الخميس، 19 فبراير، 2009

عــودة وشخبطــة

اكتب اليكم بعد شهر و8 ايام من اخر مرة كتبت فيها اما اخر مرة رديت علي تعليق عندي هنا كان في شهر عشرة السنة اللي فاتت وتقريبا برده اخر كومنت ليا عند اي حد كان في نفس التوقيت عشان كده ممكن يكون البعض احس بغيابي عن المدونة خصوصا الناس اللي مرديتش علي تعليقاتهم واتمني من الجميع يعزرني واديني رجعت للبلوجرز تاني

شخبطة مع نفسي
مرة ماشي في وسط الحارة في قلب شارع م القدام (القديمة وليس الامام)
كنت نازل اشرب سيجارة واهرب م اللوم والكلام
كنت عامل كام مصيبة ومزاجي زفت و مش تمام
كنت كاره كل حاجه قول حياتي بشكل عام
حالة مش بتحصل كتير بس اما تيجي اوام تخش
صعب جدا منها افوق حتي لو اخدت دش
رجعت بيتي وكنت خايف
حاولت ارمي الهموم عشان ابقي شايف
وقولت لازم انساها صح علشان بجد اقدر افوق
دخلت اوضتي اللي كانت في الدور اللي فوق
فعدت مع نفسي سرحان وافكر في حاجه اعملها
فكرت في حياتي زمان وازاي انا هقدر اكملها
فكرت في حاجات كتيرة لحد مقربت اتجنن
قلب الموضوع قلبة كبيرة وقرفني وخلاني اتعكنن
قولت ليه بس انا هقرف نفسي واحط همومي في النوتة (دماغي)
احسن حاجه افكني خالص واعرف ايه اصل الحدوتة
وبعد مشاورات مع نفسي كتيرة قولت دي سهلة ومش محتاجة
وعرفت ان دي كدبة كبيرة علي نفسي واوحش حاجة
لما نعيش ونخلي الماضي بكل همومه يحاصرنا
واما كمان نديلو الفرصة انو ينكد علينا حاضرنا
وعرفت
ان اللي يفكر في ماضيه وبقوة ميخففش همومة صديق
و اللي يعيش زعلان من جوة عمر مابره يفك الضيق

هناك 27 تعليقًا:

صفـــــــاء يقول...

.
كونك عامل مصيبه فــدى حاجه انا متأكدة منها
وبالعكس يعنى لو انت مش عامل اى مصايب انا هستغرب جدا
وهقول أمجد فين يا جماعه مش باين له اى كارثه من مدة

اللي يفكر في ماضيه وبقوة ميخففش همومة صديق
و اللي يعيش زعلان من جوة عمر مابره يفك الضيق

صح يا امجد ... صح جدا
لدرجه انى متخيله انك بتكلمنى انا او بتوجهه الكلام دة ليا

مش بقولك تغيب تغيب وترجع بحاجه تستاهل اننا نستناك عشانها

حمد الله على السلامه يا برنس ونورت البلوجر كلاته
.

norahaty يقول...

السلام عليكم ورحمة
الله تعالى وبركاته
هو انت اللى كاتب
الكلام الجميل ده ؟؟
حلوة صحيح
وزى ما الاستاذة صفاء
بتقول تغيب تغيب وترجع
بحاجة تستاهل انتظارنا لرجوعك
نورتنا برجوعك ياباشمهندس امجد

نعناعة يقول...

أول خمس أبيات تحفه اوي .. وأخر بيتين برده تحفة أوي

Lyssandra يقول...

هههههههههههههههه

حمدلله ع السلامه يا أمجد

سعدت جداً إنك بعد الغيبة افتكرت تيجي تسلم

ماتعملهاش تاني بقي

:)

....

إيه يابني الهيصه دي كلها ؟؟

بس عارف ؟
انت عندك حق

ان اللي يفكر في ماضيه وبقوة ميخففش همومة صديق
و اللي يعيش زعلان من جوة عمر مابره يفك الضيق

عجبني أوي ده

عارف ؟

لأننا حصل جمع ماضي وحاضر ومستقبل
فلازم يكون لماضينا دور في حياتنا
بس مش معني كده اننا نعيش فيه
فمش نقدر نعيش اليوم
ولا نبص علي بكرة ونستناه

...

تحياتي يا أمجد

ومرة تانيه حمدلله ع السلامه

:))

حمادة زيدان يقول...

امجوووووووووووووووووووووووووودي

عودة جميلة يا ولا

إيه يبني الحلاوة دي

رجعت بيتي وكنت خايف
حاولت ارمي الهموم عشان ابقي شايف
وقولت لازم انساها صح علشان بجد اقدر افوق

عجبوني اوى البيتين دول

جميل والله يا امجد
ومتغبش تاني يا ريس

سلام كبير اوى

كيكى يقول...

ساااااااااااااااااااء الخير يامعلم
مممممممممممممممممممممممممممممم
اية ياعم الحركات دى ياعم المهم الى فى اول البوست والله افتكرت دة فقرة جديدة فى المدونات
***تنويه عن المفقودين**
ام هند يفى
*************
نازل اشرب سيجارة واهرب م اللوم والكلام
كنت عامل كام مصيبة ومزاجي زفت و مش تمام
كنت كاره كل حاجه قول حياتي بشكل عام
حالة مش **************
ما دة كلو بسبب الله يحرقهم سوسو و شوشو واخرون!!!
بس عارف شكلك فى الشخبطة دى..تايه ومخنوق جداا وكرها نفسك والناس..وبجد مخنوق من جواك
مممممممممممممممممممممممممممم
كل دة يعنى عشان الكشك ولا اية؟؟؟
عموما لمة اشوفك بس هبستفك على البوست دة وهجبلك الى انت عارفو!!!
***امشى انا بقى عشان زهقت من الرغى**
عوووووووووووووووووووووو

ريمان يقول...

هههههههههههه


ههههههههههههه



ايه بس

على فكره بقى

اسم البوست غلط

انا من رايى انك كنت تسمى البوست هذيان تلموذ

ههههههههههه


بجد كان هيبقى عنوان تحفه

ارمى الماضى ورا ضهرك يا امجد

وانسى

هاكونا مطاطا يا عم

وادى المستقبل كل التركيز

والله الواحد لو هيعد يفكر فى الماضى هيجيله نقطه

ريمان يقول...

بلاش تشخبط تانى عشان مش اجيب العصايه


انت حر

اسمع الكلام ابلتك

maiosha يقول...

امجد
اولا حمدلله على سلامتك
إيه يا سيدى الغيبة الطوييييييييييلة دى كلها

بس عودا أحمد.. ومحمد وحسيين كمان

وبعدين لحظة بقى.. هى دى شخبطة؟؟
امال لما تكتب يا عم هتكتب ايه؟؟

لأ دى بجد حلوة اوى اوى

تسلم ايدك. بجد تحفة

وممكن طلب بقى
بلاش الغيبة الطوييييييلة دى تانى

ممكن؟

Abu Shahin يقول...

حمد لله ع السلامة يا معلم

ومش عارف ايه الترابط اللى بينا ده
انت تنقطع .. انا انقطع
انا ارجع .. انت ترجع

:)

انت بتحب منير واصالة وانا باحب منير واصالة

انت مرتبشط
:)

فتيات حائرات S&E يقول...

فعدت مع نفسي سرحان وافكر في حاجه اعملها
فكرت في حياتي زمان وازاي انا هقدر اكملها
فكرت في حاجات كتيرة لحد مقربت اتجنن
قلب الموضوع قلبة كبيرة وقرفني وخلاني اتعكنن


بجد تعبير رائع بيوصف احساسنا لما بنحاول نحل مشاكلنا

dodda يقول...

ههههه
دى اغنية راي جديده صح؟؟؟
انت تتجه للفن بقى يا هندزه

متطولش الغيبه

Amgad يقول...

ماما صفاء
-حلو ماما ده بيعبر عن كل اللي جوايا
-اها شفتي بقي انا ببعد عشان المشاكل بس
او الكوارث علي حد زكرك
-اكيد طبعا صح جدا تفتكري انا ممكن اقول حاجه غلط برده p:
-اما بخصوص توجيه الكلام فجايز ده لانك عل بالي دايما
-حاجه تستاهل ايه بس دي زي مبيقولو كده بزيت دماغي عشان اعرف اكتب بعد كده
الله يسلمك يا برنساية ومنور باهله

Amgad يقول...

دكتورة نور
ربنا يخليكي علي مجاملتك
هي مش حاجه تستاهل خالص
بس ليكو وحشة بقي فقولت اكتب اي حاجه
انتي اللي منوراني بسؤالك دايما
دمتي بكل خير

Amgad يقول...

نعناعة
الحمد لله انك بخير
والله قلقت ايه بس الغيبة دي
حوالي سبع تمن شهور
وراجعة تاني براي تحفة
انا معاكي تماما ان المطلع والقفلة
هما اللي شغالين والباقي ده اي كلام
يارب تكوني بخير دايما

Amgad يقول...

ليساندرا
اي خدمة ع الهيصة
ده واجب عليا طبعا السؤال
واسف جدا اني مرديتش علي سؤالك
بس اكيد عزراني نتيجة الغياب
معاكي اوي في كل الل قولتيه وتحياتي لفلسفتك الصعبة
ههههههههههههه

Amgad يقول...

حماده
تشكر يا حبيبي
وبعدين انت هتستعبط غياب علي مين
منا بكلمك في اليوم عشر مرات
هات بوسة بقي

Amgad يقول...

كيكييييييييي
مبلاش سيرة شوشو وسوسو يا كوكو
مش مخنوق اوي يعني ولو كده تبقي عارفة السبب (وش مكسوف)
الكشك خلاص اتفض وبعنا السجاير اللي فيه
ايه اجيبلك اللي انت عارفه ده مش قولتلك قبل كده معدتش بخاف زي الاول وخلي الباقيه في سرك

Amgad يقول...

ابلة ريمان
حلو اوي موضوع لو قعد يفكر في الماضي هيجيله نقطة بس معاكي حق
وحلو حوار ادي المستقبل التركيز ياواد يا مركز انت
وبلاش بقي العصايا قدام الناس
بتكسفيني يا ابلة

Amgad يقول...

دكتورة ميوشة
الله يسلمك ويارب تبقي بخير دايما
شفتي بقي كل دي شخبطة
عشان كده انا مبحبش اكتب لتتخضو بس
ميرسي لزوقك يا ميوشة
ولسه عند طلبي ان اعرف زيزو ده فين
ولن اتزحزح عن موقفي

Amgad يقول...

ابو شاهين
والله انت حبيبي ياابو حميد
والترابط ده شرف ليا يا برنس والله
اما الارتباط فسبني اكلم بابا وارد عليك

Amgad يقول...

ايمان الحائرة ولا اقول ميكي
مبروك ع المدونة
اكيد طبعا تعبير رائع مش عمو اللي كاتبه وعلي فكرة ده مش غرور ده قمة التواضع
ربنا يجبر بخاطرك
ودوسي بقي

Amgad يقول...

دودا
طول عمرك قاريه افكاري
دانا حتي قبل تعليقك علي طول
كان الشاب خالد بيتحيل عليا في التليفون اديهالو وكده بس انا قولتله خليني افكر شوية
وبفكر اديها للشاب مامي
ميرسي يادودا

صفـــــاء يقول...

.
ماما دة ايه ... جاك مو

وبعدين صورة البروفايل بتاعتك مضلمه اوى وغامقه
وانا أطالب وبشدة بصورة هارى بوتر الولد الشقى فهى خير من يمثلكم
.

PrInCeSS BeRy يقول...

امجدددددددددد ازيك يا عثل يارب تكون بخير انا اقدر ازعل منك بردة انت اخويا والله بجد انا بس كنت بدخل اطمن عليك والحمد لله انك بخير يارب دايما ان شاء الله

وما اجمل شخبطتك علشان لو دى شخبطة امال اللى مبيعرفوش يشخبطوا يعملوا اية بجد مبدع تحياتى لك

enjy يقول...

اشششششششششششطة
حمد الله عالسلامة هلا يا هلا اشتقنا ليكم ياما هلا يا هلا....
اخيرا رجعت عودا حميدا يا عم
حلو الكلام ومترتب جدا وعجبنى
الله ينور

Amgad يقول...

صفؤه
من عونيا الجوز يا ماما

عبير
ربنا يديم الموده يارب وتكوني بخير دايما
تحياتي

فرانشيسكا
اي خدمة ده اقل حاجه عندي
مش ناوية تدخلي التاريخ بقي؟