الاثنين، 30 مارس 2009

الجنيه الفضه مابين الرفض الشعبي والالزام الدستوري

رد اليه التباع الاجرة قائلا الجنية ده مبيمشيش معانا يا استاذ
مد يده في جيبه ثم اجاب معييش فكه غيره
اجاب احد الجالسين بجوارة متبطل دوشة بقي يا بني وتاخده
رد التباع ونبي يا استاذ خليك في حالك ولو الجنية عاجبك اوي خده انت
اجاب الاستاذ صاحب الجنية يابني معييش غيره
نظر التباع في الامام الي سواق الميكروباص
يا كوكو واحد معهوش الا جنيه فضه يمشي معاك (وقتها استطعت تفسير اعلان كوكو للنقل والسياحة المكتوبة اسفل الميكروباص وتمكنت من معرفة من هو كوكوا المختص بالنقل والسياحة لكن بقي لي استفسار)
رد كوكو قائلا لا مؤاخذه يا استاذ الجنيه ده مبيمشيش
اجاب دافع الجنيه الجنيه هو انا جايبه من عند ابويا الحكومة هي اللي عاملاه
اجاب السواق عملاه عشان تقرفنا وتطلع ميتين ابونا
رد الاستاذ مازحا ابقي اصرفو ولو متصرفش هاتهولي تاني
والله يااستاذ اني معايا خمسة جنيه فضة مش عارف اصرفها من يوم ماخدتها
وقتها دخلت احدي الفضوليات في الموضوع قائلة طب وريني كده الخمسة جنيه دي وانا ديك ورق مكانها
بذل السائق وقتا كبيرا حتي تمكن من تجميع الخمس جنيهات قائلا يعني هتبدليهوملي
اجابت ايوة بكسر الهمزة
ومد يده بالخمس جنيهات قائلا اتفضلي يا ختي وهاتي الورق
قالتلو وده ايه ده اني فاكراها خمسة جنيه مجمده معرفش انهم مفكوكين
قالها حطيهم في الفليزر ساعتين وهيجمدو اجابت واللي معندهوش فليزريعمل ايه قالها يعني معنكيش تلاجه بفليزر
اجابت ايوة بكسر الهمزة برده
قالها حطيهم في الغسالة وهما هيجمدو
وامام اصرار المواطن قائلا بعد انا اجتاز نصف المسافة يا تاخدو يا تنزلني
رد تباع كوكو هات يا عم وشوف يا كوكو عندك نص جنيه فضة والله منا عاطيلك ورق ابدا
انتهي الموقف ونزلت من الميكروباص
وجدت مكتوبا علي مؤخرته للبيع عشان ترتاحو
وقتها وجدت الاجابة الاخري للاستفسار الاخر و استطعت معرفة مين هما اللي هيرتاحو لما يبيع الميكروباص ربما الحكومة وربما دافعي الجنيه الفضه
اتوقف عند نقطتين
الاولي لما قالو يعني الحكومة عاملاه ليه قاله عشان تقرفنا وتطلع ميتين ابونا
واعتقد ان الرد لا يحتاج الي تعليق فقد اوجز المواطن ببساطته رد فعله تجاه المسألة
الجزئية الثانية جزئية والله منا عاطيلك ورق ابدا وكان العملة الورقية اصبحت هي العملة المعترف بها والمعدنية عملة مهضوم حقها
واتذكر وقت ان ظهر هذا الجنية كان اللي معاه جنيه من دول كانو معاه موبايل اي فون 2800 يوريه لاصحابه ويعينه تاني
وكان كل مواطن يحمل جنيها منه وفرحان بيه اوي
وربما هو مادفع تلك المرأة للتضحية بخمس جنيهات من مدخراتها مقابل اشباع فضولها برؤية الخمس جنيهات الجديه(علي حسب ظنها انها مجمدة ) عشان تبقي توريها لاصحابها
الموقف ده محصلش معايا انا بس
ده مفيش مواطن في مصر محصلش معاه الموقف ده
وفي كل مرة طب ودينا علي اقرب قسم او لو علي طريق اقف عند الكمين الجاي
وهو ما يعيه كل مواطن في مصر ان العمله الزاميه حسب نصوص الدستور
اي ان كل مواطن مجبر علي اخذ العملة المصرية المسموح بالتعامل بها وحدها داخل الحدود المصرية
وعشان كده مبيقدروش يقولو للحكومة لا وكل واحد بيقبض مرتبه اول كل شهر يقدرو بس يقولو لبعضهم لا
وطلع اكتر من صوت علي الفيس بوك وغيره لرفضة لحد ما بقي
دلوقتي فيه الحملة القومية لرفض الجنيه الفضة
وشباب ضد الجنيه الفضة ومتحدون من اجل منع الجنيه الفضة ويمكن مزز ترفض ان يصرف عليها رجالها بالجنيه الفضه
في حين ان الحملات دي غير مجدية وتأخد الموضوع علي محمل الهزل مثل عايزينا نشيل سترة من الدنانير حتي لا تقع الجنيهات وربما كان هذا السبب الاساسي في الرفض الاول وهو ماسمعته من تباع تاني في موقف زي ده وتوالي الرفض بعد ذلك
واستدرك متسائلا احنا من امتي رفضنا حاجه مجبره علينا وقولنا عليها لا كلها فترة وكله بيمشي
اشمعن دي مع انه من المنطق ان لو تأسست حمله لقبول الجنيه الفضة سيكون من الافضل لان لما اخده من واحد وعارف ان غيري هياخده مني مش هيبقي فيه مشكلة اني اخده غير موضوع انو بيقع دي ودي مقدور عليها نسبيا
وهو ما يدفعني لتذكر الحكمة القائلة ان تعرضت للاغتصاب ولم تستطع ان تفلت فتمتع
وادينا حاولنا ولم نستطع ان نفلت خلونا نتمتع بقي
وللعلم الجنية الفضة له العديد من المزايا
علي الاقل انه يدفعنا الي احترامه علي عكس العملات الورقية
التي نوزعها بدلا من كروت المناسبات في السبوع واعياد الميلاد وهي النظرية الاقتصادية ذات برائة الاختراع المصرية
منها توفير للورق اللي هيتطبع عليه ومنها استغلال الناس لهذا الورق بعد ذلك حين الحاجه ومنها ان اسم ابنهم يصل الي كل منطقة في ربوع المحروسة
كذلك يتم بعث الجوابات الغرامية مكتوبه علي الجنية والعملات الاخري حتي تتمكن المحبوبة بعد ذلك من صرف العمله بعد قرايتها
وحتي تكون مرغمة علي اخد الجواب
ان لما يكن حبا في الراسل فحبا في قيمة العملة بمبدا(اللي يجي منه احسن منه وم اللي جايبينه) وربما تري ان المصاصة افيد منه
كذلك استخدامه للذكري الخالده وتجريب الاقلام الجديدة وربما بدلا من المناديل في نفه زنقتك اوي وسط ناس محترمة وربما بدلا من اوراق البفرة في لف الحشيش وقتها بس ممكن تبقي سيجارة متكلفة
وصباح الخييييييييييير



هناك 10 تعليقات:

صفــــاء يقول...

ما انت كنت ماشى كويس يا أمجد لحد ما جيت فى الاخر وهيست على الاخر
وعموما أحنا هنا برضه لا نعترف بالجنيه الفضه مع اختلاف أنه حتى منزلش عندنا
بس لو معاك كام جنيه مضايقينك روح محطه المترو أركب بيهم
اتضح ان الجهه المصريه الوحيدة اللى بتتعامل بالجنيه الفضه بعد دار سك النقود هى هيئه المترو
وتدخل تلاقى موظف التذاكر قدامه كوم بالهبل كدة
تقريبا بياخدوة يودوة وزارة الماليه تانى وهى تصححهم
يعنى حاجه زى عمله تذكاريه أو شفرة كدة بين المصالح الحكوميه
مساااااء النور يا أمجد باشا

.

ريمان يقول...

تلموووووووووذ


عارف

انا مش بحب الجنيه الفضه ابداااااااااا


بحس انه مالوش قيمه الصا ولا احب اشتاله معايا

ههههههههههههههه


معاك حق والله

maiosha يقول...

ههههههههههههههه
ايه يا امجد الحلول العبقرية دى

بصراحة وبينى وبينك يعنى .. اذا كان للجنية الفضة ده اى فايدة .. فهى انه من ايد لإيد مش بيتبهدل زى الجنيه الورق اللى بيبقى شكله كإنه طالع من بق كلب
هههههههههههههههه

وكل جنية فضة وانت طيب .. وعقبال ما يعملوا عشرة جنيه برونز

قلب ينبض لله يقول...

فعلا الناس رافضة التعامل بالجنيه الفضة وأنا معايا منهم كتيير
أول لما الجنيه الفضة طلع كنت مبسوطة جدا وما أعرفش ليه يمكن مثلا تغيير
الله أعلم

المهم أنا شايفه أن الموضوع لايستحق كل هذا الجدل والرفض والخنائات
ماله الجنيه الفضة دا حتي ينفع في اليوم الفالصو:)

أسلوبك في رصد الموقف والانطباعات ممتع ومشوق
دي شهادة تعتز بيها علي فكرة:D

Unknown يقول...

ههههههههههههههههههههههه
كله حصل معاه الموقف ده بس للأسف الناس مش قادره تقتنع ان الجنيه ده الزامي مش أختياري .. و عقوبة عدم تداول العمله الرسميه للبلد بتوصل لثلاث سنوات و تعتبر جنحه ^^
المفروض الحكومه توعي الناس أكتر من كده بقى يا يوقفوا العمله :)

Unknown يقول...

صرة من الدنانيييييييييييييييييير وناخذ من كل رجل قبيلااااااااااااااااااااااااااااا
عارفة ان قبيلة بتتكتب كدة بس القافية حكمت معلش

maiosha يقول...

إنت فين يا امجد

مختفى فييييييييييييييييييييييين؟؟

حماده زيدان يقول...

جروب جريدة الصباح العربي بيت المدّونين العربي
http://www.facebook.com/home.php#/group.php?gid=78080770039

أمجوووووووووووووووووووووودي

وحشني موت ياد معلش عملت عندك اعلان بس مجبور اخاك لا بطل

حمادة زيدان

ندا منير يقول...

هاى امجد
يااااا بقالى كتير مدخلتش هنا

المصريين دول ساعات بيحبوا يتلككوا على اى حاجة عشان يزعقوا ويحرقوا دمهم
طب وايه يعنى ما يخدوا الجنيه الفضة وعادى جدا فى غيرهم هيخدوه والحياة هتمشى
لكن يا ساتر على طول بباقى زعيق فى المواصلات على المووضع دا

كيكى عوووووو يقول...

صبااااااااااااااااااااح النور
بص ياسيدى هو هنا لو كتبت زعلااااااااانة من هنا لبكرة الصبح مش هتضينى برضة بس زعلانة زعل جامد بجد اوى اوى
***انا اول مرة ازعل كدة على فكرة**
عموما عقابك المفروض نجيب السرة من الدنانير دى ونحطها على قلبك ونغرقك فى الرومانة!!
عووووووو