الجمعة، 24 أكتوبر 2008

عن التحرش احدثكم وعن ال Sexual repression


مبدئيا كده انا عارف اني طولت اوي من البوست اللي فات
بس بجد كانت لظروف مش بمزاجي غير كده زي مبعضكوا عرف كان عندي تسمم وكانت حالتي حاله
ومتعلقلي محاليل وبلاوي ولما فوقت لقيت الحاجه في الكلية متراكمةعلي اكتر من بلاوي الحزب الوطني مهي متراكمة علي البلد.
فلسه يادوب واخد نفسي وبقول بسم الله
وعارف اني بقالي مده مقصر مع الكل ومقصر مع نفسي لان في حاجات كنت بهتم بقرايتها وبجد انا مفتقدها لحد دلوقتي
ومستني اي فرصة اشم نفسي واعوض كل اللي فات ....صدعتكوا انا ندخل في البوست بقي
عن التحرش احدثكم وعن ال Sexual repression
تابعت مؤخرا ما حدث بخصوص السواق اللي اتحرش باحدي البنات في الشارع
والحكم الغير متوقع تماما تلت سنين سجن مشدد مع الغرامة .
وشايف في الحكم ده بادرة أمل ان ممكن المشلكة دي مش هقول تنتهي تماما ولكن علي الاقل تبقي محدوده نسبيا
تابعت المشكلة من خلال الاخبار وشوفت نهي رشدي نفسها في العاشرة مساءا وهي بتحكي
طبعا القصة للي ميعرفهاش باختصار شديد ان في سواق شافها هي وواحده صاحبتها مروحين بليل قال صيده وزنق عليها بالعربية وتحسس مناطق في جسمها هي بتقول احست بالاهانة وتتبعته وفضلت تجري ورا العربية لحد مالعربية وقفت حاولت تفتح الباب وتصرخ مفيش فايده طلعت فوق الكبوت السواق وقعها الناس ابتدت تتلم خلاص يا ابلة هنضربة وبتاع معجبهاش واصرت تاخده علي النقطة في ناس ساعدوها وبلغوا لنقطة واتيفر اللي حصل وان محدش في النقطة رضي يساعدها المهم اخدتوا علي القسم واتعمل محضر جه ابوها الظباط نصحوه هتسوء سمعة بنتك وبتاع المهم طلع راجل متحضر واتصرف بشكل صح ومستسلمش ودور علي حق بنته ورجعلها كرامتها
الملفت في الموضوع بقي كذا جزئية
الجزئية الاولي وهي بتتكلم بتقول لما لقيته بيزنق عليا وبيتحسس جسمي وبيضحك مني ضحكة سخرية حسيت بالاهانة والقهر
وقولت لا مش هينفع اقول المرادي غصب عنه
بجد متعرفوش الكلمة دي اثرت فيا اد ايه وتألمت لألمها في اللحظة دي
وازاي اي بنت بتتعرض للتحرش وهي عارفة انو مقصود بتحاول تقنع نفسها ان الشخص ده ميقصدش عشان تقدر تعيش
لان فعلا الحاجة اللي ممكن تدمر الانسان هي احساسة بالقهر فما بالك انا شخص خريج ايه يو سي
وده واحد غير مصنف كبني ادم اساسا وييجي يقهرني ويسخر مني
ازاي الانسان يقدر يعيش اساسا بعد حاجه زي كده
اتاثرت اوي لما لقيتها بتقول انا حسيت اني بنكسر في اللحظة دي حسيت انو بيدوس علي آدميتي
حسيت وقتها باي بنت ممكن تتعرض لكده وايه شعورها كل لما تفتكر اللي حصل ليها لا لشيء سوي اننا عايشين في مجتمع
متخلف ناس كتير فيه بتفكر باعضائها الملتهبة.
محامي السواق في دفاعة قال ان البنات كانو لابسين لبس مغري وماشيين يتقصعوا علي حد ذكره
وده اداله الحق في لحظة هياج انو يتحرش بيهم
هي قالت انها كانت لابسه عادي خالص وكمان صاحبتها كانت لابسه فانلة رونالدينيو( بتفهم والله ههههههههههه)
يعني لبس ملوش دعوة بالانوثة وانا كانسان ليبرالي شايف انها انشالله تنزل عريانة خالص هي حرة
ده ميديلوش الحق في انويتحرش بيها او حتي يعاكسها وهنا عايزا قول رايي في الجزئية دي
في فرق بين واحده نازلة الشارع ولابسه لبس معين عشان هي حابه تلبس كده سواء رونالدينيو او حتي ابو تريكة هي حره ربنا بس رقيب عليها وفي واحده نازلة لابسه لبس بغرض الاثارة هي مش حابة تلبس كده بس نازلة عشان تتعاكس ممكن نفرق بين الاتنين بسهولة اوي وملناش حق في التحرش باحداهما دي وجهة نظري (بس ممكن نبقي نعاكس التانية ههههههههه)
كمان ليا كومنت علي اللي حصل في القسم لما الناس نصحوا ابوها وقالوله انت كده بتسوء سمعة بنتك
هنرقعهولك علقة ويادار مدخلك شر
طبعا في ناس كتير اوي بيحصلهم كده وياما بيحصل كده وبتنتهي المشكلة ان اللي بيتحرش بياكل علقة وينتهي الموضوع
طيب فين نفسية البنت اللي حصلها كده وفين ادميتها وفين كرامتها قدام نفسها لما شخص اقل منها يدوس علي كرامتها
انا شايف ان اللي حصل ده رد ليها كرامتها وانا شخصيا لو مرتبط بواحده زي نهي وحصلها كده هيزيد تمسكي بيها وهحبها اكتر ومتهيالي اي شخص بيفكر صح هتبقي دي وجهة نظرة
(للصدفة البحتة قبل متفرج علي نهي في العاشرة كنت بتفرج علي برنامج مش فاكر علي قناة ايه بيقول هل تقبل الزواج
من فتاة مغتصبة انا ملقيتش رد علي السؤال ده جوايا سالت امي قولتيلها ايه رايك قالتلي في ايه
قولتلها لو يوم واحد فينا حب يتجوز واحده كده قالتلي لا قولتلها ليه طيب دي غلبانة ومنكسرة وملهاش ذنب قالتلي واحنا كمان ملناش ذنب)
طبعا تفكير امي كتفكير اي شخص مش بيفكر في الناس دي كضحايا زي مهو شايفهم ناس اصبحوا غير ملائمين
وهي ليها العزر طبعا دي ثقافة مجتمع بشكل عام وعموما الاغتصاب غير التحرش وهي غيرت رايها لما اتفرجت معايا علي نهي
يعني واحده متحرش بيها ماشي بس مغتصبه لا وده انا بعتبره ايجابي كمقياس لنظرة المجتمع
اللي البعض اتصل بيها وقالها انا بحملك نسبة من اللي حصلك
واللي البعض قال عليها مجنونة وبتشهر بنفسها
طبعا لو هي مجنونة فانا معاها في جنانها ومعاها انها دورت علي حقها في بلد كلنا فيه بننضرب علي قفانا وبنسكت مش لازم معركتنا تكون مع الحكومة ممكن اوي معركتنا تكون مع ظروف المجتمع ومع المجتمع نفسه
وقد تكون اصعب من معركة مع الحكومة من اجل وضع اقصادي
وقد تكون المعركة مع الحكومة نفسها ولكن بشكل غير مباشر لما سواق في لحظة هياج شافها صيدة زي مقولت واعتبر انها عشان انثي لازم تكون منكسرة وملهاش حق
السائق ده انا بحملة المسئولية بنسبة تسعين في المية والعشرة في المية بحملهم للمجتمع اللي احنا عايشينه لان السواق غير انو جاني فهو مجني عليه مش بعفية من المسئولية ولكن اكيد لو هو عايش في وضع احسن من اللي هو فيه ومتجوز وحياته فل مكنش هيحتاج يورط نفسه مقابل لحظات قليلة من المتعة الزائفة.
وبتمني ان ده يكون درس لكل شخص تسول ليه نفسه انو يتعدي علي حرية شخص تاني
حتي لو الشخص التاني ده ماشي يتقصع
وختاما بقول لنهي ولكل بنت زي نهي جميل انك تدوري علي حقك وانا لو لي اخت وحصلها كده هساندها في حاجه زي دي انشالله كل مصر تعرف اللي حصلها وحتي لو المجتمع شايف اني غلط
لان لو كده محصلش واختارنا الاسهل وهو اننا ندفن راسنا في الرمال ونكتم علي الموضوع
نفسية البنت ممكن تنهار مع عدم احساسها بالامان في بلدها وممكن تنتهي اي معاني جميلة جواها من غير منحس كالحب والايمان بالقيم وينتهي دورها كامل لما تتجوز وتصبح في الحياة كما لو كانت موظفة بتأدي دور بدون اي احاسيس او عواطف وتبتدي الكارثة وهي الانهيار التام
الموقف ده بيربطني بحوار مع صديقة من النمسا بتقضي اغلب الصيف في مصر
لما كانت بتحكيلي عن التحرش اللي بتقابله في البلد بتقولي ان مصربتعيش حالة من ال
Sexual repression
وحكتلي العديد من المواقف من شخص كانت تعرفه عن طريق النت
ولما قابلته قالها i wish to kiss you now وردها عليه try and you will die
and he said ok then let us marry just 3 month
وقالتلي بالعربي يعني هوا عايز ايه هو فاكرني (sharmota )
وموقف تاني مع سواق تاكسي
and when arrive home
i got a call so was concentrate with call and i give him money and he speak to me so i concentrate with call and not got him what he say to me when i look he was open his pantolon and show me .... i told him hemshy ya khawal he said ok and drive fast
حاولت اشرحلها الردود اللي ممكن تعملها في اللحظة دي وايه اللي ممكن تقوله بدل كاوال بتاعتها
قولتلها ممكن تقولي الحقوني او حاجه زي كده ردت عليا قالتلي انا قولتله فاك يور سيلف يا (كلمة تقال للشخص اللي معندوش حمية علي اهله) وعلي فكرة قالت كل ده بالعربي بس انا قايلة انجلش عشان اخف حده
ونزلت لقيت بوليس مان قولتله علي اللي حصل لقيته بيضحك قولتله (ياكاول تاني)
وبتقول انو كمل ضحك وقال ايه المزةالهبلة دي ردت نفس الرد وسابته
موقف تاني
and i was wear in village hejab and galabeja and even with that he told me ya mooza
ya mozza 7ata belgalabya
موقف تاني بتقول راكبة عجلة واربعة ولد راكبين عربية في المعمورة جه وقفها
وقالها ممكن اخد لفة وبتسالني يعني هو عايز ايه وطبعا كان ردها يا كلب يا كاوال والرد التاني بتاع سواق التاكسي

دي بعض المواقف هو كان في اكتر قالتهولي بس الشوية دول اللي كانوا عا لميل فلسه فاكرهم الباقي كان كلام
وهي الانجلش بتاعها بايظ اساسا والعربي مكسر فمش فاكر او مفهمتش اغلبهم

المواقف اغلبها مضحك وينطبق عليه شر البلية مايضحك
ولكن اللي استفدته من الموضوع ده التعبير اللي قالتلي عليه وهو
Sexual repression
واحط تحته خمسن خط
هل احنا فعلا عايشين كبت حنسي بالطريقة الموحشة دي وهل هو ده السبب في التحرش دايما وايه الحل لكده
وهل مصر بس اللي فيها الكبت ده وهل التحرش فيه حل لكده
موضوع طويل اوي عايز بوست تاني


هناك 15 تعليقًا:

عاقلة علي ارض الجنون يقول...

دبوس الطرحه .. الكاتر .. المقص .. سبراي في الصيدليات ..

دي وسائل بدائيه للهروب أو يمكن للحمايه المبدئيه

كليبات .. أفلام .. أفكار .. خيال .. أماني وهميه

حيوانات بشريه ..

كل ده يعمل تحرش جنسي

و الشجاعه و القوة و الإصرار .. و التحدي .. يعمل أكتر من نهي ..

انا يمكن لو مكان نهي معرفش كان يبقي إيه تصرفي .. بس الاكيد كان هيبقي نفس الإحساس .. أما التصرف .. مش عارفه بكل صراحه يمكن لأن مجتمعنا إتعود يقبل العوض من ربنا و ميطلبوش من حد ؟؟

بس لأن ده مش عوض .. ده حق .. و الحق عشان أقوي .. أكيد كان ممكن أعمل أكتر من اللي عملته نهي ..

أما بالنسبه للسلبيين اللي كانوا ف الموقف .. مش عارفه أنا بحتقر أفعالهم .. و ف نفس الوقت مشفقه عليهم .. اللي يتهاون في حقوقه الضروريه للحياه زي الأسعار و الماهيات و يفضلوا يتهاونوا و يتهاونوا لحد ما يبقي الشرف كمان بيتهاونوا فيه .. لحد ما تبقي مفيش بنت ف مصر محصلهاش علي الأقل حادثة تحرش واحده و التحرش للأسف زي ما قالت محاميه من هيئة الدفاع عن نهي مش موجود ف قانون العقوبات أي ذكر للفظ ده اطلاقا ..
و أقدر أحلفلك كمان ان مفيش حتي من أول المنقبات لحد اللي بتلبس ما يظهر أكثر ما يخفي .. إلا و تم التحرش بيها .. و مش شرط التحرش يبقي باللمس ممكن تبقي كلمة

و الانكسار اللي بتحسه أي بنت من حتي الكلمه دي لا يوصف لأن بينظر ليها علي إنها جسد للمتعه فقط .. و نظره مهينه جدا جدا .. من حيوان لا يملك في عقله سوي ذكورته المبتوره ..

أنا لا ألتمس اي اعذار للمتحرشين مطلقا .. لو إيه .. لو بيموت .. أعتقد ربنا قال .. غض البصر .. و قال يتجوزوا و لو ميقدروش يتجوزوا .. يصوموا عمري ما لقيت واحد صايم و أساله انت صايم ليه و يقوللي انا أصلي مش قادر علي الجواز ..

النظره الوقحه للأثني كلوح من الثلج يطفيء نيران الشهوة الحيوانيه .. لدي المتحرش ولو حتي بنظره .. لا تعطيني حق معاملته كبقية البشر ..

مجتمعنا مجتمع لا يؤمن بأي شيء حتي الشرف .. لا يؤمنون به .. كل شيء مجرد لافتات .. شعارات .. ربما بعض الأقاويل أو بعض الكلمات علي طاولات المقاهي و لكن .. الشرف الحقيقي .. ليس له وجود .. فالرجل الذي يري مشهد مثل ما حدث لنهي و لغيرها و يسكت و يحاول أن يبرر فعلة أحد الحيوانات فهو لا يقل عنه بل يزيد فقد كان في يده منع كارثه و لكنه لم يعترض .. ضعفاء و جبناء .. و لا يرتقوا حتي لمرتبة الحيوانات ..

دول ناس يقرفوا من المثليين و حتي متعافي المثلية .. و يشمئزوا منهم و يتباهوا بفحولتهم الذكريه و بتجاربهم في فض العذريه أو عدد اللواتي نمن معهم في ليالي حمراء .. أو عدد اللواتي ضحكوا لهم كالضحكة التي ضحكها هذا الحيوان لنهي .. ضحكة منتصر .. فمن اعطاه الانتصار سوي إنهزامنا .. بجد بجد اللي تسكت عن حقها .. تبقي جبانه .. و نهي ساعدت كتير ان البنات تبقي أجرأ و أقوي ..

معلش يا أمجد التعليق طول أوي انا عارفه ..

بس انت عارف انا الموضوع ده و أي موضوع أحس فيه الحق بينتصر بيستفزني جدا

تحياتي

ياسمين

حمادة زيدان يقول...

أمجووووووووووووووووووووووووووووود

أولاً حمدالله ع السلامة يا بطل

ثانياً أنا شوفت البنت دي بس على صباحك سكر زيادة على otv بس بصراحة حكايتها مصدقتهاش أوى !!!
ليه بقي!!!
العربية اللي الواد اتحرش بيها منها كانت من النوع الكبير وهي بنت محندقة وصغيرة جريت ورا العربية وعملت كل العمايل دي لوحدها !!!

أنا مش مع الولد بس أنا شايفه مجرد كبش فدى لكل البنات وكمان حاجة تانية قرصة ودن لكل ولاد التيييييييييييييييييييييييييييييت اللي مش بيحترموا آدمية البنات في الشارع .... في النهاية أنا سعيد بكل اللي حصل وبشجاعة نهى بوند قصدي نهى وبشجاعة القاضي المصري والقضاء المصري كله

والسلام ختام يا جميل

canary يقول...

.
قٌبل أى شئ الف الف حمد الله على سلامتك
ومكنتش اعرف ان الموضوع بتاع التعب كبير كدة بس الحمد لله انك بخير

الموضوع بتاع التحرش

والله العظيم يا أمجد انى كرهت النزول الى القاهرة بسبب القرف اللى بيجرى فى اى وسيله مواصلات وخصوصا المترو

وكرهت ان أخواتى البنات يخرجو فى الشارع هنا بسبب نفس القرف اللى ماليه . البت اختى لسه من كام أسبوع فاتحه قرن واحد فى الشارع لأنه خلاها ماشيه وشدها من الايشارب البنت خافت جدا أحسن يعمل معاها حاجه راحت مميله على الارض واللى لقيته ضربته بيه على دماغه..وطلعت زلطه .. بس كبيرة شويه

تضحك بقى على اللى ألعن؟؟؟أبوة جاى يعتب على بابا بالليل أن بنته ضربت ابنه فى الشارع ودة ميصحش

طبعا انا كنت هكملها واخرج أضرب ابوة بالمرة من غيظى

وغيرة وغيرة بس تفتكر هنعمل ايه؟
كل واحد يعمل معانا حاجه فى الشارع ناخدة ونروح بيه القسم؟

كدة مش هنخرج من الاقسام يا أمجد وهنبقى احنا اللى وش اقسام ههههههه

بجد الموضوع مؤلم ومحرج وجارح وزى ما انت عاوز تقول قول من هنا لبكرة

طولت عليك وانت لسه فى النقاهه

ألف سلامه عليك يا متمرد

جبهة التهييس الشعبية يقول...

مش كل الناس مخها نضيف زيك فيه ناس بتلاقي اعذار للمتحرش

mohamed ghalia يقول...

بجد انت طرقت موضوع فى منتهى الأ همية
التحرش
بس هل ياترى هو عند المصريين كبت ولا العيب فى الناس دى
ربنا يهديهم
تقبل تحياتى
دمت بود

ريمان يقول...

السلااااااااام عليكم

امدوجا

ازيك سلامات

حمد الله ع السلامه

بس انت رتجع بعد الغيبه دى بموضوع جامد اوى

بصراحه والله انا فرحانه بايجابيه قضاء مصر

وكويس انه صدر الحكم ده على سواق التاكسى

عشان كل كلب يلم نفسه ويفكر كويس قبل ما يعمل حاجه زى دى

بقولك ايه
هقولك على حاجه بس مش تضحك عليا

تصور يا امجد انا كنت بسمع كله تحرش دى ومكنتش اعرف معناه لحد من خمس شهور دخلت على جوجل وبحثت عن معناها وعرفت المعنى

يعنى تصور واحده عندها عشرين سنه ومش عارفخ يعنى ايه تحرش الا من خمس شهور بس تقريبا

مش تضحك عليا بقى

الله؟

ميرو انتكة يقول...

السلام عليكم

بيرافو يا باشمهندس

مدونتك جميلة ربنا يوفقك يا رب

وتبقى معمارى كبير كما باذن الله واى خدمة


تحياتى

صبرني يارب يقول...

طبعا مش هي دي المشكله

مش الكبت الجنسي

ولا قلة الجواز

ولا لبس البنات

ولا سعار جنسي

كل دي تقدر تعبرها اسباب هامشيه جانبيه

اما السبب الاساسي هو انهيار النظام

النظام الاجتماعي (مافيش اخلاق مافيش دين مافيش تربيه صح مافيش تعليم صح مفيش اي حاجه صح اصلااااا)

وانهيار النظام السياسي (بالتبعيه فقدان الانتماء ورفع شعار العصيان فيما يملكون )

وانهيار النظام الامني نتيجه طبعا للنظام السياسي
وده من خوفهم ورعبهم بالتالي مركزين على حماية نفسهم مش حماية الشعب والشارع والمجتمع

فساااااااااااااااد

فساد الحكام وفساد المحكومين بالتبيعه

اذا صلح الحاكم صلح المحكوم

وطبع التحرش بالاجانب ده منتشر نتيجى للجهل المتقع الى احنا عايشين فيه وفكرتنا عن ان الجانب مجرد الات جنسيه ليس اكثر ولا اقل

وده الى بتصوره وسائل اعلامهم على فكره او وسائل الاعلام الامريكى

تحياتي لك على التناول للموضوع

Amgad يقول...

ياسمين
بجد معنديش كلام اقوله
ولكن يكفي اني اقتنعت من حواري معاكي
بحاجات كتير اوي
مكنتش واخد فيها قرار
واستفدت منك كتير في الموضوع
تحياتي

Amgad يقول...

حماده
اهو ده اللي حصل بقي
وزي منتا بتقول نهي بونت
اتريق اتريق
مهو انت احد اسباب التحرش اللي بيحصل
بكتاباتك
ههههههههههههههه
لا بجد ياواد قصة لقد كانت اختي دي
من اروع ما قرأت بخصوص التحرش
وانت عارف ياواد انا بحبك قدايه
سلام يا برنس

Amgad يقول...

كناري(صفاء)
مش عارف اقولك ايه بجد
ولكن كلامك مؤلم اوي
وخالص تحياتي لاختك بجد
وياريت كلو يبقي زيها
مش عارف اقولك ايه في موضوع
هنبقي احنا وش اقسام
الموضوع فعلا كبر اوي الفترة اللي فاتت
وقد يكون معاكي حق
خالص ودي وتحياتي

Amgad يقول...

نوارة نجم(جبهة التهييس)
ده ايه النور ده يا فندم
الناس اللي بتتكلمي عليهم دول ناس مريضة
وميرسي علي ثنائك
وان كان الموضوع مش عايز مخ
قد مهو عايز نظرة تحضرية موضوعية
تحياتي

Amgad يقول...

محمد غاليا
ربنا يهدينا جميعا يا اخي
واستني البوست المكمل
خالص تقديري

Amgad يقول...

ريمان
هههههههههههههههههههه
بالعند فيكي
المشكلة مش معرفة اللفظ نفسه
يكفي انك فاهماه كمعني
واني واي
خليكي جميلة زي منتي
وملائكية علي طول الخط
تحياتي

Amgad يقول...

ميرو انتكة
ميرسي ليكي يا مروة
وميرسي للزيارة
ولاي خدمة كمان
اكيد عاينينك للكبيرة يعني
مشروع تخرج ولا حاجه
واقولك في الدعوات ذا سام تو يو
بجد انا مبسوط بمعرفتك وبمرورك
تحياتي