الحجاب اصلا مشكله فى حد ذاته ومعظم البنات لابسينه زى غصب او خايفين من الانتقاد او لانه بقى سلوك شعبى وحتى هو مش حجاب لأنه اصلا مش بيحجب شئ وحتى المحجبه حجاب شرعى ومداريه نفسها وراة بتتعرض برضه لأسؤ انواع التحرش
يعنى الغباء بقى من ناحيه
تحياتى

almasry يقول...

والله الناس زفتتها أكتر ما هى متزفته رايحين يدوروا على حاجات فرعيه وسيبين االأصليات


تقبل مرورى


تحيـــــــاتى
المصــــــــرى

GiGi يقول...

ازاى تكتب بلغه الفرنجه
بجد حسيت انه مقال لعالم فلسفى رائع
وحقيقى كلامك صح جدا
تحياتي ومدونه جميييييله

Amgad يقول...

maryoom
معاكي ومع جورج وسوف حق ده فعلا زمن العجايب
علي فكرة طاعة الزوج من طاعة الله
ولكن حسب اعتقادي مش في حاجه زي دي هي
اساسا مش مقتنعة يبقي بتعمل حاجه ارضاءا للزوج مش ارضاء لله وانا شايف الموضوع ده خطر وممكن يبقي ليه اثار عكسية
وانا نفسي بتعرض لمواقف زي كده
يعني مثلا لما بروح اصلي علي جنازة
بلاقي الناس كلها بتصلي السنة بتاعة الفرض اللي فيه الجنازة رغم ان بعضها مبيصليش السنن زي حالاتي والبعض الاخر لا يصلي اطلاقا هو بس داخل الجامع عشان الجنازة وتلاقيه بيصلي السنن وهو ميعرفش السنة كام ركعة بس بيعمل زي مالناس بتعمل انا شايف في حالة زي دي ارضاء للناس مش ارضاء لله عشان كده انا بصلي الفرض ولا اصلي السنن ارضاءا لللناس انا طبعا مش فخور بحاجة زي دي ولكن ادعو الله ان ياتي اليوم اللي تكون السنن اصيلة في حياتي مثل صلاة الفروض ولكني لا افعل شيئا ارضاءا للناس لان الله لا يقبل الا ماكان خالصا لوجهه
خالص تقديري لرايك

Amgad يقول...

safaa
اختلف معاكي بشكل كبير الحجاب مش مشكلة ولا حاجة
كما اختلف معاكي ان مش معظم البنات لابسينة غصب او خايفين من حاجه
مع الاعتراف ان بعضهن كذلك
اما من ناحية ان اللي لابسه حجاب شرعي بتتعرض لاسوأ انواع التحرش فاحنا كده خرجنا خارج اطار الموضوع ودخلنا في مشكلة مجتمع ولكن كاشاب عارف ايه اللي بيحصل
المنقبة ممكن تتعاكس مش بس المحجبة ولكن ليس كمثل المتبرجات
يعني برضة الشاب اللي بيعاكس بيبقي ليه نظرة رغم انه لا يستثني احدا
يعني بتختلف في الكيف
تحياتي

Amgad يقول...

almasry
مش قادر استشف انت تقصد ايه
كنت اتمني توضح اكتر
عذرا

Amgad يقول...

gigi
ربنا يكرم اصلك
تحياتي انا وخالص تقديري واحترامي

Amgad يقول...

safaa
من الحق يا صفاء راجعي التعليقات اللي فاتت للبنات خصوصا ول دونت بريس اف وان تحديدا وراجعي ردي عليها وانتي تقتنعي بكلامي

سارة بندارى يقول...

مدونة رائعة جدا ما شاء الله

والبوست أكثر من رائع

بس انت كده سبت زاوية من الموضوع


انت رصدت اللى لابسين الحجاب موضة أو غصب أو ... أو ...

طيب فين اللى لابسينه بجد حجاب شرعى سليم طاعة لرب العالمين

فين اللى لابسين الحجاب زى العفاف بجد

فين اللى لابسينه عن اقتناع وطاعة وامتثال لأوامر الله وطاعة لرسول الله

أكيد اللى حضرتك اتكلمت عنهم كتير

بس أعتقد ان الجزء الأكبر عارفين يعنى ايه حجاب بجد

مش بافرض وجهه نظرى

مجرد تعبير عن رايي

بس المدونة جميلة بجد

دى زيارتى الأولى وأكيد مش الأخيرة

تقبلوا مرورى

تحياتى

Amgad يقول...

سارة بنداري
وجهة نظرك بتتقف معايا بشكل كبير اوي
وانا رصدتها بس انتي الظاهر انك مقريتيش المقال كويس
هتلاقيني بروزت اللي لبستو عن اقتناع سواء في الحجاب او النقاب وايدتهم كمان
مبسوط اوي من زيارتك واتمني تكرارها
خالص تقديري

بنت سيناء يقول...

اخى ف الله..القيت الضوء على قضية هامة تختلط فيها الحابل بالنابل؛؛لكنى وللاسف لاحظت تركيزك على اسباب ارتداء النقاب على اسس غير دينية اكثر من ارتداء المراة للنقاب على اساس دينى...لا ادرى لماذا الجميع تقف على كل تصرف للمنتقبات وكانهم ملائكة لايجوز لهم ان يصيبو ويخطئو؟؟اليسو بشر؟؟؟انا معك فى ان منهم من يرتدون النقاب الفاتن برسم العيون وارتداء العبائات الضيقة ولكن فى المقابل الكثير الكثير من هم ملتزم به كليا وجزئى..اما الاخت دينا..التى تقول لم اقابل حتى الان منهم الحسن الاخلاق فأقول لها...انتى حقا كما ذكر لكى صاحب المدونة معرفتك قليلة او انكى ستقابلين الصالح والطالح ..انتى فى بداية الطريق وحتما ستجدى منهم من ستأخذينهم قدوة لكى..اعدك بذلك..ولا اعتقد ان هناك من يرتدية كنوع من الربيستيج نهائى كما ذكرت؛؛فالنقاب ليس بة بيستيج لانه ليس من لباس البهرجة بل انة قد يلغى من هويت من ترتدية..اقصد الهوية الخارجية..فهى كالدرة المصونة مغطاة..لا احد يعلم تفاصيلها إلا من سمح له فى حدود الشرع..إذن اين البريستيج اخى؟؟تحياتى لك والى الامام

sa3at يقول...

السلام عليكم ورحمة الله وبركاته.... .

أخي الكريم أمجد.... .

أتفق معك في الرأي ويجب على الإنسان ميخودش بالظاهر...مش كل من حفظ القرآن عمل بيه ومش كل من انتقبت عملت بيه..ومش كل من اطلق لحيته بقى شيخ...... .

وبجد أحييك على جرأتك في سرد مواضيع جامدة أوى زي دي...وأحييك أكتر على جرأتك في سرد الحقيقة من وجهة نظرك ومن وجهة نظر المجتمع..... .

تقبل احترامي وتقديري وانحنائي أمام مجهوداتك العظيمة..... .

أختك أفنان محمد المغربي..... .

dodda يقول...

!!!
بايجاز شديد
اسأل الله ان يجعل اعمالى واعمال المسلمين خالصه اوجهه الكريم
اللهم خلص اعمالنا من الرياااااء
امين

شـمو نشـادر يقول...

كلام عمر طاهر رائع كعادته ..

و كاريكاتير شريف عرفه اللى هو تالت واحد انت حاطه عبقرى ..

بوست جميل يا هندزه و مهم ..

تحياتى ليك ..

أسامة أمين

منار يقول...

السلام عليكم ورحمة الله وبركاته

شوف يا أستاذ أمجد

أنا قولت سبحانة تعالى يقول "أسعى يا عبد وأنا أسعى معاك"

والله ماكنش قصدى أنه قرآن أو حاجة أنا كان قصدى أنى مقولش أسعى يا عبد وأنا أسعى معاك تتفهم الإنتساب ليا .

وأنا آسفة بجد أنا بكتب كل اللى فى دماغى بسرعه من غير ماأخد بالى .

المهم يعنى:

مش هعلق غير على إن حضرتك بتقول إن *الحجاب فريضه مش النقاب.*

فأسألك بالله تدبٌر معنى الحجاب.

وشكراااااااااااااااا جداااا لتفهمك.

Amgad يقول...

بنت سيناء
اختي في الله انا لم اركز علي شيء معين ولكن لما اكون برصد الاوضاع اللي موجوده مش معني كده ان السيء فيها اكتر من الكتير فيها كاشخاص ولكن الحالات لابد انها تكون كثرت بمعني ان ممكن يكون في الامة دي ملحدين وكفار واديان اخري وعبدة بقر وحاجات تانية كتير وفي مسلمين
شوفي انا قولت فيه مسلمين في كلمة واحده رغم انهم اغلبيه معني كده اني مركزتش علي الانواع الاخري انا بزكر كل نوع ولم ازكر نسب كل نوع او انهم متساوون في النسب
بالنسبة للبرستيج فانا لم اقصد البرستيج بمعناه المرئي ولكن بمعناه الفكري
يعني زي متقولي كده احقية الكلام في الدين وفي تعليق دينا انهم بيحسو انهم احسن من الكل ووصلوا لمرحلة من الدين انهم يفتوا فيها
انا طبعا ضد بيحسوا دي والمفروض يحس بعضهم لان مش كلهم اكيد
بس معني كده ان في حد متفق معايا في احدي الحالات
تقبلي خالص تحياتي وتقديري

Amgad يقول...

افنان المغربي او ساعات
اذن انتي متفقة مع ان التغيير الجوهري اهم من الحسي
وجميل انك متفقة معايا في عدم التعميم
ولكن من الخطأ ان نتخذ العكس كقاعده ايضا
وعلينا افتراض سوء النية الي ان يثبت العكس
خالص ميرسيهاتي

Amgad يقول...

dodda
اللهم امين

Amgad يقول...

شمو نشادر

تحياتي لك ايضا

Amgad يقول...

منار
قد نختلف
متفهم انك متقصديش انو قران او حديث ولكن عارف انك قصدك ان ربنا بيدعونا الي التوكل وعدم التواكل
اكرر ثانيا قد نختلف واتمني تقنعيني
هو انتي منقبة مش كده؟
لو كده يبقي اتمني نتحاور

Amgad يقول...

افنان المغربي او ساعات
اذن انتي متفقة مع ان التغيير الجوهري اهم من الحسي
وجميل انك متفقة معايا في عدم التعميم
ولكن من الخطأ ان نتخذ العكس كقاعده ايضا
وعلينا افتراض حسن النية الي ان يثبت العكس
خالص ميرسيهاتي

منار يقول...

السلام عليكم ورحمة الله وبركاته

أولاً أنا سعيدة جدااا إن حضرتك فهمتنى من غير مأشرح كتير اللى أقصده .

وعلى فكرة أنا مش منقبة ولا حاجة, بس حبيت أدافع عن شئ مقتنعة بيه.

وسبب إقتناعى إنى قرأت كتيب أسمه النقاب ,, وفيه حاجات كتير تقنع إن النقاب هو المقصود بيه الحجاب اللى هو فريضة وهحاول أشرح لحضرتك محتوى الكتاب بإختصار لأنه فى مصر للاسف مش معايا.

أولاً هو بيحكى عن سبب كتابة الشيخ ده للكتيب,,أنه كان مسافر وركبت إمرأتان فسألوه عن الحجاب الشرعى,فقال لهم إن إحنا لو رجعنا بالزمن لأيام ثورة 1919 حتى فى الأفلام كانت المرأة مرتدية النقاب .

وإن كمان أيام الرسول "عليه أفضل الصلاة والسلام"كانت نساؤه وبناته والصحابيات لابسينه.ودليل فريضة النقاب,
قول الله عز وجل: وَإِذَا سَأَلْتُمُوهُنَّ مَتَاعاً فَاسْئَلُوهُنَّ مِن وَرَاء حِجَابٍ ذالِكُمْ أَطْهَرُ لِقُلُوبِكُمْ وَقُلُوبِهِنَّ [الأحزاب:53].

فهذه الآية نص واضح في وجوب تحجب النساء عن الرجال وتسترهن منهم، والحجاب هنا أعم وأشمل من غطاء الوجه والكفين،وفى رواية للسيدة عائشة "رضى الله عنها" بما معناه أن النساء كانوا يخرجون ولا يرى منهم شيئاً.

أتمنى أكون وصلتلك رسالتى.

غير معرف يقول...

الاخ سعيد المحترم. أريدك أن تبقي مدونا متميزا كما كنت، ولاتضع نفسك في مأزق قد لاينفعك في شيء، ما الفائدة إذن من وراء كل هذا العذاب الذي سببته لنفسك، هل هي مبادرة اتحاد المدونين المغاربة، وبأي صفة قمت بهذا العمل الجليل، إنه الفضول المتناهي، والغباء المغربي الذي لاحدود له. .هذا العالم الافتراضي وسكانه المتغيرين كل لحظة، والذين يتخذون من التدوين مجالا للتسلية، لايمكن لاحد ضبطهم، فهناك مجموعة من المدونات التي اخترتها انشغل أصحابها في مهام أنستهم هم التدوين ورفاقه. ورغم ذالك أجتزت لهم امتحانك ونجحوا بتفوق. .لاتكن مغرورا أخي سعيد، واعلم أنك لن تكون أكثر من نقطة في بحر هائج، لاتسمع فيه سوي صوت نفسك، أما الباقون فهم مجرد أسماء عابرة لاوجود لهم في هذا العالم الافتراضي الواسع. .شكرا أخي سعيد وكل عام ومدونانك الناجحة التي اخترتها بعض ضياع وقتك في تزايد.