الأربعاء، 27 أغسطس 2008

تاج وامري لله

بقالي كتير مليش مزاج اكتب اي حاجه المهم قولت فرصة التاج ده من ميوشة
الرائعة اللي معاها بجد بتعرف الفشل الصح والمتعة في بوستاتها بلا انقطاع
قولت اديني ارغي معاكو شوية وده هيبقي اول تاج في حياتي التدوينية اجاوب عليه
جالي اكتر من تاج قبل كده بس كلهم من بتوع قول مية وستاشر صفة عن نفسك
وانا مش ليا في الليلة دي او مش بعرف اتكلم عن نفسي
المهم اليكم التاج
بدأت التدوين من إمتى؟ودخلت العالم ده إزاى؟
اول مرة عملت مدونة كان في ديسمبر السنة اللي فاتت
بس مجتش فرصة ان المولود يكبر ونسيت الباسورد بتاعها
كان اسمها مصر الحبيبة المحلوبة ولم يشأ الله لها المعيشة
وكان توجهي فيها هيبقي سياسي بشكل كبير المهم قولت
ملوش لازمة دلوقتي
لحد مجت الفرصة من شهر يونيو اللي فات قولت فرصة
ادخل العالم ده واشوف الناس دي عايشة ازاي السبب في كده
كان احساسي اني عندي حاجه عايز اكتبها وللاسف لحد دلوقتي
مكتبتش اي حاجه من اللي في دماغي يمكن لان في اوقات ببقي
مستثار فكريا واوقات كتير لأ او جايز لاني ببقي احسن في التحاور
يعني لما يكون
في رياكشن معايا .
لان اوقات لما بتكلم مع نفسي بحس ان في حاجات كتير اوي كنت
عايز اقولها ونسيت لعدم وجود تحاور اللي هي الحالة اللي بحبها اكتر
عشان كده بحس ان اللي اكتشفني في العالم ده هو اللي اعرفه من علي
الميل وخلافة بس لحد دلوقتي مقولتش فعلا حاجه من اللي في دماغي
واحيانا بجد في الردود في مدونات الناس فرصة للتعبير عن رايي
بشكل افضل من الكتابة في المدونة واوقات بقول اراء بحس فعلا
اني عايز اعمل بوست عنها بس برده موضوع التفاعل هو اللي
بيخليني اقف ودي مشكلة لحد دلوقتي
2- إيه كان إنطباعك فى البداية؟
في البداية كنت مذهول اوي من العالم ده
لاني شفته اكبر مما اتخيل وكان في افكار
فعلا اتمني اشارك الناس دي واعلق عندهم
واعرف الناس دي بتفكر ازاي مما لم يتح
لي في الحقيقة التعامل معهم
زي الملحدين والمثليين والعلمانيين
والمتشددين والمنغلقين فكريا والتفاعل معهم
والنقاش دون الخلاف
لان في ناس اعرفهم في الحقيقة لو حصل بينا
نقاش في وجهة نظر معينة ممكن نصل للخلاف
لو الموضوع يتعلق بامور حساسة
- مين أول واحد بتهتم بتعليقاته على بوستك الجديد؟
في البداية كنت فعلا بستني تعليق انجي فعلا لان دمه خفيف
اوي ورايها بيعجبني اوي وبتبص للامور من زاوية تانية
كنت بحس ان في حد بيتابعني
دلوقتي بقيت بستني اي تعليق احس ان البوست فرق معاه
فعلا وانو استفاد حاجه منه او ان ليه وجهة نظر فيه
وفي ناس كتير اوي تعليقاتها بتبقي صائبة وبتقول راي
جميل اوي بحس ان فيه عمق وبحس انو مكمل للبوست
زي راي نعناعه مثلا في بوست الحجاب والنقاب
وفي اراء شجعتني اوي وحسيت فعلا ان عندي اسلوب
السخرية في الكتابة واخرهم كان راي
ولاء و شفقة هانم واحسان بك في اخر بوست
وكان فيه راي جميل اوي لواحده اسمها
جيلان صالح مدونة الم او دموع الملائكة فعلا شاعرة موهوبة اوي
ومدونتها اكثر من رائعةوكنت بستني رايها بس فجاة المدونة اتحذفت
لو حد يعرفها ياريت يقولي
في كمان دلوقتي افنان وياسمين وريمان وايه و وبيري وامنيه ودينا
وطبعا دكتورة نور وفيه دلوقتي مشاريع ناس جديده متابعين واصدقاء جدد
اتمني صداقتنا تستمر وسعيد لاني باديء اتعرف علي مدونات ناس جداد من
الجنس الاخر اللي هما الرجاله ههههههههههه
وفي ان شاء الله ليست مدونات جديد هنزلها هتبقي رجاله بس
-إيه أهم حاجة إتعلمتها فى عالم التدوين؟
زادت خبراتي بشكل كبير في الاطلاع واتعلمت
اقرا البوست لاخره ماخدش المحتوي زي مبعمل
في نشرات الاخبار ولقتي في مدونات فعلا نقلتلي
اخبار جديده واراء غاية في الروعة اضافة الي
مواهب انا مكنتش متوقع تواجدها بالشكل الكبير ده
ام اهم مكاسبي فهما الاصدقاء الجدعان اوي
وبالذات اللي فيهم حرف النون ههههههههه
إيه أكتر حاجة كرهتها؟
اكتر حاجه فعلا كرهتها وكنت بكرهها
هي ان حد يعمل مدونة ومعندوش فكر
فيضطر انو يسرق حاجات مش بتاعته
من حد تاني او ياخد كلام منتديات وينزلو
باسمو او يشتري كتاب ويكتب شوية
كلام مش بتوعة خالص في البوست
وعلي فكرة اغلبهم بيبقي عامل الموديراشن
اكسبت يعني لازم يوافق علي التعليقات
وانا بستغرب ازاي الشخص فيهم بيحترم
نفسه لما يقرا كلام مش بتاعة ويجاوب عليه كانه
كلامه بجد شعور غريب اوي
لا ده في واحده مرة شكتلي ان بوستاتها بتتسرق
ومش بس كده ده التعليقات عليها كمان
قولتلها الشخص ده عمرو مهيبقي محترم قدام نفسه عشان
يبقي محترم قدام الناس ولما الاقي اشعار مسروقة كوبي
باست ولما بلاقي بعضهم اغبية كاتبين بوست نزل قبل كده
علي الف منتدي وكفاية ان تاخد اي حتة منه علي جوجل
هتلاقي الف واحد نزله دول بيصعبو عيا في مرة برده
دخلت عند واحد عندو تسعتاشر سنة بدون ذكر مدونات
منزل بوست عن مواقف الخطوبة المحرجه وهو لسه
مخطبش طيب جبتها منين اتاريها من كتاب لعمر طاهر اسمو شكلها باظت
وكانه كان متنبيء ان شكلها هتبوظ فعلا
فعلا الناس دي بتصعب عليا واحب اقول لاي حد
كده انت حرامي فاشل ومفقوس حتي السرقة فشلت فيها
اللي ينرفزني فعل لما الاقي حد بيعلق عندو
ومش فاهم ان ده مسروق والاقيه بيرد عليه
علي اساس انو ده كلامه وفكره فعلا
في حاجت تانية بتتضايقني نسبيا
لما الاقي حد دخل عندي ساب تعليق وهو
مقراش البوست اساسا ودي بتبان اوي في التعليق
وبقوله لو معنكش وقت تقرا البوست بلاش تيجي هنا تاني
كمان بكره لما بحس ان في حد اخد قلم في نفسه
وبيتعامل بتعالي او بيحس انو بقي مشهور
حاسس ان التدوين له تاثير؟؟
بشكل كبير بحس ان ليا اراء مجمعها في حته
واحده وممكن اي حد عايز يقراني يطلع عليها
بحس اني دخلت مجتمع في ناس فعلا اتمني اعرفها
او علي الاقي اشاركها الراي وممكن اقراها او تقراني
من خلال لينك
حسيت كمان ان لما بيبقي جوايا كلام ممكن اقوله او
تعبير عن راي او موقف او حاجه حصلت فيه مكان
اقدر اقول فيه كده
اللي هو تجميع ارائي بشكل كبير
بحس ان كوني مدون ده بيعمل انفتاح علي ناس
جامده اوي ومدونين مشهورين اقدر علي الاقل
اشاركهم الراي في حاجات معينه
شفت ناس علي قدر كبير اوي من الدماغ
والتمخيخ وناس بتعرف فعلا تفكر وناس ممكن
اتناقش معاها في اراء واطلع من المناقشة دي
بمكسب
في كمان مدونات بتبسط اوي لما ادخلها
زي اللينكات اللي في الجمب عندي وبوجه تحية
وباقة ورد لكل منهم وبحس بجد ان كل حد فيهم
عندو موهبة جبارة في مجال معين وعنده ملكة التفكير
- تهدى التاج لمين ؟
لافنان
لياسمين
وايه
وللتور جايد
ولحماده زيدان

هناك 26 تعليقًا:

بنت القسام يقول...

بسم الله
السلام عليكم ورحمه الله
انا والله مش عارفه اقول ايه الصراحه
بجد مكسوفه جدا
يااااااااااااااريت ياريت حضرتك مش تزعل منى بجد والله كان عندي شويه مشاكل كدة واتحلت خلاص
بعتذر من حضرتك والله
كلامك عني في البوست كبير عليا اوى
بجد ربنا يكرمك ويعزك
اتمني بجد حضرتك مش تزعل منى والله لو كنت اعرف ان مدونتى عاجبه حضرتك كدة ماكنتش حذفتها وكنت خليتها لحضرتك وبس
بجد والله انا عارفه انى عذبتكم معايا
بس خير باذن الله

كل سنه وحضرتك طيب
ورمضان كريم
جيلان صالح

dina seliman يقول...

التانيه مش مشكله
المهم ان النت رجع وانا كمان

وشكرا جدا جدا على انى لقيت اسمى من ضمن الاسماء
ده شرف كبير جدا ليا يارب اكون قده

ومستنين الجديد
مفيش حاجه اسمها ماليش مزاج

maiosha يقول...

إيه ده؟؟ مين دى اللى متعة بوستاتها لاتنقطع دى ؟؟ أناااا؟

هيه هيه يا بركة دعاكى يا ماما

إفتحوا يا إخوانا البرينتر خلينى أطبع الكلام ده وأغيظ بيه الناس

هههههههههههههههه
والله ربنا يخليك ليا يا أمجد يا رافع روحى المنعاوية

بس إنت عقدتنى يا شيخ

الواحد بعد ما قرا إجاباتك على البوست ده حس إنه عبييط أوى .. إيه الكلام الجامد ده كله

بس هقول إيه بقى .. الفاشل فاشل فى كل حاجة حتى فى ردوده

بس والله أحلى تاج شوفته يا أمجد

تسلم ايدك

blue-wave يقول...

امجد باشا
ازيك؟
اولا شكرا للزيارة
ثانيا بجد تاج جميل
انت حطيت ايدك على الجرح فى مسألة سرقة الأفكار دى
الغريب فعلا ان اللى بيسرق دا مش بيكون فى باله مشاعر اللى اتسرق منه
ازاى تاخد مجهود غيرك وتنسبه لنفسك كدا ببساطه؟
وكمان تستنى تعليقات الناس عليه؟
معلش اصل النقطة دى جاتلى على الجرح
عموما تاج هايل ويارب دوام التواصل يا باشا

Amgad يقول...

جيلان
الحمد لله يا جيلان علي الصدفة
اللي خلتني اشوفك تاني
بجد انا كنت متعلق اوي بكلماتك
ولما لقيت حزف المدونة اتمنيت
ان ميكونش السبب في كده اي مشكلة كبيرة
بس الحمد لله ان الامور كلها اتحلت
ورجع حسك في البلوجرز تاني يا باشا
وفعلا رجوعك غطي علي عتابي بسبب غيابك
حمد الله علي السلامة
وميرسي للي كانت السبب -غزالتين-

Amgad يقول...

دينا سليمان
ههههههههههههههههه
يا سلام عليكي وانتي بتقولي مفيش حاجه
اسمها مليش مزاج ولازم تكتب وكده
والاقيكي بتنزلي بوست كل شهرين تلاته
لا وايه ياس متتالي
عموما حمد الله علي السلامة
وبقولك اقري البوست اللي فاتك هنا

Amgad يقول...

ميوشة
علي فكرة انا مش بجاملك خالص
ولا برفع معنويات ولا حاجه من دي
انا بدعو اي حد يقرا اي بوست عندك
ويتخيل قد ايه روحك جميلة وقد ايه بنت نكته فعلا زي مبيقولو
من اول تعريفك بنفسك وملابسات دخولك الكلية لحد حناقة الكوك باب وام جماده
الا من الحق ام حماده دي فين؟؟؟؟؟؟؟
ههههههههههههههه
ميرسي تاني علي التاج

Amgad يقول...

بلوو ويف
ازيك يا دوك
اهي مدونتي دي المكان الوحيد اللي
ليا تعليق فيه
وانت لا
بجد كنت بكلم حد من فترة فبقولو انا بعتبر
مجتمع البلوجرز اللي اغلبنا بيدخلو ده اسمو مجتمع بلوو ويف
من كتر مبشوف اسمك في التعليقات
انا عارف قد ايه انت حاسس بمرارة
السرقة بالذات لما تسمعها في الكاسيت
وانت في اي مكان ومش قادر تقول ده شغلي
اللهم الهمك والهم كل من سرق الصبر
والسلوان
خالص تقديري

Unknown يقول...

لول بجد :P

ههههههههه

لا بجد الكلام جامد أوي و بجد أديك بتتحاور و بعدين لو الكلام منك لنفسك مش بتحبه ممكن تعمل كوبي بيست للشات اللي بيننا و تعملها بوست (لول:D)

ههههههه

و انا كمان سعيده بصداقتنا ..

تقبل مروري و صداقتي ;)

هههههه و كل سنه و انت طيب

ياسمين

ريمان يقول...

السلام عليكم

امجد

تاج جميل واجابات جميله

وكويس انك مختصرتش فى الاجابات زيى

هههههههههه

كل تاج وانت طيب

وكل سنه وانت طيب يا امجد وبصحه وسلامه

Abu Shahin يقول...

بعد فترة الكسل بتاعتك من اخر بوست بمبار بطعم الحمار اللى كان هايل تنزل بتاح
اشطة

على فكرة انا اوافقك ف كتير م اللى انت قولته عن عالم التدوين وفعلا انا حسيت بكتير من اللى انت قولت عليه خصوصوا انه عالم كبير فعلا وفعلا الواحد قابل دماغات حلوة ( زيك كده ) وقابل اكيد دماغات تانية

واحب اقولك كمان ان انت زيى
عشان انا برده قبل ما انتظم ف التدوين عملت مدونة برضه ونسيت الباس ورد بتاعها
:)

سلام يا امجد

بنت سيناء.. يقول...

تحياتى ليك وان شا اله الى الامام وياريت تضيفنى فى لستة الاهتمام بتعليقاتهم لحسن اهجر المدونة بلا عودة.وهتخسرونى

قلب ينبض لله يقول...

بصراحة تاج وصاية وأنت مجاوب عليه حلو أوي
أنت من خلاله قدرت ترسم ملامح شخصيتك لينا بأنسيابيه وبدون تكلف


حلو أوي أسم مدونتك الأولي واضح أصلا من أسمها أنها مدونة سياسيه
بس انت نسيت الباسورد
الزهايمر عامل معاك واجب جامد
:)))):D

رمضان كريم

Unknown يقول...

السلام عليكم ورحمة الله وبركاته
الحين عرفت ايه فايدة التجات دى؟تخلينا نتعرف (شوية)على انسان كتوم شويه ممكن ما حد يعرف ايه اللى بيفكر فيه الا لما يتكلم مثلك
سعيدة انك ذكرتنى مرتين :اه مرتين بجد مرة صريحة(طبعآ الدكتورة نور)ومرة يعنى نص نص كده(اهم مكاسبي فهما الاصدقاء الجدعان اوي
وبالذات اللي فيهم حرف النون),اظن اناأسمى فيه نون وكمان يبدأ بالنون
وانا كمان سعيدة بالدخول لهذا العالم وبحمد ربنا انى عرفته لاجل ما أعرف كتير من الناس الممتازين مثلك
ياباشمهندس امجد

PrInCeSS BeRy يقول...

امجد

ازيك يارب تكون بخير تاجك جميل يا امجد

وبما انك اهدتنى التاج فى مدونتى انا بقبلة من غير تفكير ربنا يخليك تسلم كلك زوق وشرف ليا

Amgad يقول...

عاقلة علي ارض الجنون
مدام لول بجد
تبقي ضحكتي
علي فكرة مبتضحكش الا لما بتكتب لول بجد
غير كده بيبقي ابتسام بس
دانا يحصلي الشرف طبعا
وبستمتع جدا بالنقاش معاكي اكيد
اتقبل صداقتك ده ايه
انتي عارفة اللي في القلب في القلب
كل سنة وانتي يا رب بخير

Amgad يقول...

ريمان ........غزالتين يعني
يا باشا ده لك ع الفاضي
نيجي احنا ايه بس جمب اختصاراتك
كل سنة وانتي طيبة ويارب دايما بالف خير

Amgad يقول...

ابو شاهين
يا رافع معنوياتي انت دايما
ربنا يكرمك يا حبيبي دماغ ايه بس اللي حلوة نيجي احنا ايه جمبك بس
كل الناس شكلها عملت مدونات ونسيت الباص
اعرف ناس كتير كده
بس علي فكرة احسن
شغلكو في عيش وحلاوة ملوش حل

Amgad يقول...

بنت سيناء
اكيد طبعا انتي علي راس اللسته
اهجر المدونة بلاعوده
انتي بتتكلمي جد؟؟
علي فكرة انا زكرت بعض الناس
ولكن الاهم منهم اي تعليق مهم
وانا فعلا سعيد بزيارتك
وسعيد بمتابعتك
تحياتي

Amgad يقول...

قلب ينبض لله
انتي دايما حرجاني بزوقك
والله تعليقك من التعليقات
اللي فعلا الواحد بيتبسط لما بيشوفها
وفعلا والله من التعليقات اللي بستناها
واللي بترفع معنوياتي لما بكتب صح
وبتتناقش معايا صح لما يكون في موضوع جدلي
خالص خالص تحياتي ليكي

Amgad يقول...

نور اهاتي
ميرسي ليكي يا دكتورة
اكيد طبعا انتي مش محتاجة اقول عليكي
في التاج ده عشان تعرفي معزتك عندي
وكونك اخت كبيرة قبل متكوني صديقة
دي حاجه مفيهاش خلاف
خالص تقديري

Amgad يقول...

برينسيس بيري
اكلي زوق ازاي
تصدقي انا جعان فعلا
بس مش عارف اكل الزوق ده
شرف ليا انا طبعا اني اهديكي التاج
والشرف الاكبر لما تقبليه
خالص تقديري وتحياتي

Unknown يقول...

لاااااااااااااا ايه الخيانة دى انا لسة اهم واحدة طبعا هى المدونة تبقى مدونة من غير طلتى البهية وكلماتى العبقرية وارائى الجهنمية انا زعلااااااااااااااااااااانة منك يا واد يا ميجو وعشان كدة مش هاديك الفانوس اللى جبته لك(دة هزار يا بيه اكيد)......اجاباتك جميلة وواقعية وعايزة اشوف انا توجهاتك السياسية دى .............

لية طلب صغنون رفنوع زى شكة الدبوس مونكن وللا مش مونكن؟؟؟؟؟
ممكن يا بااااااااااااشمهندز امجد تشيل الصورة الرقيعة اللى انت حاططها فى البروفايل دى؟؟؟؟ صورة شنيعة بجد والنعمة الشريفة اسمع كلامى وشيلها ولو عايز عروسة انا اجيب لك ما تقلقش اوكى وللا مش اوكى؟؟؟؟

Unknown يقول...

ايه دة يا واد نسيت اقولك كل سنة وانت طيب واتسحر كويس واشرب اللبن وكل البيض والزبادى (يعععععععععععععععععععععععععععع)

Unknown يقول...

احم احم انا كنت متاكدة من كدة يا ميجو انا كنت باهزر يا واد...... صورة هارى بوتر حلوة احسن من الشاب الرقيع دة الا هو مين دة يا اخويا والنبى؟؟؟؟؟
المهم اكلت الزبادى والبيض وشربت اللبن وللا لا؟؟؟؟؟؟ للمرة التانية يععععععععععععععععععع

Amgad يقول...

انجي
كل سنة وانتي طيبة يا رب دايما
وحمد الله علي السلامة
هو انتي كل شوية هتفهميني انك بتهزري
ههههههههههههههههه
كل سنة وانتي طيبة
واديني غيرت الشاب الرقيع
اللي مكنش عاجبك
اكلت الزبادي وشربت اللبن ايوة
بس انا مش باكل بيض
كفاية البيض اللي مالي البلد
اللي ناكلو غصب عننا
كل سنة وانتي طيبة