الجمعة، 15 أغسطس 2008

ممبار بطعم الحمار ........................محدش فاهم حاجة


العنوان محير شوية بس الحكاية ايه بقي
الحكاية ان في 7300 حمار اندبحوا عشان جلودهم تتصدر والحكومة مش عارفة بقيت الحمير بعد خلع الجلود راحت فين
الاجابة بسيطة اوي هي يعني لازم الحمير تندبح عشان ناخد منها الجلود
دي الحكومة الطيبة بتاعتنا عملت زي بوحة كده ماعمل في الخروف سلخ قبل مايدبح
الحكومة سلخت الحمار واخدت الجلد وسابته يعيش في تبات ونبات بلاش نظلم الناس من غير دليل
جاء في الاستجواب ان النائب اعتبر انه "من الطبيعى تفهم طبيعة الشعب الصيني، الذي يأكل لحوم الحمير والقطط والكلاب، كما من الطبيعي تفهم ان الصين تنظم حاليا دورة الالعاب الأولمبية، وقد تكون في حاجة ماسة لهذه اللحوم، كما قد تكون فى حاجة ايضا الى جلودها من أجل التصنيع، أما ما لا يمكن فهمه، فهو أن تستورد الصين هذا الكم الهائل من جلود الحمير دون لحومها"، متسائلا "أين ذهبت هذه اللحوم؟".
طبعا الجواب المنطقي انها في بطن سعادتك وسعادتي
اتخيل حوارا يدور بيني وبين احد المسئولين واساله
احنا من امتي بندبح الحمير وما فائدة جلودها وماذا سيحدث لو خلصت الحمير من البلد ؟
يقولي
احنا في زمن دلوقتي تتوقع فيه اي حاجه حتي لو ملهاش لازمة
اما بخصوص نفاذ الحمير فاطمن الحمير في مصر مفيش اكتر منها
التساؤل دلوقتي هل جلد الحمار بيغطي تمنة عشان يندبح بسبب كده
وهل الصين اللي اتصدرت ليها الجلود دي محتاجه جلد الحمار اللي جاي من مصر
هل الصين معندهاش جلود صناعية افضل من جلد الحمار الرديء وهل لو جلد الحمار ده مهم اوي
متقدرش الصين تعمل مزارع حمير عندها
نستنتج من ده كله ان الحمير دي اندبحت عشان تتصدر في بطونا انا وانت
طبعا انا مش عامل البوست ده عشان انقد الحكومة حاشا لله
ولكن عشان انصح كل مواطن يلحق يربيله حمارين تلاته اهو رمضان داخل
والعيد الكبير قرب وهتبقي فيه ازمة في اللحمة
دا حتي لحمة الحمير بيقولو بتبقي حمرة ومفيهاش دهون وطعمها مسكر شويتين
ولو عايز تعرف انت اكلت لحمة حمير ولا لأ سهلة اوي
اخطف رجلك واعمل زيارة لاي مكان فيه حمير وبص هتلاقي في شوق جامد اوي بينك وبين الحمار وهتلاقيه صعبان عليك ونفسك تحضنة وتقطعة من البوس اذن انتوا اصبحتو فصيلة واحده وانت سبق ليك واكلت حمير
علي فكرة المشكلة مش في لحم الحمير خالص ده صحي وطعمو لذيذ وانا واكل دلوقتي لواحدي ييجي نص حمار
المشكلة دلوقتي ان معدش في ثقة بين الشعب والحمير
يعني الفلاحين بيشتكو دلوقتي بيقولو ان حميرهم معدتش بتثق فيهم كل لما واحد يقرب من الحمار الحمار يجري
اتاريه يا ولدااااه مش حاسس بامان وخايف لصاحبة ياكله
انتو متصورين حجم الماساة اللي اصبحنا فيها
لما الحمار يقولك انا حمار منفعش غير اني اضرب وامشي واجر عربية كارو
فبلاش تاكلني اتوسل اليك
لما الحمار بفتخر انو حمار ويطلب ابسط حقوقة في البلد دي وهي انو يتعامل كحمار
يعني ميندبحش
في النهاية احب اقول لو عايزين تاكلونا حمير ولا يهمنا دا الشعب المصري يهضم الظلط
وعلي فكرة انك تنهق بعد ماتاكل لحم حمير او تحس برفس في قفاك كل دي اشاعات مغرضة
الهدف منها هز السلام الاجتماعي وزعزعة الاستقرار والنيل من الحكومة
لو عايزين تاكلونا حمير ممكن تعلنو كده وتسعروا لحم الحمير
وانا اضمنلكو ان اللحوم دي هتتباع هو الشعب لاقي يا كل لحمة
حمير حمير بس ندوقها ده في ناس متعرفش اساسا يعني ايه لحمة
بس المهم ان الواحد ياكل حمير بمزاجة لانه لما ياكل حمار غصب عنه
وقتها بس ممكن يحس انو عايز ينهق
واتذكر حديثا لجدتي
كانت بتحكيلي بتقولي ان كان في مطعم لحوم قريب منها
تفاجئت بانو تم تشميعة بالشمع الاحمر
وسبب ذلك ان المحل ده كان بيبيع لحم قطط
وقتها بس تذكر الناس الكلمة غير المفهومة التي كان يقولها
الندبجي اللي هو الويتر يعني
-لحم البسة طازة لسه-
مكنش في حد فاهم هو بيقول ايه
واديهم بيسيبوله فارغة وبيقولو ناخده علي قد عقله
اتاريه هو اللي قرطسهم كلهم
وان كنت التمس له العذر فقد نقح عليه ضميرة
ونتيجة لذلك وجد مايبرر له فعلته
وهي تلك المقولة
المهم انو عرف الناس هما بياكلو ايه
معني ان مفيش حد سالو يعني ايه لحم البسة طازة لسه
او محدش طلب منه تفسير لما يقوله فدي مش مشكلتة
دي مشكلة الشعب اللي رايح ياكل وبس
كنت اتمني الحكومة تعمل كده
وتعلق يافطات تقول ممبار بطعم الحمار
واغلب ظني ان محدش كان هيطلب تفسير لسبب بسيط اوي هو ان

محدش فاهم حاجه

هناك 59 تعليقًا:

sa3at يقول...

السلام عليكم ورحمة الله وبركاته.... .

يشرفني ابقى اول واحدة تعلق عالموضوع المعالج لقضية من قضايا حكومتنا .... .

أولا وبعد كل الكلام ده الواحد بقى شاكك ياترى هو اكل كام حمار؟؟؟.... .

تانيا أحب أقول ان احنا في زمن

راحت عليك يا ضمير وبقى زمن الحمير... .

بجد مش عارفة اقول غير لا حول ولا قوة الا بالله و حسبي الله ونعم الوكيل في كل من خالف ضميره واستغل الشعب تحت مسمى السلطة..... .

تقبل احترامي وتقديري..... .

أختك أفنان محمد المغربي...... .

بث تجريبي يقول...

السلام عليكم
يا عينى عليك يا حمار لما المصرى بياكلك ويقول كافيار.
يا عينى عليكى يا بسة لما المصرى ياكلك ويقول وزة.
يا عينى عليكوا يا كلاب لما المصرى ياكلكوا ويقول كباب.


.ويا عينى يا عينى ومليون يا عينى عليك يا مصرى لما بتاكل وراضى
وليك فى الهم فدادين واراضى .

كدا انا لسه مش خلصت الكومنت هرجع تانى بعد شوية وهدى الكومنت بتاعى بس الكلام دا هو اللى جاى فى نافوخى

سلاموز .

Abu Shahin يقول...

امجد

قريت شعرك قبل كده وعجبنى جدا

لكن النهارده بتفاجانى بحقايق مهمة

انى انا مثلا حتما واكيد اكون اكل نص حمار فعلا وانا مش عارف

عارف ايه المشكلة فعلا زى مانت قولت بالظبط

ان انا مش عارف

عارف لو الناس قالت انها لحم حمير هايكون الواحد على الاقل مستعد نفسيا

ياللا لنا الله يا امجد

Unknown يقول...

السلام عليكم ورحمة الله وبركاته
(لما الحمار بفتخر انو حمار ويطلب ابسط حقوقة في البلد دي وهي انو يتعامل كحمار.......!!!.....يعنى ما يندبحش!!!
يعني ميندبحش!!!!!!!يعنى ما يندبحش!!!
اد كده بلدنا ساء حال القائمين عليها لدرجة أن الحمار فقط يريد الايندبح !!
اقولك ايه:اهى عيشة والسلام!!!!!
(بوست يوجع القلب زى حال بلدنا كلها)
لو بصيت لها بعين متفحصة
وعلشان كده خدها نصيحة منى
طنش طناش تطنيش
لاجل ما تعيش
واهى عيشة
والسلام

PrInCeSS BeRy يقول...

استغفر الله العظيم

ههههههههههههه لية بس كدة مش كفاية التلفزيون انا مبقتش باكل لحمة ولا فراخ اكل اية ناجتس بخاف منها كمان حسبنا الله ونعم الوكيل تحياتى لك

Unknown يقول...

مممممممم ..

انا مش قادره بصراحه .. إيه ده ؟؟

ليه كده بس ؟

:(

أقولك علي جمله بحب أقولها دايما ؟؟

حسبي الله و نعم الوكيل

ياسمين

Walaa Elshamloul يقول...

احييك على اسلوبك الساخر الجميل
ارجو ان تستمر فى الكتابة واضح انك موهوب جدا
تمنياتي لك بالتوفيق الدائم

MY FATE يقول...

ربنا يخلي الحكومة لينا وتسرقنا وتاكلنا لحمة حمير كمان وكمان
شكرا لحضرتك
سلام

شفـقــة و إحســــان يقول...

البوست تحفة انت تنفع محرر صحفى مش مهندس
بس البوست وجع بطنى
شفقة

حاجات جوايا يقول...
أزال أحد مشرفي المدونة هذا التعليق.
موناليزا يقول...

لاحول ولاقوة الا بالله

ميرام يقول...

السلام عليكم ورحمة الله وبركاته
بجد أنا قاعدة ببتسم بشدة ..
مع ان الموضوع مؤسف ..
طبعا بغض النظر عن طريقة سردك الساخرة الرائعه ..
بس امبارح كنت بتفرج على برنامج افتاء (:
وواحد اتصل يسأل سؤال ,,,(:
أكل لحم الحمير حلال ولا حرام ؟
المهم أنا ذهلت من السؤال ..
بس اتصدمت أكتر من الجواب ..(:
لأنه قاله ان الحمير العادية (: اللي هي حميرنا طبعا أكلها حراااام .. لكن الي مش حرام اكل الحمار الوحشي
ياقلبي لاتحزن (:
المهم الشيخ كان سعودي .. فبعد ما خلص كلامه ..
قاله (الله يعينكم ) شكله كان عنده خبر (:

بجد مهزلة
بس تعرف قد ايه المصائب اللي بتحصلنا بتخلينا نضحك عليها ونبتسم ..
ويقولولك الشعب المصري شعب النكته
أخيرا عرفت ليه (:
سعيدة بمدونتك الجميلة ..
بانتظار جديدك
كل التقدير..
تحيـــــــــاتي

واحد من البلد دى يقول...

السلام عليكم

الغريبة يا آخى إن كيلو اللحمة غالى برضه..

المفروض إن الحمير تعمل إضراب عن الذبح..

طبعا ..هما البنى آدمين بس اللى بيعملوا إضراب..

ويمكن يكون إضراب الحمير أنجح من البنى آدمين كمان..

حسبى الله و نعم الوكيل

Amgad يقول...

ساعات ....افنان
ال الموضوع المعالج لقضايا حكومتنا
حكومة ايه بس دي اللي بتتعالج
راحت عليك يا ضمير وبقي زمن الحمير
لو كنتي قولتيلي كده قبل معمل البوست كنت حطيته عنوان
متقبل احترامك وتقديرك يا ستي
ومبسوط لمرورك علي مدونتي المتواضعة

Amgad يقول...

دونت بريس اف وان
ايه الارتجال الجامد ده بس
وتقولي ملكيش في الشعر دانتي مصيبة
.ويا عينى يا عينى ومليون يا عينى عليك يا مصرى لما بتاكل وراضى
وليك فى الهم فدادين واراضى
منتظرين رجوعك التاني ولازلنا في النتظاره

Amgad يقول...

ابو شاهين
انا اكلت النص التاني
حتي بالامارة النص بتاعك كان يمين
اصلي بحس برفس في الناحية الشمال
وجميل انك متفق معايا ان الموضوع لو كان بمزاجنا كنا تقبلنا
يشرفني مرورك واتمني المداومة

Amgad يقول...

نورهاتي
يعني ميندبحش يعني ميندبحش يعني ميندبحش
فكرتيني ببرنامج مني الحسيني ناسف للازعاج
الاسكرين شوت اللي بتقوم واخداها مرة واحده دي والشاشة تقوم مسوده فيها
اد كده بلدنا ساء حال القائمين عليها لدرجة أن الحمار فقط يريد الايندبح
حاسس ان البوست اثر فيكي فعلا
منتظرين الحل بقي يا دوك
لالام الرفس اللي بتيجي للواحد
خالص تقديري

Amgad يقول...

برينسيس بيري
خليكي نباتية
لا تاكلي لحمة ولا فراخ ولا ارانب ولا حمام
ولا اي حاجه خالص
الحكومة عايزة تنزلنا رسالة
دلوقتي اننا معدناش ناكل لحمة
والحل لكل مواطن انو ياكل في نفسة

Amgad يقول...

ياسمين
حسبنا الله ونعم الوكيل
بس مقولتيليش شعورك ايه لما بتشوفي الحمار

Amgad يقول...

ولاء الشملول
احنا مش قد الكلام الكبير ده بس
لا موهوب ولا حاجه كله بتاع ربنا
وبالنسبة لاستمراري ادينا موجودين اهه
هنروح فين بس
ميرسي لمرورك

Amgad يقول...

my fate
يخليهالك انتي ياختي
انا عن نفسي مش عايزه يخليهالي
العفو لحضرتك علي الشكرا لحضرتي
ايه حكاية حضرتك دي
ميرسي لمرورك واستمري بقي

Amgad يقول...

شفقة هانم واحسان بك
ميرسي بجد ليكي
انا لا انفع محرر ولا انفع مهندس
ولا عدت انفع اي حاجه
بقولك واكل نص حمااااااااااااار
ميرسي لمرورك وتقبلي خالص احترامي

Amgad يقول...

موناليزا
لخصتي الحكاية بس اتمني تكوني قريتي البوست
خالص مواساتي

Amgad يقول...

ميرام
حقا شر البلية مايضحك
انا قولت اتناوله في اطار كوميدي
عشان بطونا متوجعناش
اكن الحمار الوحشي حلال والعادي حرام
طيب اشمعن مش ده حمار والتاني بسلامته حمار
اغلب ظني ان مفيش تحريم زي الميته ولحم الخنزير وماذكر في الحديث
ولكن كنت سمعت عن موقف الرسول نهي فيه عن اكل لحم الحمير وان كنت مش متاكد تمام التاكد
ولم ابحث في حرمانيته لاننا لحد دلوقتي ماكلناش بمزاجنا بناكل غصب عننا
فالذنب مش واقع علينا
علي فكرة الحمار الوحشي اقدم الحيوانات
تعرفي ليه
لانه ابيض واسود والحيوانات التانية ملونة
باااااااااااايخة
ههههههههههههههههه
سعيد جدا لمرورك وتقبلي خالص تقديري

Amgad يقول...

واحد من البلد دي
الحمير مش هتقدر تعمل اضراب
الا لما يجدوا الحمار القائد اللي يقدر ينظم الاضراب
عشان مش كل حمار يضرب بمزاجو
يقوم ينضرب علي دماغو
هارش ولا..........

بنت الاسلام يقول...

ومحدش هيفهم

لحمة كل يوم سعرها يضرب في العالي

وحمير تاهت لحومها


وامراض مالهاش ادوية


وفساد مالوش اول من اخر

بلاش نفهم افضل

تحياتي

ريمان يقول...

السلام عليكم

ايه ده

هوة فى ايه

فعلا والله محدش فاهم حاجه

بوست جميل جدا

واسلوب جميل جدا بجد اسلوبك تحفه
استمر

مع ارق تحياتى

funckydoctor يقول...

أى
معنى كده انى هنهق عن قريب
وهنبقى دكاترة بديول ربنا يستر

mostafa rayan يقول...

كلامك دة بجد يحزن احنا بقينا رخاص للدرجة دي
ربنا يعفينا

Unknown يقول...

اساسا انتوا اللى غلطانين انتوا لو ماكنتوش شعب طفس ماكنتوش اكلتوا لحمة اساسا وبكدة ماكنتوش اتعرضتوا لانكم تاكلوا لحم حمير يبقى مين اللى غلطااااااااااااااااااااااان؟؟؟؟
عالم مفترية يا جدع...
بعيدا بقى عن الموضوع عايزة اقولك انى بجد متشكرة جدا على الدعم النفسى الرهيب اللى قدمته لى والله والله كنت محتاجة بس واحد يفهم الكلام اللى انت قلته ولذلك شكرا يا امجد يا عسل

Amgad يقول...

بنت الاسلام
ههههههههههههههههه
جبتي احد الحلول المنطقية
اللي هو بلاش نفهم احسن
ويمكن هو ده السبب اللي خلي اغل الناس
مهاش فاهمة حاجة
فساد ملوش اول من اخر
خالص تحياتي لمرورك

Amgad يقول...

ريمان
الحمد لله ان في حد مقتنع بكلامي ان
محدش فاهم حاجه
ميرسي علي مجاملتك الرقيقة
واتمني نكون عند حسن الظن بس
خالص تحياتي وتقديري

Amgad يقول...

فانكي دكتور
منا قولتلك كل دي اشاعات
اللي هو موضوع النفيق والرفس
الا لو مكنتش تعرف
اما موضوع دكاترة بديول
فمش هتفرق دكاترة ولا سماكين ولا نجارين
اهو كله بديول والسلام

Amgad يقول...

مصطفي ريان
ياسيدي اهي دنيا والسلام
مفيش داعي للحزن
اما موضوع رخاص للدرجادي
فاحب اقولك بقينا ارخص مما تتخيل
تحياتي

Amgad يقول...

انجي
قبل كل حاجه
حمدالله علي السلامة
بتعجبني اوي النظرة الحكومية بتاعتك
وان كانت بتريقة
بس بيعجبني دفاعك الساخر عنها
تعرفي يا انجي انتي ممكن لما تخلصي طب ان شاء الله لو استمريتي باسلوبك ده
ممكن ياخدوكي ترزية قوانين معاهم
هههههههههه بهزر طبعا
بخصوص الدعم اللي بتقولي عليه
انا مستعد اخلي الرغيفين بشلن
بس تقومي بالسلامة وترجعي زي الاول
عصارة تقديري وتحياتي واحتراماتي

دعاء مواجهات يقول...

بعيدا عن ان عنوان البوست مقرف اصلا

والحوار كدة يغم النفس

جاية امسى واصبح واسلم عليك

منورنا ياعم ديما

البوست الجديد نزل


بييس

البنت الشقيه يقول...

no comment
just
ييييييييييييييييييعععع

قلب ينبض لله يقول...

أقول أيه بس منهم لله

حميير يععع:(
أنا لما سمعت الخبر دا أول ماطلع ماكنتش مصدئه أن في ناس ممكن تضلل الناس وتبعلها لحم حمير

كدا الواحد فقد الثقة في اللحمة يلا بكملت يعني جت علي اللحمة
نمشيها فول وطعمية بئي هانعمل أيه:(

وظائف أون لاين يقول...

عزيزى المدون .. عزيزتى المدونة


جائتنى فكرة عمل هذه المدونة عندما وجدت أن اغلب المدونين من الشباب واغلب المدونين اما طلبة بالجامعات أو منتظرين للوظيفة بعد التخرج وحتى المدون الذى وجد وظيفة فأنه يحصل على راتب بسيط


ولأننا كمدونين نجلس على النت بالساعات


فاننى فكرت وبحثت عن وسيلة أستطيع من خلالها زيادة دخلى وتوفير المال عن طريق النت وقلت لماذا لا نستفيد نحن معاشر المدونين من النت مادياً ومالياً


ومن هنا جائت فكرة هذه المدونة


فقمت بجمع بعض البرامج وبعض المواقع التى نستطيع من خلالها أن نتحصل على المال عن طريق العمل على النت ( بزنس أون لاين ) وعلى فكرة الموضوع بسيط ومجرب قبل ذلك وسهل ولكن يحتاج للصبر والأنتشار


والتفاصيل والشرح بالصور وكل المعلومات عن المشروع موجوده بالمدونة


يا رب الفكرة تعجبكم


ويا رب تشتغلوا وبلاش كسل وبلاش نقول مفيش شغل


الشغل موجود بس أون لاين

dodda يقول...

الحمد لله
انا مش بحب اللحمه
بس بصراحه صعيان عليه الشعب المصرى مدبوح مدبوح ومدبوح

والكلام ده يفسر ظهور اغنية بحبك ياحمار ...ياأخى الدم برضه بيحن..
لنا الله

Amgad يقول...

دعاء مواجهات
يغم النفس ......................
مقرف اصلا.....................
لو انا بالنسبالك مجرد عنوان بتقريه
او شخص بتهتمي بتعليقه ومستاهلش من وقتك خمس دقايق تقري البوست فيهم
فملوش لازمة توجعي دماغك بالتعليق علي بوست معندكيش وقت تقريه او تصدعي نفسك بمدونتي المتواضعة
وانا سياستي مش بتتغير في المتابعة
عموما يا ستي صباح الفل او مساء الفل علي حسب الوقت

Amgad يقول...

البنت الشقية
يعععععع دي عييط ولا زعل
ولا بتخوفيني
عموما كل حاجه في حياتنا دلوقتي
مبقتش تستاهل الا نوكومنت

Amgad يقول...

قلب ينبض لله
أقول أيه بس منهم لله
ممكن تقولي كمان حسبنا الله ونعم الوكيل

حميير يععع
ايه حكاية اليع في الكومنتس
علي رايك يعني جت علي اللحمة الواحد فاقد الثقة في كل شيء
بس تعرفي لو خلاص قررنا نمشيها فول وطعمية زي مبتقولي
هيطلعلنا بايل في الموضوع برده زي اللحمة
خالص تقديري منوراني ويارب دايما

Amgad يقول...

dodda
مذبوح مذبوح مذبوح
فكرتيني بشيخ الازهر في تعليقه علي
الحجاب في فرنسا لما قالك هذا حقة هذا حقه هذا حقه
ممكن يطلع برده يقولك علي لحم الحمير
حلال حلال حلال
المهم
معاكي حق ده بيفسر اغنية بحبك ياحمار
ويدل ان سعد الصغير تاني شخص اكل لحمة حمير
عشان كده حن للحمار
طبعا الاول كان شعبان

Lyssandra يقول...

حراااااااااام عليـــــــــك

أنا ماقدرتش أكمّـــــــل البوست

ههههههههههه



كل سنة وانت طيب
ورمضان كريم

Unknown يقول...

السلام عليكم ورحمة الله وبركاته
كل عام وانت بألف خير وصحةوو
اين الجديد يابشمهمندس؟
اقصد كتابات جديدة
وليس صورة
التعريف
فقط!!

مدونة حكومتى ملاك يقول...

يا حبيبى يـــــــ حمار ـــــــــار
فعلا والله الحميير مظلومة أوى بس عارف ليه لأنها ساكته على الظلم ده
ما هو الحمار هو اللى بيسكت عن حقو يسكت على الظلم علشان كده الحميير كتير فى البلد.
جمييل أوى البوست ده شكرا عليه وربنا يوفقك .


عمار صبرى

maiosha يقول...

سلام عليكم

إزيك يا أمجد؟؟

بقولك ايه ياريت تجيلى المدونة علشان عندى ليك تاج

متنساش بقى

سلام

Ahmed El-Agouz يقول...

السلام عليكم
خليني اقلك اني سعدت جدا بتعرفي علي مدونتك الرقيقة القيمة واسمحلي اكون من زوارها الدائمين لو معندكش مانع

ثانيا انا بصراحة مش عندي اعتقاد ان المصريين بتاكلوا لحم حمير من عشرات السنين ده انا متاكد ومش زعلان
اصل لحم الحمير علمنا الصبر والجلد والتحمل والغاء العقل وتطويل الودان بس ناقص حاجة وحدة انه يطلعلنا ديل

مرة تانية سعدت بمروري علي مدونتك
العجوز

Admin يقول...

بجد مدونه رائعه
وموضوع اروع واروع جزاك الله كل خير انك بتتطرك لنقطه زي دي فعلا فيه حاجات كتير في البلد مش بقينا عارفين ليها تفسير ومش عارفين الدنيا ماشيه ازاي ممكن من كتر اكل الحمير
ما علينا بس والله لو كل واحد راعي ضميره في البلد دي اكيد كنا هنبقي احسن كتير بس احنا ماشيين علي مثل اللي يعوزه البيت يحرم علي الجامع يعني كل واحد بيدور علي المصلحه
ربنا يسترها معانا

Amgad يقول...

دكتورة نورا
سعيد اوي باهتمامك وسؤالك وان شاء الله قريب
ميرسي جدا لمرورك

Amgad يقول...

حكومتي ملاك
ما هو الحمار هو اللى بيسكت عن حقو يسكت على الظلم علشان كده الحميير كتير فى البلد.
متفق معاك ولكن مش في كل الحالات
يعني احيانا في ناس نفسها متسكتش عن حقها بس بيبقي غصب عنها او محتاجه حد يفهمها تدافع عن حقها ازاي

Amgad يقول...

ميوشة
فينك يا جميل حمدالله علي السلامة
ميرسي علي التاج وان شاء الله هجاوب عليه

Amgad يقول...

احمد العجوز
ده يحصلي الشرف ياباشا انك تبقي زائر
يعني انت هارش الحوار
من قبل كده
طيب مكنت تنبهنا يا عم
عموما فيه فرق بين الصبر وبين التناحة
خالص تحياتي

Amgad يقول...

السقا
ميرسي بجد علي رايك فيا وفي المدونة
المشكلة يا عزيزي دلوقتي
ان الضمير مات في وسط المجتمع المادي
اللي احنا عايشينه
وكل واحد دلوقتي بيقول يعني جت عليا
يعني انا اللي هخربها اكتر مهي خربانه
وللاسف في ناس مضطرة تبيع ضميرها
عشان بس تعيش
خالص المي وحزني

dina seliman يقول...

موضوع تحفه بجد
وتحليل وهم
بجد رووووووووووووووعه
انا مش لايقه كلام اقوله

بس يارب محدش من المسؤلين يقراه ويقتنع بفكرتك
كده الحمير سعرها هيبقى غالى
والواحد عشان يشتريلو
ودن حمار عاوزله مبلغ وقدره

ربنا يكتر من حميرك يامصر

Amgad يقول...

دينا سليمان
حمد الله علي السلامة
رجعتي منورة زي الاول يا دينا
ثنائك علي البوست خلاني منشكح اخر انشكاح

هي دي الميزة بقي
ان لسه الحمير محدش اعلن عنها
يعني ممكن الواحد يعمل مزرعة
علي مالموضوع يبقي ليجال
نبتدي ندبح ونوزع
قبل مالدعم ينزل عليها

هستناكي بس في الاول مش في الاخر

شيماء الجمال يقول...

هههههههههههههه
فعلاً موضوع لحم الحمير ده بقى موضوع لذيذ قوي .أنا كتب بوست على نفس الموضوع في المدونة عندي..رحت عبده تيفود و حسيت بالحمار بيرفس في قفايا :)

Amgad يقول...

شيماء الجمال
ممممممممممم
يعني موضوع الرفس في القفا ده
طلع حقيقة مش اوشاعات
زي ماكنت فاكر
يبقي انا لسه ماكلتش الحمد لله
بس مش عارف ليه لما بشوف الحمار
بيبقي نفسي احضنةوابوسة
تحليل متناقض
خالص تحياتي وميرسي لمرورك