الأحد، 14 سبتمبر 2008

مصر التي كانت امك ماتت اترحم عليها بقي !!!!!!!!!!

اللي حصل في الدويقة مؤخرا خلانا نتاكد ان اللي احنا عايشين فيها دلوقتي
لاهي امي ولا امك
مش دي اللي ورد ذكرها في القران ولا دي اللي اتكلم عنها الرسول
ولا حتي دي اللي اتغني بيها الشعراء ولا دي اللي كانت بخاطري ولا دي اللي عادت في دمي
امال امي فين يا بيه؟؟
سؤال وجيه من قاريء وجيه
امك يا سيدي ماتت بعد صراع طويل مع المرض بقالو ييجي سبعة وعشرين سنة من ساعة ماطويل العمر يقصر عمره مسك
وامك بتعاني والادلة كتير اوي
وشوف الفساد دلوقتي بقي عامل ازاي وشوف التعليم واحواله وشوف الاعلام مغذي الثقافة دلوقتي
بقي عامل ازاي وشوف الناس اللي كل واحد فيهم عايز يكت ويهرب م البلد علي مراكب بتاخدهم وتغرق
في هجرة غير شرعية والحكومة نايمة علي ودانها وسايبة الدنيا تولع في ظل الحزن الوطني اللي ماسكنا
بقالو اكتر من خمسين سنة لدرجة ان الاحباط دلوقتي بقي مسيطر ع الناس لمستوي لم يحدث
من قبل في تاريخ مصر
مصر اللي دلوقتي المواطن فيها بقي ببلاش وكل مدي والطبقة الوسطي بيحصلها تاكل لدرجة ان الطبقة
المستورة قربت تختفي والفقراء كل مدي بيزيدوا فقر وبيزيدوا في العدد والعشوائيات عماله بتزيد عشان
الناس تعرف تعيش وسكان المقابر دلوقتي بقوا اكتر من زوارها خلافا لاطفال الشوارع اللي مش بنشوف
ليهم علاج غير في المسلسلات والافلام كل ده وتقولي امي امك ايه بقي
امك متموتش بمبوطي برصاص اجنبي في بلده
امك متغرقش الف واحد في البحر وتمتنع عن انقاذهم وتبرأ الجاني
وامك متوقعش الجبل ع الدويقة وتتاخر في الانقاذ وتحول المنطقة لمقبرة جماعية
وامك وامك وامك وامك
لو قعدت اعدلك هتلاقيها بحسبة بسيطة اوي لا تنفع تبقي امي ولا امك
ومجاراة لما قاله العقاد اقول
لعنها الله من أم اذا ما أنجبت تئد ..... تغذى الكبار بالصغار و تأكل لحم ما تلد
كل دي دلائل تؤدي ان المصري في بلده ملوش اي تمن
وخارج بلده طبعا ملوش تمن دي من زمان اوي
وللاسف اي حد طموح دلوقتي بقت اقصي اماله انو يهاجر ويسيب البلد
او يغووور منها زي مبيقولو
اذن يبقي
قدامك حل من اتنين يا اما تنضم لقطاع المهاجرين بره البلد
يا اما تنضم لقطاع المأنتحين داخل البلد وهو ما يعرف بقطاع المقاهي
وكما قال نجيب سرور

عقود عمل ع القفا بس العمل بره

هاجر وسيب البلد مفروشه للغربان

يعنى يا إما السجون يا الشنق يا الهجره

يا اما تهمه جنون يا العيشه ع الصلبان

بجد الفساد دلوقتي بقي مالي الدنيا
وفي كل حاجه
نقرا عن هشام طلعت فساد احمد عز فساد منصور فساد
اي رجل اعمال او مسئول دلوقتي
قول وانت حاطط في بطنك بطيخة صيفي انو فاسد
حتي المساكن اللي بيقولوا خصصوها لاهالي الدويقة اتوزعت بالمحسوبية وبالفساد برده
اي خبر دلوقتي في البلد بقي ليه دعوة بالفساد حتي الاوليمبياد فيها فساد
افتكر مقولة لواحد صاحبي قالي انت مستغرب ليه ان الناس بتاخد رشوة وبتسرق
انت لو حسبتها مع نفسك كده
هتلاقي ان البلد خربانه وانك لو مسرقتش مش هتقدر
تعيش وانت دلوقتي في حكم المضطر
بصراحة انا كنت مصدوم من الكلام هو صحيح مقاليش انو بيحلل لنفسه الرشوة
ولكن هو شايف ان دي طريقة للتفكير ممكن ناس كتير اوي تتبعها
وكان ضربلي مثل لواحد بياخد 700 جنية وعنده تلت عيال
وقالي ان ده متوسط دخل الموظف وده متوسط افراد الاسرة وحسبلي انو
لازم يسرق عشان ياكلهم
بصراحة انا لما مسكت ميزانية نفسي انا مش قادر اعرف
ازاي الناس دي عايشة بجد انا بصراحة لو مكانهم مش هرتشي
دانا هنتهز اي فرصة تجيلي عشان ارتشي وعشان ابقي فاسد
دا اذا كنت انا طالب اهه ويادوب المبلغ ده مرة ونص
بيقضيني كطالب بالعافية فما بالك بقي ده يعيش ازاي
ده بالنسبة لصغار المرتشين والفاسدين فما بالك بالحيتان اللي عمالين يسرقوا لحد مالبلد خربت
كل حاجه دلوقتي في مصر بقيت فاسدة لدرجة ان
الفساد بقي قاعدة في مصر!!!!!
سواء في صورة رشوة او سرقة او واسطة ومحسوبية
وبقي
المجتمع دلوقتي متقسم لمجتميعات فكرية كل منها بقي ليه
قانونة الخاص اللي عايش بيه وفكره اللي بيفكر فيه خارج نطاق القانون والعرف
والاخلاق والدين والدستوروالاعراف والقيم النبيلة والمباديء
كل حد دلوقتي لما يفيض بيه يقولك جمال مبارك هو السبب هو واصحابه
وانا اكره التوريث وانا ضد التوريث
طيب اشمعن في دي انت ضد التوريث هو في ايه في مصر مش بيتورث ؟؟؟؟!!!!!!!!!
كليات الشرطة بتتورث وكل طالب او ملازم دلوقتي لازم يكون ابوه لواء ولا عميد
حربية نفس النظام في التوريث والوسايط
الجامعة دلوقتي تبص علي كشف الاوائل لازم يكونوا اولاد الدكاترة
وكان في صديق ليا في جامعة القاهرة فاتت عليه فرصة التعيين بيقول
ان التعيين دلوقتي بقي لاولاد الدكاترة وفي عائلات معينة معروفه في مجال
احتكار المناصب الجامعية يعني ده نقبة كذا يبقي لازم هيبقي دكتور حتي لو كان حمار
لاعيب الكورة دلوقتي لازم ابنو يطلع لعيب الممثل لازم ابنو يمثل حتي لو كان عندو
كل الامكانيات الا انو يبقي ممثل والامثلة كتييير
حتي في الصحافة الصحفيين اللي طالعين في الجرايد الحكومية كلهم اولاد الحيتان
بتوع زمان الوزرا دلوقتي بقوا اولاد الوزرا بتوع زمان او من نفس العيلة
اشمعن جت علي جمال مبارك يعني سيبوه يورثها خليها تخرب اكتر مهي خربانه
بجد الواحد شايف الدنيا سودا اوي
طيب اقولكوا علي حاجه انا كنت سعيد جدا ومنشكح اوي وانا بشوف مجلس الشوري
بيولع
ولو شفت البلد كلها بتولع هبقي مبسوط اوي !!!!
رجعت قولت طيب ازاي انا بحب البلد وازاي انا مبسوط وانا شايفها بتولع
جايز ده راجع لانها لما تولع ممكن يحصل تغيير ولكن هيهات هيهات
قولت طيب والافراد اللي المفروض مش بيحبوها من الاول عاملين ايه دلوقتي
بجد النظرة دلوقتي بقيت مادية في كل حاجه
والمشاعر محظورة والتقدم محظور
والحب محظور والرغبة في النجاح محظورة الا اذا ارتبطت كلا منها بقاعده المجتمع
الحالي وهي الواسطة والفساد والمحسوبية يعني لو عايز تنجح دلوقتي لازم تبقي مؤهل
للنجاح مش يعني زكي ولا طموح ولا عندك الاستعداد ولا الرغبة
لا عشان تنجح لازم يبقي عندك الواسطة وتبقي فاسد ويبقي معاك لزوم الرشاوي
وتبقي بايع ضميرك وبايع نفسك قبل متدخل في اي مجال عايز تنجح فيه
المجتمع اللي عايشينه بجد اصبح مادي لدرجة ان روحة قد خلصت الي بارئها
واصبح عبارة عن جسد بلا روح ولا انسانية وهو ما يبدو جليا
وواضحا لكل قضية نناقشها

وفيه الحل لكل تساؤل بنسأله دلوقتي
س: ليه مفيش راي عام موحد في مصر؟
ج :لان مفيش رد فعل لانعدام الروح عند الناس
س: ليه رجال الاعمال واكلينها والعة والحكومة ضاربة الناس علي قفاها؟
ج:عشان الناس معندهاش استعداد تعمل اي حاجه عشان معدش عندنا روح فعلا
س: ليه مهما حصل في الناس وانضربوا بالجزمة بننسي علي طول ومهما كان حجم الكارثة مفيش رد فعل؟
ج:عشان طول محنا معندناش روح مش هنعمل حاجه ومفيش اي تغيير هيحصل
س :ليه فيه تحرش بيحصل في كل حته وانعدام انسانية؟
ج:عشان الكبت اللي موجود في الناس ناتج عن غياب الروح وبالتالي غياب القيم
حتي اصبح كلا منا عبارة عن جسد بلا روح
س: ليه التعذيب اللي بيحصل في اقسام الشرطة واتهامنا للظباط انهم بلا روح؟
ج: مش بس الظباط بلا روح وبلا انسانية في تعذيب الضحايا ده الناس كلها بقوا كده
ولو اي حد طال يدوس علي رقبة اخوه بالجزمة هيعملها بلا اي سبب سوي مرض العيش بدون روح

فعلا فكر دلوقتي في اي مشكلة بتحصل في البلد ومن قبل متدور علي سبب هتلاقي انفصال الروح
عن الجسد السبب في اي مشكلة مهما كانت كبيرة ومهما كانت صغيره
ومازلنا في انتظار بعث الروح الي الجسد وبعث الام الي الولد ........................

هناك 82 تعليقًا:

enjy يقول...

مرض العيش بدون روح.......
صح

Walaa Elshamloul يقول...

والله يا أمجد كلامك دا قلقنى عليك
رغم ان كل اللى قلته صح
انت محتاج تشوف نموذج صالح
محتاج تشوف قدامك قدوة
دور عليها ويا ريت يكون حواليك
يعنى والدك مش راجل محترم عنده مبادئ؟ والدتك مش ست محترمة عندها اخلاق؟
مدرس لك او استاذ فى الجامعة
الواقع فعلا بقى صعب ومرير
لكننا دائما محتاجين نرى نماذج صالحة تضيئ لنا الطريق
وبعدين حتى لو كان النجاح بقى بالواسطة
مش معنى كده اننا ما ننجحش
ننجح ونستمر وناخد حقنا
النجاح بجهدك وتعبك له لذة متعة لا توصف
وتحقيق الحلم اروع ما يمكن الوصول اليه

ندا منير يقول...

مرة تتكلم عن حمدى بالالا ومرة عن تتكلم عن الكوارث اللى عمالة تحصل فى مصر
شكلك كدة مستغنى عن نفسك
هههههههههه
بس والله عندك حق انك تتكم عن الكوارث اللى عمالى تحصل دا دلوقتى لما بقيت بقرا الجرنان بلاقيه كله حوادث وكوارث وبجد اعصابى بتتعب جدا واخر حاجة حرقتلى دمى حادثة الدكتور اللى قتل الراجل اللى كان بيوظف اموال عنده وطبعا كل حاجة تحرق الدم بس اللى خفف كارثة الدويقة دى انهم سكنوا الناس فى بيوت تانية
مش عارفة بجد مصر مالها ايه كمية الكوارث اللى عمالة تمر بيها دى
دا من حوالى سنتين كدة مصر مكنتش بالحال دا خالص
مش عارفة ليه فجاة بقى حالها كدة
ودلوقتى منملكش سوى الدعاء

Abu Shahin يقول...

البقاء لله يا عم امجد
وانا اللى كنت فاكرها (نايمة جوا ) على راى محمود حميدة طلعت ماتت

بس انا بيتهيالى مامتش يا امجد
رغم كل اللى فيها ده مامتتش

وبصراحة انا زعلان منك
ازاى تفرح ف حريق مجلس الشورى
يا امجد مجلس الشورى ده مش بتاع صفوت الشريف مجلس الشورى ده بتاعنا احنا وكان ف يوم م الايام كان اسمه بيت الامة

رغم كل ما ف كلامك من احباط انا نفسى عايشه لكنى شايفها بكرة اجمل

تحياتى

حمادة زيدان يقول...

امجد افندي

أنا امي في البيت , ومصر ولا امي ولا اعرفها وكداب اللي قال انها امي

هي لو كانت أمي كانت خلفتنا ونسيتنا زى ما هي عاملة فينا

ياللا خير

وكل سنة وانت طيب يا حبوب

ريمان يقول...

امجد يا تلموذ

يالهوى

يا خراشى

يالهوى يالهوى

هى ماتت خلاص

وانا شم عارفه ونايمه على ودانى

اهىء اهىء اهىء

الله يرحمها

الله يرجمها يا امجد

اهىء اهىء

خمسه حداد بقه

يلا

.................

على العموم هى لا امى ولا اعرفها اصلا

بلا قرف

طول ما احنا فى مصر لاهنشوف تقدم ولا عدل ولا امان ولا اى شىء فى الدنيا اصلا

حكومه زباله ونظام زباله ودستور زباله

زباله فى زباله

الله يرحمها خالتى مصر

مش امى والله

enjy يقول...

امجد: انا جيت كذا مرة عشان اشوف راى الناس فى التعليقات وزعلت قوى بصراحة.. احنا بنخلط بين مصر والحكومة ليه كدة لو هى مش امى وامك وام اى حد من اللى علقوا التعليق دة مكناش زعلنا عليها كدة مكنتش انت ضيعت وقت عشان تكتب البوست دة مكنتش حسيت بالقهر من اللى بيحصل....
مصر لسة امى وامك يا امجد بس هى تعبانة شوية فى ناس مش سايبينها فى حالها بدل ما نبعدهم عنها نقعد نشتم فيها؟؟؟؟
ما يصحش والله.........
على فكرة متفهمش كلامى غلط انا عارفة وفاهمة انت بتتكلم فى ايه كويس بس التعليقات هى اللى استفزتنى..انت لخصت الموضوع فى مرض العيش بدون روح يعنى العيب فى البشر مش فى الارض يعنى انت كلامك صح..
طولت عليك انا اسفة ..

خديجة محسن "لؤلؤة الاسلام" يقول...

شكرا لك اخى

مدونة متميزة ما شاء الله

و كل عام و انتم بخير
و تحيااااتى

رمضان
كريم

قلب ينبض لله يقول...

فيلم آسف علي الازعاج محمود حميدة كان بيقول لأبنه أحمد حلمي :ماتقوليش مصر هي أمي أمك راقدة جوا في السرير

تصدق فعلا أنت بتتكلم صح مش مهم تكون طموح وذكي علشان تنجح المهم يكون في حد في منصب كويس يتوسطلك علشان تبئي في وضع ومكانة وشغل كويس انا شوفت دا بنفسي أدام عيني

تحس اننا بئي عندنا بلاهة مكسلين نتحرك وناخد موقف بس للأمانه في جمعيات أهليه أعضائها كلهم شباب عاملين شغل حلو أوي في البلد وشباب يفرحوا

وبالنسبة لتوريث الحكم فمش علي أد جمال مبارك بس زي ما أنت قولت
عندك مثلا بابا محامي ودخل أخويا حقوق علشان هو كمان يبئي محامي زيه

بصراحة هو بوست طويل فعلا بس اللي هايقراه مش هايضيع وقته بالعكس

سلام

انى احبكم فى الله يقول...

اشكرك على الموضوع الجميل وبجد مدونتك جميله تحياتى ليك ورمضان كريم وتقبل مرورى

بنت سيناء.. يقول...
أزال المؤلف هذا التعليق.
بنت سيناء.. يقول...

امجد
كثر الفساد فى البر وفى البحر وذلك بما كسبت ايديكم


لقد عرفنا القرآن ذلك منذ قديم الازل فهناك اية تحتوى ما كتبتة اعلى

ماذا نحن بصانعون؟؟حقيقى مالنا إلا عرض الموضوع؟؟تعبنا بل وتعب الدهر منا


تدرى؟؟اريد ان اسكن كوكب تانى((حتى وان كان كوكب مدحت صالح(:
اللى بيغنى ويقول ربك يا زمانى يا اوانى يامكانى انا عايز اعيش فى كوكب تانى..فهل تعرفت على كوكب مدحت صالح؟؟

16 سبتمبر, 2008 12:43 م

بنت سيناء.. يقول...

هيا..إلى كوكب مدحت صالح ..لماذا انتم لازلتم جالسون؟؟

EMMY BABY يقول...

والله انا كنت هعيط من كلامك

معرفش جوايا مش عايزة يقتنع ان مصر خلاص ضاعت بس عقلى مقتنع تماما بكلامك

بجدد الوضع بقى صعب من جميع النواحى

وده لخوف الناس وجبنهم

وبعد الناس بما يشمل الحكام واولو الامر عن الدين والاقتداء بالصحابة

بس اكيد مصر هتفضل فيها خير واكيد هتقوم تانى على رجلها وهييجى يوم نحرر الفساد منها

ده مش كلام شعارات بس احنا لازم نقتنع بداخلنا ان اكيد الخير موجود بس احنا اللى مركزين على الوحش

مدونتك رائعة واسلوبك فى الكتابة لا يثير اى ملل بجد

اول زيارة ليا وان شاء الله مش الاخيرة

تحياتى

ايمى

maioya يقول...

مهما كانت الدنيا سودا
مش لازم نفقد الامل
اه بقالنا سنين مستنين
بس مفيش حاجه بعيده علي ربنا
وعسي الله ان يجعل بعد عسر يسر
واللي جي هايبقي احسن من كده بكتير
بكره افكرك بس لو فضلنا عايشين بقي لحد الكويس مايجي :D

hinger يقول...

الله يرحمك ياما

كلام وخلاص يقول...

ايه المود الكئيب المسيطر على المدونين كلهم ده .انا بس عاوزة افهم يعنى ايه مصر ؟يعنى ايه وطن ؟ ودى حاجة زيها زى غيرها الكتب ماتعلمهاش كمان انا مش فاهمة هى مشكلة حاكم فاسد ولا مشكلة شعب سلبى ولا هو فعلا احنا على المستوى الفردى قدرتنا على التغيير محدودة كلامك عن التوريث فكرنى بموقف للامام الغزالى ابنه فى الثانوى كان فاضله تقريبا نص درجة على الطب واتعرض عليه ان ابنه يدخل اكراما له هو سألهم حتدخلوا كل اللى جاب مجموعه ولا هو بس ؟ لما قالوا له ابنه بس رفض طبعا وكلامك صح مليون الميه لما احنا الاول نغير فكرة وراثتنا لمهن آبائنا يبقى حاكمنا هو كمان يغير الفكرة دى وارجع اقولك فقرة جلال امين فى ماذا علمتنى الحياة ((كم سررت إذن عندما قرأت قولا لذلك الكاتب الأثير لدي جورج أورويل يفسر به إرساله لابنه بالتبني إلى مدرسة من المدارس الأرستقراطية والمسماة في انجلترا Public School، على الرغم من ميلوه الاشتراكية وكراهيته للامتيازات الطبقية. قال أورويل تعليقا على ذلك: "نعم أنا ضد نظام Publlic Schools، وأؤيد إلغاءه، لكن طالما هو موجود سأظل أرسل ابني إلى مدرسة من هذه المدارس"!
لقد فهمت هذا القول بمعنى تفضيل الواقعية الكاملة على الاستسلام للشعارات المجردة، وبمعنى الاعتراف بأن قدرة المرء منا على أن يحدث بعمله المنفرد تغييرا مهما في النظام السائد قدرة محدودة جدا، وأنه قد تكون من الحماقة أن يضحي المرء بنفسه، أو بمصالح شخصية مهمة له أو لأسرته، في سبيل التمسك بمبدأ عام لا توجد أمامه فرصة جدية للتحقق في المدى المنظور.))
كلامى متناقض صح؟؟

سلام

MY FATE يقول...

هو أان قلتها الشعب ده ماااااات
بس والله مع اني بحاول أكون متشائمة على طووووووول بس عندي أمل أنه البلد دي ممكن تتصلح
بس دائما مصر بتحتاج لحد يمشيها بمعني حد يطلع قائد كده بس من غير ما يبقي حرامي ويصحى الشعب اللى مات ده وترجع مصر بلد محترمة تاني
وبعدين هو الموضوع مش مستبعد قوى ليه؟
أقولك ليه عشان ربنا موجود وربنا قادر أنه يحي الموتي ويحي البلد دى تاني
سلام

صبرني يارب يقول...

شوف يا اخي الفاضل
انا اختلف معاك مصر ما زالت امنا رغم انوف الجميع لانها بلدك ووطنك غصب عنك وعننا كلنا .
ومصر ما ماتتش لكن مصر بتحتتضر وربنا قادر يا سيدى يشفيها وكمان حتى لو ماتت قادر يحيييها وان شاء الله باذن واحد احد هاتقوم تاني بس مش دلوقتي لما يكون فيها ناس تستاهل كده اصلا .مش خانعين مكتومين على ابسط الاحوال .

اسمحلي بقى كمان اجاوب عن اسألتك من وجهة نظري .

س: ليه مفيش راي عام موحد في مصر؟
ج :لأن مافيش رأي او فكر واحد اصلا احنا بنعتنقه .احنا بلا فكر

س: ليه رجال الاعمال واكلينها والعة والحكومة ضاربة الناس علي قفاها؟

ج:لأن رجال الاعمال الى بتتكلم عنهم كانوا مناسبين الحكومه زمان دلوقتي هما الحكومه يا حبيبى . وهما رجال الاعمال يعنى الى هما برضه فى نفس ذات الوقت الحكومه ضاربين الناس على قفاها عشان الناس مدياهم قفاهم ومعرضينه كمان للضرب .

س: ليه مهما حصل في الناس وانضربوا بالجزمة بننسي علي طول ومهما كان حجم الكارثة مفيش رد فعل؟
ج:لان الكارثه مش بتصيبهم كلهم الى بيصيبه الكارثه بس هو الى بيتوجع مافيش روح الجماعه خلاص نجحوا فى انهم يموتوها ولان الجوع لما يقرص البطن بيقطم الوسط


س: ليه التعذيب اللي بيحصل في اقسام الشرطة واتهامنا للظباط انهم بلا روح؟

زي ما انت بتقول اه ان مش الظباط بس لا ده كل الناس
لكن بينى وبينك اصل احنا بقينا مفرطين كل واحد لوحده
يقدر جدع فيهم الظباط يعمل كده فى الصعيد ؟؟؟ الله وكيل كانوا اكلوه صاحي هناك .
انما يا ابنى احنا بقى هنا مالناش ديه لا عند الحكومه ولا بينا وبين نفسنا اصلاااا

السؤال الى انا باوجهه لك ولكل الناس :

هو احنا ليه اصلا بقينا كده ؟؟؟؟؟

ج : عشان سبنا الكتالوج مش ماشيين عليه
الى ما يمشيش على تعليمات الكاتلوج ما يقولش الجهاز باظ ليه

ايه هو الكتالوج ؟؟؟
كلام ربنا يا اخوانا
القوانين الربانيه الى ربنا امرنا بها
نسيناها او تناسيناها وشلناها من حسابتنا
ونسينا ان لنا رب اسمه القدير الحكيم الحليم


على فكره مش معاك بان الدنيا سوده اوي كده
لسه فى ناس نضيفه ولسه فى ناس بتحاول تعيش
وناس ناجحه وناس معاها فلوس برضه وناس مش منخرطين فى الفساد الى اتعرض عليهم كتير
وناس تتقي الله فى نفسها ومالها وعيالها وبلدها
فى كتير بس احنا بنحاول نقول مافيش عشان لما نغلط نقول كل الناس كده ونبرر لنفسنا الخطا

واسفه اوي اوي على الاطاله بس كلامك كمان كان كتير ولازم ارد عليه

والرز لو لقيته شاط هانيجى نفطر عندكم على فكره

حنين.. يقول...

يااااااااااااااااااااااااااه
دا اطول بوست قريته فى عالم التدوين
كلاممك خلانى اقول لنفسى
دا احنا بقينا غلابه اوى
مش عارفه اى حاجه بتحصل, قصدى اى كا رثه بقت تحصل احط ايدى على قلبى واقول
يا ترى الكا رثه اللى جايه هيبقى شكلها ايه
تعرف احنا بقين مستعدين نفسيا للكواراث من كتير الكوارث
تو ماتيكى تو ما تيكى يعنى
والا مكنتش تلاقى حد عايش
وهو احنا اصلاا عايشين, اشك فى دى....
لو فضلت اتكلم هتكلم كتير اوى
سلا انا هروح اصلى التراويح
وادعى لمصر( اللهم ارحم امو اتنا
دمت سالم
ولسه فى امل برده
ولسه جوانا حلم
على الاقل عشان نعمل نفسنا عايشين

canary يقول...

يعنى انت يا امجد عاوز تقول انه ماتت فى ظل الرعايا الرشيدة لحكومات مبارك لمتعاقبه؟؟
يعنى وهى قبل كدة كانت تنعم فى الرخاء وتسبح فى بحار الذهب؟
الحاجه اللى تستغربلها جداا وتثير عندك الدهشه وترفع جواجبك لحد ما تخبط فى راسك
ان البلد دى طول عمرها بتتسرق من اول ما احتلوها الرومان ومن قبل ذلك ومن بعد ذلك ومع كل ذلك لسه فيها اللى يتسرق لحد دلوقتى
ازاىىىى؟؟؟ متعرفش

غير معرف يقول...

السلام عليكم
اسمحلى يا امجد اقولك ان الشقق المخصصة لتسكين اهالى الدويقة متوزعتش بالمحسبوية لا دى اتوزعت بالعدل على لاى فعلا من اهالى الدويقة
كمان انا شايفة انك محتاج شوية وقت تقعد فية مع نفسك وتندم على الى انت كتبتة دة
انا عارفة واللهى انك مفقوع من الى بيحصل فى البلد بس متقولش كدة على مصر انت يا أخى لية متشائم كدة
لو احنا اصبحناكدة ولادنا هيكونوا اية على كدة هيكونوا ارهابييب كلهم بلا استثناء .
وبعدين مصر امى وامك وام الدنيا كلها هى بس ولادها شوية منهم نايمين بس هيصحوا قريب طول ما فى مدونين وشباب مدايقين من الى موجود يبقى دة بشرة خير دة معناة ان الناس بدأت تفوق وتحس انها لازم تعترض
فى حرامية كتير ..اه
فى سرقة بالهبل .....اه
كل حاجة غلط موجودة.....اه
بس طالما احنا لسة فينا الروح يبقى لسة فى امل لازم نساعد بعضنا نرجع لدينا نرجع لقلبنا الى اترمى من زمان عشان نقدر نعيشها صح
بجد بجد انا زعلانة لانى كنت فاكرة ان مهما هيحصل هينفضل نحبها بس يبدو انى كنت عايشة فى حلم فيوم هيكون صعب المنال .
وعلى فكرة احنا عايشين بروح الروح الى فينا لسة مماتتش بدليل تكاتف جميع المصريين فى اى ازمة بتحصل فى مصر .
اية يا ابنى لو انت قعدت تقول كدة محدش هيتغير عايز الدنيا كلها تتغير مرة واحدة واللهى ماينفع الا باذن الله طبعا بس انت اهم حاجة غير نفسك خلى هدفك ان مصرنا تبقى احسن .بجد عاهد نفسك ولازم كلنا نتعاهد ان احنا نفعل اقصى ما بوسعنا عشان بكرة يكون احسن والا اية
كم احزننى هذا المقال
مصر امنا كلنا
نيرة احمد محمود

دعاء مواجهات يقول...

الفكرة بتاعت لاجسد بلا روح جامدة ومكن تكون واقعيه اوى

بس حته مصر مش امى وبتاع والكلام اللى عمال تديهولها فى جنابها دة

طبعا مش ذنبها
قوول ناسها بس متجيبش سيرتها

صح ولااا؟؟

تحياتى

Amgad يقول...

انجي
لحد دلوقتي متفقة معايا جميل اوي

Amgad يقول...

ولاء الشملول
لا متقلقيش عليا يا دكتورة
انا مش بتكلم عن قناعاتي الشخصية بقدر مبحاول احلل الموضوع بشكل منطقي وعملي اوي
متفق معاكي في كل اللي قولتيه
برغم ان في ناس تانية بتنجح من غير تعب
وبرده بتلاقي نفس اللذه
ومش بيبقي فارق معاها ازاي نجحت المهم انها نجحت وخلاص وعلي فكرة في ناس بتجتهد ومتنجحش زي المثال اللي زكرته
ميرسي بجد علي تعليقك
وميرسي علي خوفك انتي طبعا اختي الكبيرة
تحياتي

Amgad يقول...

ندا منير
معاكي حق في كم البلاوي
اختلف معاكي البلاوي قديمة اوي
احتمال بداتي تتابعي او تلمسي الاحداث عن قرب من سنتين ولكم من سنتين دي كانت انيل بدليل العبارة ع الاقل
بمناسبة الدويقة
وزعوا الشقق ولكن بعد خراب مالطة
بعد ممات اللي مات وعملوها مقبرة جماعية
طيب كانو فين م الاول والشقق موجوده
انا شفت الاهالي مع حسين عبد الغني وحكوا القصة
بس المشكلة اننا مبنعملش حاجه صح الا بعد الخراب المبين وبعد لما يكون فيه شو
عليها
تحياتي

غير معرف يقول...

في خلال الثلاثين عاما الماضية تعرضت مصر الى حملة منظمة لنشر ثقافة الهزيمة - The Culture of Defeat - بين المصريين, فظهرت أمراض اجتماعية خطيرة عانى ومازال يعانى منها خمسة وتسعون بالمئة من هذا الشعب الكادح . فلقد تحولت مصر تدريجيا الى مجتمع الخمسة بالمئه وعدنا بخطى ثابته الى عصر ماقبل الثورة .. بل أسوء بكثير من مرحلة الاقطاع.
هذه دراسة لمشاكل مصرالرئيسية قد أعددتها وتتناول كل مشاكلنا العامة والمستقاة من الواقع وطبقا للمعلومات المتاحة فى الداخل والخارج وسأنشرها تباعا وهى كالتالى:

1- الانفجار السكانى .. وكيف أنها خدعة فيقولون أننا نتكاثر ولايوجد حل وأنها مشكلة مستعصية عن الحل.
2- مشكلة الدخل القومى .. وكيف يسرقونه ويدعون أن هناك عجزا ولاأمل من خروجنا من مشكلة الديون .
3- مشكلة تعمير مصر والتى يعيش سكانها على 4% من مساحتها.
4 - العدالة الاجتماعية .. وأطفال الشوارع والذين يملكون كل شىء .
5 - ضرورة الاتحاد مع السودان لتوفير الغذاء وحماية الأمن القومى المصرى.
6 - رئيس مصر القادم .. شروطه ومواصفاته حتى ترجع مصر الى عهدها السابق كدولة لها وزن اقليمى عربيا وافريقيا.
ارجو من كل من يقراء هذا ان يزور ( مقالات ثقافة الهزيمة) فى هذا الرابط:

http://www.ouregypt.us/culture/main.html

Walaa Elshamloul يقول...

امجد
سلام عليكم
ادخل عندى هتلاقى مقال جديد
كتبته من عام تقريبا
يهمنى رايك كالمعتاد وبدون مجاملة

Amgad يقول...

ابو شاهين
يا ريت يا بو حميد تكون لسه مماتتش فعلا
وياريت نشوفها بكرة احسن
بالنسبة لمجلس الشوري
اتحداك لو جبتلي فايدة واحده ليه
ولا ايه لازمته في البلد
غير انو يدي حصانة لبتوع الوطني
وشوية انتخابات علي شوية تزوير
وفي الاخر ملوش لازمة
لا وبيفيد ترزية القوانين كمان
تحياتي يا احمووووووود

Amgad يقول...

حمووووووووووودي
انا كمان امي في البيت
وكويس انك معايا
كل سنة وانت طيب يا حبي
تحياتي

Amgad يقول...

ابلتي
ايه كل ده يا ابلة
دانتي طلعتي طهقانة اكتر مني
وحلو اوي موضوع خالتي ده
فكرة برضة
بس موضوع لا هنشوف تقدم وكده
كبير اوي اليقين بيه ده
بس عموما حلو حوار حكومة زبالة ودستور زبالة ونظام زبالة
كبير اوي الكلام ده
تحياتي
تلميذك

Amgad يقول...

انجي كلاكيت تاني مرة
كان نفسي اتنافش معاكي في الموضوع ده
عشان انقلك وجهة نظري
بس عموما هحاول ابسطهالك
اولا انا مش بشتم فيها
انا بقول حقايق ولو انتي شايفة اني غلطان في كلمة واحده قوليها
جايز انا متشائم شوية
بس في مبرر لكده
انتي تعرفي انا شخصيا مستور ماديا
متضربتش في قسم بوليس مخلصتش دراسة وقعدت علي قهوة ممكن اوي اشوف الدنيا وردي بس لوشفتي ماساة الناس اللي ماتلهم ناس في العبارة
ماساة الناس اللي وقعت عليهم البيوت منظر الراجل اللي بيقولك انا مش عارف مكان بيتي واولادي
هتعرفي ان مصر فعلا ماتت وبقت قاسية اوي علي ولادها
موضوع الخلط بين البلد والحكومة
انا شايف ان ده كان ندائي زمان
وبقول دايما منخلطش بين الاتنين
ولكن اهتديت لحقيقة ان الاتنين لا ينفصلوا عندي كلام كتير اوي
ممكن اخليكي تقتنعي بوجهة نظري
وعموما خالص تحياتي
لمرورك ونقاشك انتي عارفة قد ايه بستني تعليقك لاحترامي ليكي وليه

Amgad يقول...

لؤلؤة الاسلام

اتمني تكوني قريتي حاجه
وميكونش التعليق كوبي بيست
تحياتي

Amgad يقول...

قلب ينبض لله
كويس اوي انك حاسة الموضوع
زيي وكمان لمستيه عن قرب
وموضوع البلاهة ده متعلق بغياب الروح اللي تكلمنا عنه
بالنسبة للجمعيات ربنا يوفقهم
رغم ان ليا تحفظات علي بعضها
بالنسبة للتوريث مش مشكلة لما اكون محامي واعلم ابني او اشربه خلاصة فكري
الغلط بقي اني افرضه علي الناس كمحامي
يعني لو والدك مستشار كان خلي ابنه وكيل نيابة وخد مكان واحد يستحقها اكتر منه دي المشكلة
اما في توريث المهنة مفيش مشكلة
المشكلةفي توريث المنصب
اتمني تكوني فهمتي قصدي
خالص تحياتي

Amgad يقول...

اني احبكم في الله
اتمني برده تكوني قريتي البوست
مش كوبي بيست
تحياتي

Amgad يقول...

بنت سيناء
حلوه حكاية مدحت صالح دي
قوليلي ع الكوكب وازاي نروح وانا من ايدك دي لايدك ديكها
هههههههههههههههههه
تحياتي

Amgad يقول...

ايمي بيبي
هي دي المشكلة فعلا
ان الواحد لما يحسبها بقلبه
هيلاقي ان نفسو البلد تبقي حلوة
بس لو حسبها بالعقل هيقولها باي باي
ده كله فعلا بسبب بعدنا عن الدين
مصر اكيد لسه فيها خير واتمني يا ستي
تبعث انا حتي قولت في انتظار كده
اول زيارة ليكي
مش عارف ليه حاسس اني شفتك قبل كده
هههههههههههه
اكيد مش الاخيرة وان شاء الله نتواصل دايما

Amgad يقول...

ميوية
معدش لينا الا الامل فعلا يا مايا
وده اللي احنا عايشين عليه
ولو فقدناه هتبقي حياتنا من غير معني
ومن غير هدف وملهاش لازمة
بس مش لازم نعيش بس ع الامل
تحياتي

Amgad يقول...

هنجر
هههههههههههههه
الله يرحمها ويحسن اليه
تحياتي

Amgad يقول...

كلام وخلاص
فكرتيني بالاغنية بتاعة زمان يعني ايه كلمة وطن
المشاكل اللي انتي عرضتيها دي منطقية اوي
ولكن الحاكم مش كل حاجه والتغيير السياسي برده مش كل حاجه
الشعب كله بياكل في بعضه والناس بتسرق كل حاجه ومش منهوب في الليلة دي غير الطبقة المطحونة بس زي مقولتلك
يعني مش الشعب كله بريء وغلبان وطيب وحسني هو اللي منيلها
اوكي بس مين دلوقتي يبقي الامام الغزالي دي ناس كان عندها روح وكانت بتخاف ربنا
جميل اوي الموقف ده
وعلي فكرة بيعبر عن الف حاجه وبجد موقف رائع وميرسي عليه
اللي هو مفيش مباديء اللي هو زي انا ضد السجائر واتمني تتمنع من البلد بس طول مهي موجوده هشربها
ميرسي بجد بجد علي الموقف وشكرا اكتر علي القيم المكتسبة منه
تفضيل الواقعية الكاملة على الاستسلام للشعارات المجردة، وبمعنى الاعتراف بأن قدرة المرء منا على أن يحدث بعمله المنفرد تغييرا مهما في النظام السائد قدرة محدودة جدا، وأنه قد تكون من الحماقة أن يضحي المرء بنفسه، أو بمصالح شخصية مهمة له أو لأسرته، في سبيل التمسك بمبدأ عام لا توجد أمامه فرصة جدية للتحقق في المدى المنظور.))
وميرسي اولا واخيرا علي مرور شخص مثقف زيك هنا
واتمني نتواصل علي طوووووووووووول

Amgad يقول...

سااااااااااارة ماي فيت
قولنا سارة اهه عشان متزعليش
لازم يكون عندنا امل حتي لو كان في خيالنا بس عشان نقدر نعيش
وعشان يبقي للحياة معني ولازمة
اكيد ربنا موجود وبالمناسبة المشكلة مش كلها مشكلة حاكم
المشكلة فينا برده
وازاي الغني ميكولش الفقير وازاي منورثش حياتنا للي ميستاهلهاش
تحياتي يا سااااااااارة

Amgad يقول...

حنين
مش عارفه اى حاجه بتحصل, قصدى اى كا رثه بقت تحصل احط ايدى على قلبى واقول
يا ترى الكا رثه اللى جايه هيبقى شكلها ايه
تعرف احنا بقين مستعدين نفسيا للكواراث من كتير الكوارث
تو ماتيكى تو ما تيكى يعنى
لا فض فوكي يا بنتي
ابصم علي كلامك ده بالعشرة
بجد جبتي من الاخر
خالص خالص تحياتي

Amgad يقول...

صبرني يا رب
ايوة يا اختي الفاضلة
اتمني يكون كلامك ده صح
علي فكرة اجاباتك كلها متفقة تماما مع اجاباتي ولنفس السبب شوفيها كده
بس هتلاقيكي مجاوباها بطريقة تانية
اما بخصوص احنا ليه اصلا بقينا كده
فده لغياب الروح ليه بقي الروح غايبة
فهي للسبب اللي انتي قولتيه
يعني انتي متفقة معايا تماما
اكيد لسه في ناس نضيفة بس للاسف دول بقوا شواذ القاعده معدوش القاعده
اطالة ايه بس دي مدونتك
اما بخصوص الرز فلو اتحرق انا عازمك
مدام كنتي بتعلقي بس تجيبي اللي يثبت كده
وانا بكرة هفطر في المنصورة الحقي اثبتي دلوقتي
خالص تحياتي ويارب نتواصل دايما

Amgad يقول...

كناري
هههههههههههههههههههه
لا فض فوكي يا بنتي
معاكي حق بس لما الواحد بيبقي ملامس الوضع غير لما يقراه في كتب التاريخ
معاكي حق تماما
تعليقك بيسعدني ويارب دايما
خالص تحياتي

Amgad يقول...

نيرة احمد محمود
اسمحيلي انا يا نيرة اقولك ان انا شفت الاهالي دول مع حسين عبد الغني وحكوا الحكاية وقالو متوزعتش علينا واتوزعت
جايز اتوزعت عليهم بعد كده بس بعد خراب مالطة
لا صدقيني انا مش محتاج اندم لاني مقتنع تماما ان مفيش حاجه انا زكرتها غلط انا شايف ان كل دي حقايق حصلت اما رايي فده اقتناع شخصي مني وزي مقولتلك انا في انتظار البعث
علي فكرة انا زي مقولت في تعليق قبل كده انا متأذتش من حاجه بس انتي لو والدك لا قدر الله كان غرق في العبارة ولا لو ليكي خال برده لا قدر الله كان وقع عليه الجبل في الدويقة كنتي حسيتي باوجاع الناس دي
الموضوع اللي هو ازاي نحس باوجاع الناس عشان لو حصلنا كده مش احنا بس اللي نتوجع
اكيد لازم يكون في امل عشان كده انا قولت في انتظار البعث وهو ده الشيء اللي احنا عايشين عشانه مهما حصل
مصريين ايه اللي بيتكاتفو بس انتي بتضحكي عليا ولا بتصدقي نفسك
اكيد الحل اللي قدامنا ان كل واحد يعمل اللي ربنا يقدرو عليه
ولكن تقولي لمين ومين يعمل الروح انفصلت فعلا عن الجسد
خالص تحياتي
ومتعرفيش انا قد ايه مبسوط لسببين
ان في ناس بره البلوجرز بيتابعوني وبالذات لو حد مثقف زيك
ثانيا ان في حد بيقولي انت غلط وبيختلف معايا ودي اكتر حاجه بتسعدني
خالص تحياتي ويا رب اشوفك تاني

Amgad يقول...

دعاء مواجهات

قوول ناسها بس متجيبش سيرتها

ههههههههههههههههه
دا الظاهر انتي مقتنعه انها امك فعلا
عموما يا ستي ربنا يخليهالك
وياب متكونش ماتت فعلا
خالص تحياتي

FreeKiller يقول...

عندك حق ف كل كلمة


على راي بتوع الدالي
اللهم اضرب الظالمين بالظالمين

بهنيك عالمدونة
انا شايفه انها ممتازة

FreeKiller يقول...

ا

Desert cat يقول...

الام مش ليها دعوة بكل اللى قصيته ده يا امجد
دى ست غلبانة مغلوبة على امرها
اعى لها ربنا ينجيها من الراجل اللى كاسر نفسها وذالل ولادها

مدونة خلي الدماغ صاحي يقول...

مصر هي امي
وفرنسا ام اللمبي

الشريف / جمال طة يقول...

نصاب الشقق التمليك بالمعادى / محافظة القاهرة
الـــــى السيد المستشار / النائب العام
الى السيد اللواء / حبيب العادلى وزير الداخلية
الى السيد اللواء / أحمد جمال الدين
مساعد وزير الداخلية مدير ادارة تنفيذ ألأحكام
الى السيد اللواء / مدير مباحث أمن الدولة
الى السيد اللواء/ مدير مباحث ألأموال العامة

مطلـــــــــوب القبــــــض
علـــــى نصاب عائلـة الزينــــى

نصاب الشقق التمليك بزهراء المعادى / بالمعادى / بمحافظة القاهرة

المهندس / ايهاب فراج محمد ابراهيم الزينى

وهذا النصاب تم تأييد الحكم علية بالسجن فــى القضية رقم 9443 لسنة 2007 م جلسة 11/4 /2007 م وهـذا النصاب صادرا ضدة اكثر من سبعون حكما قضائيا

وعنوان سكنه وعنوان الشركة

شركة الزينى للتعمير 56 طريق مصرحلوان الزراعى / برج بدر أمام فندق المعادى
بطاقة رقم 27003211203839و النصاب يتنقل بين
مدينة 6 أكتوبر بمحافظة الجيزه

و مدينة المنصورة بمحافظة الدقهلية

ومركز بشبيش بطنطا بمحاظة الغربية

واليكم على سبيل المثال لا الحصر بعضا من القضايا المحكوم فيها على هذا النصاببالسجن وهــــى :ــ
ـقضية رقم 5124 لسنة 2007 م ثلاث سنوات جلسة 6/12/2007م
قضية رقم 4075 لسنة 2007م جلسة 3/12/2007 م
قضيه رقم 4073 لسنة 2007م جلسة 3/12/2007م
قضية رقم 28965 لسنة 2006 م جلسة 5/11/2007م
قضية رقم 32112 لسنة 2004 م جلسة 29/7/2007م
قضية رقم 13421 لسنة 2003م سنه حضورى جلسة 12/3/2005و

قضية رقم 5977 لسنة 2008حصر رقم 3316 لسنة 8002 ( ستة أشهر حبس ) بتاريخ 25/6/2008
قضية رقم 6098 لسنة 2008 حصر رقم 2906لسنة 2008 شهرين حبس بتاريخ 4/6/ 2008
قضية رقم 5978 لسنة 2008 حصر رقم 3039 لسنة 2008 / حبس 6 أشهر سجن بتاريخ 11/6/2008

قضيه رقم 6099لسنة 2008م حصر 2947لسنة 2008 ستة أشهر سجن جلسة 5/6/ 2008

قضية رقم 10030 لسنة 2008 حصر برقم 5979 لسنة 2008 سنــــــــــــــــة سجن جلسة 3/7/2008

بالاضافة الــــــى أربعة عشر حكما صدرت ضده باحكام بالحبس شهرا لسرقته التيار الكهربائى بعمارات الرقابة ألأدارية بالبساتين رقم 13 و 23



وماخفــــــــى كان أعظم

Appyplanet يقول...

ما هو احنا السبب باللى بنعمله فى بعض واديك شايف
بقى كمان داخل معجب بافكاره وبتديله فكره انه يسرق مواضعاتى والله احنا شعب هايل

engy يقول...

للاسف انت صح
للاسف كرهونا فيها على قد مايقدروا
سلبوا منا الانتماء والكرامه والوطنيه
بقينا فعلابنفرح فيها ولا كانها مش بلادنا
زى مابنفرح فى اسرائيل بالظبط
هؤلاء الساده الافاضل بيتعاملوا معانا وكاننا اعدائهم
وليس كاننا منهم واننا فى بلد واحده
بس صدقنى احنا لازم نحبها وبالعند فيهم
ربنا معانا

Appyplanet يقول...

لو عاوز تمسح امسحه انت بايدك انا عمري ما بمسح تعليقات حد خالص انا بس بوضح لك انك اديته فكره فهمت

hor.aljana يقول...

أخي الفاضل المشكله مش في البلد المشكله في الشعب
مصر أم الدنيا وموجوده في القرءان إلى يوم الدين وحتفضل غاليه على قلوب كل البشر لكن الله المستعان على الذي بيده تسيير أو تعسير الأمور بالبلد
أدعوا الله أن يديم عليكم الخير والبركه
كل سنه وإنت طيب
رمضان كريم والله أكرم..

prince4ever يقول...

سلام عليكم يا أمجد
انا اسف جدا يا باشا والله مكنتش اعرف انك هتزعل
و يا سيدي حقك عليا بس يمكن انا اكون فهمت تعليقك غلط بس والله انت زيارتك على راسي من فوق وتعليقك كمان
اما بالنسبه لانك ضيفي و مينفعش احكم من غير ادله فاحب اقولك انك مش ضيفي ولا حاجه يا باشا انت صاحب مكان
اعذرني يا صاحبي
بالحق..ايه بقى سبب الههههههه
تحياتي يا برنس

norahaty يقول...

السلام عليكم ورحمة الله وبركاته
العيب فينا يابشمهندس
البلد زى مابيقولوا بناسها
واحنا المصريين اللى اتغيرنا
اخدنا من الغرب كل المساوىء
(لانها الاسهل فى التقليد)
ولم ناخذ منه المحاسن
وبرضه زى ما بسأل دايمآ
ماذا بعد النقد لكل شىء؟
هل عندك خط وخطة واضحة للتغير؟

Amgad يقول...

فري كيلر
اللهم امين
ميرسي علي مجاملتك
تحياتي

Amgad يقول...

ديسرت كات
يارب يا ستي
بس المشلكة ان الراجل ده متحكم في الام
وجزء منها يعني هي قاسية بيه
وزي مقالت هند صبري مصر بقت قاسية اوي علي اولادها
يعني مش انا بس اللي بقول
تحياتي يا حنان

Amgad يقول...

خلي الدماع صاحي
كركركركر

Amgad يقول...

الشريف جمال طه
ربنا ينصرك علي من ظلمك
وترجع كل حقوقك امين يا رب

Amgad يقول...

رحاب ابي
ايه رايك اي خدمة يا ستي
اما بخصوص اننا شعب هايل
فانا معاكي في دي
انا عارف ان تعليقي غلط
بس انا دماغي كده
لما بعجب بحاجه حتي لو غلط
بعترف باعجابي بيها والامثلة كتير ابقي اقولك عليها في الف حاجه
اما بخصوص التعليق فانا جتلته بايديا دول
عشان متلوثيش ايدك بدمائه
تحياتي يا رحاب

Amgad يقول...

انجي اللي بالجي
لا فض فوكي يا بنتي كاني انا اللي بقول كلامك ده
بجد اتكملتي وقولتي اللي عايز اقوله
ومتفقين سوا تماما حتي في الحب بالعند
تحياتي يا انجي وكيب ان تاتش بقي

Amgad يقول...

حور الجنة
اولا نايس نيم
ثانيا انتي متفقة مع اغلب التعليقات
ان مصر ملهاش دعوة والشعب والحكام هما المسئولين
امال مصر دي ايه طيب مهي
ارض وبلد وشعب وحكومة وحاجات كتير
تحياتي لمرورك

Amgad يقول...

برنس فور ايفر
يا حبيبي انا مش زعلان والموضوع سوء تفاهم
وانا فعلا لما قريت تعليقي تاني
حسيت انو يتفهم منه كده اوي
متزعلش انت
وموضوع الههههههههههههههههه
هقولك عليه بيني وبينك
تحياتي

Amgad يقول...

دكتورة نور
معاكي حق في موضوع التقليد
اما بالنسبة للنقد انا مش بنقد
انا مجرد بعرض حقايق وصعبان عليا حالنا زيك كده
بمناسبة خطط التغيير
تفتكري انا بايدي ايه ولو عندي خطة
وهتخلينا اعظم دولة في العالم
تفتكري ممكن توصل لاي مدي
وكما قال نزار وغناها حليم
فطريقك مسدود مسدود مسدود
تحياتي يا دوك

dina seliman يقول...

امجد
زيارتك فى مكتوب اسعدتنى جدااا
وبجد انا اعترف اعتراف كامل بتقصيرى الشدييد فى المتابعه
وكلى امل انك تقبل اعتذارى
ويارب تكون بخير دايمااا
وادعيلى موجه الكسل دى تروح منى

************
عاوزه امسك المتأخر عليا واحد واحد
واقراه باستمخاخ
والى لقاء فى التوبيكات

طيوبة القلب يقول...

هوكدا

محدش فاهم حاجة

The Aorta يقول...

كلام رائع وواقع مرير يمكن حتى كلمة مرير دى قليلة عليه لكن هو ده الواقع اللى احنا كلنا عايشينه
جايز الجيل القديم عندنا مات من زمان يعنى جدى وجدك ومن بعديهم والدى والدك لكن انا وانت لسه عايشين ولسه الأمل موجود لازم نعيش بالأمل
الأمل فى التغيير الأمل ان مصر تبقى أحسن بلد فى العالم الأمل ان احنا فى يوم هنقف نحيي العلم واحنا فخورين
الأمل ان اروح أى مكان فى العالم وأفتخر انى مصرى
انا عارف ان الواقع صادم بل مش بس كده ده منيل وسئ لدرجة لا توصف لكن الحل ان احنا نترحم على البلد وخلاص ولا نتحلاك وان شاء الله نوصل
لازم نحلم ولازم نتحرك
على فكرة انك عملت مدونة وكتبت ده حركة لازم فى حد هيقرأويتحرك كويس جدا انك تعبر كويس جدا انك تخرج اللى جواك وان شاء الله تلاقى شباب متفقين معاك فكريا وعاطفيا ونفسهم يصلحوا بلدهم ونفسهم يتحركوا
انا نفسى اعمل حاجة لبلدى و انت كمان طب ما كلنا مع بعض احنا شباب نفكر ونطلع كل اللى عندنا احنا مشكلتنا اننا بطلنا نفكر رغم ان احنا عندنا عقول رهيبة
هأديك مثال صغير : كنا فى يوم بنفكر ننزل مجله فى الكلية وكنا محددين ورقتين A4 كحد أقصى وكنا حاسين ان اللى عندنا من أفكار مش هيكفى لكن لما قعدت أنا وكام واحد من زمايلى طلعنا كمية أفكار تنزل مجلد مش بس مجلة
اللى انا أقصده ان الشباب لو فكرو بس هيطلعوا أفكار رهيبة طب يلا نفكر ونشتغل مع بعض

أنا عارف ان الطريق صعب وطويل بس خد بالك من حاجة ان أنا وانت والجيل بتاعنا قدامنا 50 سنة فمينفعش نعيش مهزومين 50 سنة
لازم نستحمل لازم نفكر لازم نشتغل وان شاء الله التغيير على ايدينا وان شاء الله ربنا يمد فى أعمارنا ونشوف مصر بلدنا جنة وبلاش ننسى وعد الله سبحانه وتعالى لينا فى سورة يوسف "حتى إذا استيأس الرسل وظنوا أنهم قد كذبوا جاءهم نصرنا فنجى من نشاء ولا يرد بأسنا عن القوم الظالمين"

سارة بندارى يقول...

فعلا بقت وحشة أوى

ومليانة فساد

وظلم

وقهر

واستبداد

وبقت مقرفة كمان

بس مهما كانت

هنفضل نحبها

وهنحاول نصلحها لآخر نفس فى عمرنا

وهنفدى لأجلها أنفسنا

وهنستحمل عشان تكون كويسة

دمتم بود

lyssandra يقول...

إيه بس يا عم أمجد اللي مزعلك بقي ؟؟

أنا شفت تعليقك الأخير عندي ورديت عليه وجايه بسرعه أحل سوء التفاهم

ابقي عدي بقي وشوف الرد

بس أكيد انت كنت فاهم غلط

تحياتي لك

lyssandra

دعاء على يقول...

أقولك حاجه ؟!
احنا شكلنا كده محتاجين طوفان زى بتاع سيدنا نوح و كل حاجه تغرق و كل الناس تغرق و نخلص بقه ...
ما هو أكيد مفيش حاجه هتتغير غير بكده و لو حد فضل يبقى يبتدى على نضافه و يجرب يعمل المدينه الفاضله ...
سلامو عليكوا (:

Do not Press F1 يقول...

السلام عليكم
اولا ازيك يا معلم وليك وحشة .
الله يرحم امى وامك ومصر بس مش تعرف والنبى الاربعين بتاعها امتى؟.


عارف يا امجد رغم الحزن فان شر البلية ما يضحك بجد وانا بقرا البوست بتاعك دا قولت لامتى هنفضل كدا هو عشان احنا مصريين يعنى هيفضل مكتوب علينا اننا نعيش بالطريقة المهينة دى.

انت بتقول ازاى الواحد بيعيش فى مصر
احنا فى مصر بناكل من جيوب بعض كل واحد حاطت ايده ف جيب التانى
بالنسبة للرشوة انا وبابا مرة اتناقشنا فى حوار الرشوة اللى انتشر دا وصلنا لحل اخير طالما لادين نافع ولا رقابة نافعة قولنا ايه المانع ان الرشوة تبقى محددة بمعنى يبقى عمولة محددة فى المصالح الحكومية يمكن الحل دا يخفف من قيمة الرشوة او يخلى الموظفين يشتغلوا بزمة شوية.

وبالنسبة لموضوع التوريث فى كل حاجة فبص انا وبقرا الحتة دى افتكرت فيلم بتاع بلال فضل الاخير بتاع خارج عن القانون لما كان بيتكلم عن ان ابن الدكتور لازم يطلع دكتور وابن الحرامى لازم يطلع حرامى اينعم انا مش شوفت الفيلم بس قريت عنه كدا هو فعلا الحكاية بقت كدا.

وفى الاخر كدا دورلك على ام تانية تتبناك ولو لقيت ابقى اعمل حسابى معاك.
سلاموز.

بنت سيناء.. يقول...

امجد
اية؟؟وينك؟؟زمان ما نزلت بوست جديد؟؟
عساك بخير؟


انام كيف حطيت الريدر فى مدونتك؟
كدة احسن انك بتابع اخر مواضيع الاصدقاء

كل سنة وانت طيب

Amgad يقول...

دينا
كل ده مش مهم
المهم انك لسه بخير
واكيد علاقتنا اكبر من التعليق علي بوستات
تحياتي

Amgad يقول...

طيوبة القلب
مرحب باهل السعودية
وكويس انك معايا في الشعار

Amgad يقول...

اورطي
بجد يا دكتور متشكر اوي علي تعليقك وعلي رايك
وانا معاك تماما في كل اللي قولته
وعلي فكرة انا مش يائس او كده
ده مجرد نقد وعرض قسوة البلد علينا
تحياتي واتمني نتواصل دايما

Amgad يقول...

ليساندرا
ابسولتلي انا مش زعلان خالص
وانا رديت عليكي
تحياتي

Amgad يقول...

دعاء علي
عجبني اوي تعليقك بجد
ربنا يبعت يا ستي
وياخد المؤمنين والصالحين بس
في السفينة مع المبعوث
ولكن تفتكري هنبقي في انهي جانب
اللهم انجينا
تعليقك عجبني اوي بجد
خالص تحياتي

Amgad يقول...

امنية
اولا حمد الله علي سلامتك
ثانيا انا قولت برده
اكيد مفيش حد هيبقي متفق معايا
فكريا زي امنية وقد كان
متعرفيش يا امنية لما بشوف اسمك
بعد الغيبة دي ببقي عامل ازاي
لا وكمان بكل التوافق ده في الراي
بجد انتي اللي واحشاني اوي
ولما اشوف الام التانية هبقي اقولك عليها
خالص خالص تحياتي

Amgad يقول...

بنت سيناء
ميرسي بجد علي سؤالك واحساسك بغيابي
انا عايش في الدنيا الحمد لله
اهه بس فيه ظروف خارجه عن ارادتي
اعزريني
وتقبلي خالص تحياتي وتقديري

Amgad يقول...

سارة بنداري
اسمحيلي احييكي تماما علي اللي بتقوليه
وانتي عارفة قد ايه انا بحترم تفكيرك
ومنهجك في الحياة
واللي قولتيه قريب اوي من سيكولوجيتي
وان كان اتنقل بشكل خاطيء
تحياتي