الخميس، 26 يونيو 2008

دلوقتي فهمت...............محدش فاهم حاجه

محدش فاهم حاجه ومحدش فاهم يعني ايه بلدنا بتتقدم بينا الشعار اللي الحزب الوطني واخده اليومين اللي فاتو دول
انا بقي هرشت التيته وفهمت ازاي بلدنا بتتقدم بينا لما مجلة
فورن بوليسي او السياسات الاجنبية قالت في تقرير ليها ان مصر في العام الجديد ترتيبها ال40 علي مستوي العالم من حيث افشل الدول
و فشل الدولة حسب تصنيف المجلة خاضع لعدم قدرتها علي السيطرة علي أراضيها ولجوئها للقوة وفشلها في اتخاذ قرارات مؤثرة وعدم قدرتها علي توفير الخدمات وفشلها في التعامل بفاعلية مع المجتمع الدولي، وعدم قدرتها علي جمع الضرائب، إضافة إلي معدلات الفساد والجريمة

و اعتقد ان علي ايد ابو جمال هنبقي ان شاء الله ال30 السنة اللي جاية وربنا يديلو طولة العمر ونتقدم ف الترتيب ونوصل للمركز الاول ان شاء الله ف عهد الرئيس تامر جمال
وهكذا تكون مصر فعلا بتتقدم بينا .......................ف ترتيب الاسوأ

هناك 40 تعليقًا:

Unknown يقول...

السلام عليكم ورحمة الله وبركاته
Amgad**
قلك بنتقدم لورا لقدام
مش مهم المهم اننا بنتقدم!!
يابّاى على المصريين ياأخى
ما بيحمدوش ربنا ابدآ
وبعدين هى بلدهم وهم
حريين فيها,احنا ضيوف
وكتر خيرهم انهم مضيفنا فيها
حننهب!!!!!

Amgad يقول...

تمام يا نورا
دي وجهة نظري انها بتتقدم وخلاص بس لو عايزين ياخدوها شعار انها بتتقدم لورا يفهموها للشعب هي دي التيتة
ام من ناحية بلدهم ومستضيفنا فيها فاقولك ده شيء اشبه بالحاصل ولكنه مش حقيقة بالمرة فمش لازم نرضي بالوضع القائم
هارشة؟

ذربونة هانم يقول...

البلوج كله سياسى كده
انا بكتئب لما بسمع فى السياسه
:'(

Unknown يقول...

يشرفني أن أدعوك لزيارة مدونتي ووضع لمساتك عليها..
أنتظر الزيارة
تحيتي لك
مدونتي هنا
http://kanyatklam.blogspot.com/

Rivendell** يقول...

تفتكر كانوا عارفيني فعلا ان هو دا الهدف لما عملوا الاغنية دي

ما استبعدش

غير معرف يقول...

انا كمان والله ما فاهمه حاجة بجد يعني حقيقي

اللي فاهم يفهمني احسن بجد اتمخولت من اللي بشوفه حواليا من اليفط الكتير الحمرا اللي ماليا الشوارع ونفسي اعرف الناس دي عايزة تجننا زيادة اكتر من اللي احنا فيه؟؟

مها ميهوووو

Unknown يقول...

مصر بتتقدم بينا اممممممممممممممممم بص حضرتك هو ممكن يكون قصدهم بتتقدم بينا فى الترتيب الاسوء فعلا ..... بس انا رايى انها غلطة مطبعية ما حدش خد باله منها هى اصلها كانت مصر بتتندم بينا بس هم لقوا بتتقدم شغالة قالوا خلاص تتقدم تتقدم ماحدش يقدر يقول تلت التلاتة كام........
زيارتك شرفتنى وتعليقك خلانى منشكحة اخر انشكاح بس دة نفس رايى فى مدونتك على فكرة اتمنى نتبادل الزيارات على طوووووووووووووووووووووول

Amgad يقول...

ذريونة هانم نورتي البلوج
كان يكفي اقرا اسمك عشان اعرف انك مكتئبة م السياسة وم الاقتصاد وم الادب وم الرياضة ومن كل حاجه حاولي تتماسكي شوية وبلاش تتزربني علي كل حاجه

علي فكرة انا اوقات بكون كده وبكتئب برده من السياسة وبحسد الناس اللي مش بيفهمو فيها علي راحة بالهم
خالص تقديري ليكي واتمني مشاركتك علي طول حتي لو كانت بزربنة

Amgad يقول...

كاتب مصري انا اللي يشرفني زيارتك هنا وطبعا يشرفني اني ازورك بس اتمني تكون قريت حاجه مش مجرد المرور ووضع الدعوة خالص تقديري

Amgad يقول...

rivendell
رغم اني مش فاهم يعني ايه الاسم بس ميرسي جدا علي زيارتك ويشرفني انك تمديني بارائك وتعليقاتك
دي مش اغنية ده شعار
اكيد هماعارفين ان مصر مش بتتقدم بينا ولا حاجه يمكن عشان يعملو مصداقية بينهم وبين بعضهم حطو ده ف مخيلتهم
خالص تقديري واتمني نفضل علي تواصل

Amgad يقول...

احسن تستاهل
خالص عزائي ليكي واتمني انك تلاقي موبايلك
بجد قلبتي عليا المواجع ومش هقول اكتر من اللي قولته عليكي لانك اكيد حسيتي انا اقصد ايه
خالص خالص خالص تحياتي وشرف ليا طبعا مشاركتك واحلي تحية للنوبة

Amgad يقول...

انجي او المهم هات م الاخر
ههههههههههههههههههههههههه
تصدقي جبتي اللي تاهت عني وحطيتي احتمال جامد جدا ان ممكن يكون ده اللي حاصل
بجد مدونتك هايلة ومش محتاجة كلام روعة يعني اتمني حضرتك خدي بالك حضرتك تمدينا دايما بتعليقاتك وتكاتك وبجد زيارتك انتي اللي خلتني منشكح اخر انشكاح

الم يقول...

كتبت تعليقات كتيرة اوى الصراحه وكل اما اجى انشرة يقولي عذرا لم يتم استكمال طلبك
شكلي فقر ونحس من يومي
يلا ماعلينا
المهم

هو فعلا محدش فاهم حاجه
تعرف
اما قولت البلد بتتقدم بينا
افتكرت اعلان الضرايب لمصلحتك
هههههههههههههههههبجد مهزله ومحدش فعلا فاهم حاجه
اقولك سر خطيييييير
اما الالان بتاع البلد بتتقدم بينا دهوت بيجي
بقعد اعيط
بحس بجسمي بيقشعر كدة علشان ابلد
يلا ربنا معانا بقه

المهم
مشكووووووووووور ع مرورك الغالي عندي
وشكرا ع المجامله الرقيقه منك
اه صحيح
الكلمات ماشاء الله خرافه

تقبل منى بقه خاطرتى دي

رساله لبلدي مصر
سامحينى يابلادى
ياشئ كبير ومش عادى
ياطير محبوس وبينادى
ياغنوة تاه معناها
وسط الغيطان بنلقاها
يادنيا كلها الوان
فى عيونا دايما انسان
شبابك يابلادى زى الفرسان
هدفهم دايما تصليح المكان
عاوزينك تكونى احلى مدن الاسلام
عاوزينك زهرة تعطر بالايمان
اوعى تخافى يابلادى هنرجع زى زمان
هنكسر كل قيود الطغيان ونادى فى كل مكان
(انقذو بلادى ياجدعان)
انقذو ارواح بتروح فداء وشباب بيموت فيه الايمان
اطلقو سراح الحريه وانشروها فى كل مكان
ارفعو الغلاء عن رقاب كل انسان
سيبو الناس تتكلم بدل ماتموت من الكتمان
سيبو الشباب يعمر وينشر الخير فى كل مكان
سيبو مصر تكون مصر وابعدونا عن سياسه الامريكان
شبابك يامصر بيحبك وكتير بيقولك
مصر ياام ولادك اهم شبابك علشانك شال الهم
مصر يامثال للطيبه والحنان يامجرى الدفئ والامان
مصر يااحلى غنوة فى قلب كل انسان
ويكفينى انى اقولك بحبك يامصر مهما كان
وانتم بقه هتقولو لمصر ايه؟

كتبتها جيلان صالح
تحياااااااتى
سلام

Amgad يقول...

عزيزتي الم او جيهان صالح
احب اقولك ربنا معاكي ومع اي حد بيحس البلد او بيتالم لاوجاعها او بيتاذي بسبب حبه ليها سواء اذي مادي او معنوي
بجد سعيد جدا لتعليقك واتمني تكرار مرورك

ملحوظة
بخصوص الشعر اللي انتي كاتباه
لي ملاحظات عليه
الشعر كمعني زاخر جدا ورائع
خيالك خصب والشعر غير مفتعل
خانتك القافية في الاخر ولم توفقي فيها التوفيق اللي ف الاول او الوزن فيه لخبطة بسيطة كان ممكن تعالجيها
الموهبة موجوده اوي عندك ومشروع شاعرة هايلة
اتمني ملحوظتي متزعلكيش واتمني اشوف تعليقاتك علي طوووووووووووووووووووووووووووووووول

Amgad يقول...

الم
نسيت اقول شرف ليا انك تمديني بالشعر ده علي مدونتي وميرسي بجد علي الهدية وان شاء الله استطيع ردها

Unknown يقول...

انتوا كده دايما

تاكلوا و تنكروا زي القطط

يعني نتقدم ميعجبكوش مانتقدمش ميعجبكوش حاجه غريبه اوي

كفايه اننا اتقدمنا .. دي حيثيات انت و انا منفهمهاش

ده بس عشان الحسد

انت عاوز البلد تتقدم زي ما انت عاوز و لا ايه ؟؟

انت عايش لوحدك ولا ايه ؟؟

مش فيه ناس تانيه ليها رأيها ؟

و بما ان فيه أراء تانيه

إذن .. لازم نحاسب من الحسد

-----------

المود الحالي:

واحده من كتر ما الغيظ لم تجد الا السخريه مجالا للتنفس

ربنا يرحمنا برحمته الواسعه

معلش طولت بس كان لازم اطلع كل حاجه بقي :)

و فعلا محدش فاهم حاجه

أقولك ؟؟

1
2
3
4
5
Smile


ياسميـن
نوته و قلم

Muna يقول...

ليه كده بس ..
دنا بفطر ومزاجي رايق وفل الفل .. لازم يعني الاخبار دي !!!

بس شوف يا أستاذ أمجد ..
الحكاية مش محتاجة إحصائيات أو كلام مجلات ..أجنبية
لأن الحكاية باينة زي عين الشمس!

البلد فعلا بترجع لورا ... ورا اوي .. ومحتاجة بلدوز يتعاون مع باخرة عملاقة وصاروخ من بتوع ديسكفري يدفعوا البلد بالقوة عشان تمشي عالطريق الصح

ربنا يبعت!!

الم يقول...

يااستاذى
دة شرف ليا والله
اسعدني تعليقك ممرورك
ربنا يكرمك يارب

تحياتي
جيلاان

Amgad يقول...

دكتورة مني ميرسي خالص علي التعليق
انا عارف ان الحكاية باينة اوضح من عين الشمس وان البلد حتي لو جابولها الرجل الاخضر او جودزيلا او حتي مازنجر مش هيعرفو يزقوها او حتي يسيبوها زي مهي تحياتي ليكي

واتمني تشاركي معانا علي طوووووووول
اخبار امتحاناتك ايه
ابقي ركزي علي الفرشة والببرونة والمعجون
هههههههههههه
خالص تحياتي

Amgad يقول...

عاقلة علي ارض الجنون
فاتني موضوع الحسد ده بجد
وفعلا انا لقيتني بعد مقريت تعليقك اني طماع
مش كفاية عايزها تتقدم هختار كمان؟
انا مش لوحدي ف البلد فعلا

كتير اوي لما بيفيض بيا من وضع مبلاقيش الا السخرية للتعبير عن رايي
تقريبا لسه لحد دلوقتي مكتبتش اللي عايز اكتبو لاني مش عارف كام واحد هيفهم بس بردك ده لقيت في عقليات بتتشابه معايا كتير وبتتفوق كمان
ردك اسعدني جدا واتمني نتبادل الزيارات علي طووووووووووووووووووووول

Amgad يقول...

جيلان صالح
اولا اسف علي الغلط في الاسم
ثانيا حاشا لله انتي اللي استاذتي انا يمكن يكون ليا راي ثاقب نسبيا في الشعر بس لو شفتي اشعاري هتلاقيها ناقصة كتير عشان كده مش بعتبر نفسي شاعر وان شاء الله هبقي احط كام تكاية كده بس بعد منمنتجهم الاول ههههههههههههههه

بجد مش مصدق نفسي رايين ليكي ف صفحة واحده

catroz يقول...

لنا الله ..

Dr.m يقول...

السلام عليكم
مدونتك رائعه..
جايز احنا مش فاهمين ايه قصدهم بالتقدم ..جايز هم واقفين الجهه الأخرى فالتقدم يبقى لورى ..جايز
تحياتي
سلام

Amgad يقول...

catroz
اسعدني جدا مرورك اكيد لنا الله تعليق مختصر ومعبر جدا اتمني اشوف مشاركتك علي طول واكون عند حسن ظنك

Amgad يقول...

دكتور محمد حسين
ميرسي جدا علي المجاملة دي

وبجد انا سعيد اوي بالحل ده ده فعلا حل منطقي جدا للغز بتتقدم بينا يدل علي فكر واعي وفلسفة متفجرة
وبقي ده الحل التالت للغز بعد حلي وحل انجي
وان كان مؤيد ليا بنسبة كبيرة مع اختلاف المعني
اسعدني بجد مرورك واتمني تبقي معايا هنا علي طووووووووووووووول

bota يقول...

السلام عليكم

ايون كده طمنتني على مستقبل البلد
وخلتني اتفائل اكتر ما انا متفائله

ربنا يوفقك

Amgad يقول...

bota
اطمن يا حبيب قلبي كل شيء يدعو الي التفاؤل
كفاية ان في شباب جميل زيك مالي البلد

Amgad يقول...

bota
متاسف بجد انا رديت علي طول من غير متابعة البروفايل نظرا لانشغالي بموضوع معين
وبوتا لمن لا يعرف هي احدي المواهب الفذة العميقة جدا بجد ايه العمق ده وايه الروعة دي وايه الخيال ده وايه المحاكاه دي
ادعو من يقرا الرسالة للذهاب الي مدونة بوتا وقراءة زهور
او احزان الورود كما اسميها

Unknown يقول...

ردك علي تعليقي أسعدني جدا

و فعلا محدش فاهم حاجه إطلاقا .. مطلقا .. بتاتا

انا جيت عشان اقولك ان البوست اللي انت مستنيه تم نشره بحمد الله بنجاح

و يهمني رأيك

ياسمين

dodda يقول...

شلوت سعادتك دفعه للامام يا فندم!!!

قلب ينبض لله يقول...

وربنا يديلو طولة العمر ونتقدم ف الترتيب ونوصل للمركز الاول ان شاء الله ف عهد الرئيس تامر جمال

طيب ومين قالك انه هايسمي ابنه تامر مش يمكن يسميه وائل أو هيثم أو هادي
:)) :D

الواحد بيزعل اوي وبيحس بخيبة الأمل لما بيشوف التصنيفات اللي من النوع دا
زي مثلا مصر ماكانش ليها ترتيب في افضل 500 جامعه علي مستوي العالم

اتمني بجد ان مصر تتقدم بينا

dina seliman يقول...

انا فاكره انى كنت قريت الترتيب ده ان مصر رقم 40
واسرائيل رقم 59

حقيقى سعدت جدا بتقدمنا وتطورنا على اسرائيل
حتى لو كان فى الفشل
اهه كله تميز
وربنا يسترها معانا

أية الشقية الشعنونة يقول...

وكان الله يحب المحسنين
هههههههههههههههه
تحياتى

bota يقول...

السلام عليكم

انا جيت تاني بس حبيت اقول لحضرتك حاجه صغيره ان قصيده زهور ديه من تأليف أمل دنقل
وانا للاسف لا اجيد كتابه الشعر بالكاد اجيد القراءه والكتابه ههههههههههه
متشكره على روح حضرتك العاليه
وزيارتك اسعدتني

على الزيبق يقول...

الدعوة لحظر الحزب الوطنى

لماذا لا نقوم بعمل حملة قومية من أجل حظر وحل ما يسمى بالحزب الوطنى
ولماذا لا نقوم برفع دعوى قضائية امام المحاكم المختصة
نتهم فيها الحزب الوطنى بأنه حزب يهدد الدستور ويعطل الدستور
وبأنه حزب يزور ارادة الشعب ويستغل ما لديه من سلطات ونفوذ من أجل البقاء فى الحكم لأجل غير مسمى


قد يقول قائل من الصعب أو من المستحيل أن يحدث هذا الأمر ومن المستحيل أن ننجح فى حظر الحزب الوطنى
وانا غرضى ليس حظر الحزب كأجراء قانونى .. وإن كان هذا ممكن .. ولكن غرضى هو مهاجمة هذا الحزب الفاسد الفاشى الفاشل المزور
مهاجمته قضائياً وشعبياً وإعلامياً
فلنتخيل سوياً هذا الخبر على صدر صفحات الجرائد وفى مقدمة النشرات الأخبارية
قوى حزبية وشعبية واعضاء معارضين بمجلس الشعب المصرى
يطالبون بحظر الحزب الوطنى الحاكم ومحاكمة اعضائه

ان مثل هذا الخبر كفيل بزلزلة عروش وقصور
هذا الخبر فقط يستطيع أن يفكك أوصال السادة اعضاء هذا الحزب وقياداته

اتمنى أن نناقش هذه الفكرة وأن نبحث فى سبل تحقيقها
والباب مفتوح لتقديم مقترحات وأفكار أخرى من أجل أنجاح هذه الفكرة
ومعاً من أجل حظر الحزب الوطنى ( الديمقراطى
تحياتى لك استاذ مجدى
وعلى فكرة انا فاهم كل حاجة
ههههههههههههههههه
مدونتك رائعة

قررت أكون عانس يقول...

شكرا على زيارتك للمدونة
بس لو وصلنا للمركز الاول فى عهد تامر مبارك يبقى احنا كده متأخرين اوى
و فى حاجة كمام انا اللى اعرفه ان اسمه هيثم مبارك مش تامر ولا تامر ده ابن هيثم

Unknown يقول...

طب وبعدين يعنى؟البوست الجديد امتى؟
انا مستعجلة اوى جدا خالص

funckydoctor يقول...

ههه
هرشت الليلة علا وصبح صبح
لسه كمان يا معلم هنتروق
تحياتى

Amgad يقول...

عاقلة علي ارض الجنون
تم الدخول وبجد اتحفتيني علي راي اللي قالتها واتمني تعليقي يكون معبر

dodda
شلوت سعادتك دفعة للامام وياريتنا عصافير ف قفص صدر سعادتك والقفة اللي سعادتك ضربتهولي شالي الحساسية اللي كانت عندي او موت الناموسة اللي علي قفايا
دعوة للموالسة بجد ميرسي علي زيارتك واتمني المداومة وانتظريني علي مدونتك لما النت يرجع

قلب ينبض لله
انتي عايزة تودينا ف داهية ولا ايه انا اقصد تامر جمال الغندور هههههههههه
اوعي تفهميني صح اقصد غلط
وبالنسبة لموضوع الجامعات اللي يزعل فعلا لما تلاقي جامعات من جنوب افريقيا ومن كينيا والكونغو باين ههههههه
اللي يزعل بجد ان اللي انتي بتدرسية او درستية ولسه هتدرسية
ده بطيخ بشهاده اللي عملو التصنيف وابقي سلميلي ع الرياده

دينا سليمان
لا هتلاقينا متقدمين علي دول كتير جدا اسرائيل وامريكا وانجلترا كل دول العالم وبجد حاجه جميلة لما تلاقينا متقدمين كده تعرفي ان ف ترتيب الفيفا (كورة) احنا الاربعين برده صدفة مش كده
بس علي فكرة اسرائيل ف ده بقي قبلينا يعني حتي الكورة سابقانا فيها احمدي بقي ربنا اننا سبقناها ف حاجه
خالص تقديري ليكي واستني رد الزيارة برده لما النت يرجع

ايه الشقية الشعنونة
ميرسي جدا علي زيارتك
قصدك وكان الله بالسر عليم
بجد سعيد ان الموضوع قدر يضحكك واتمني نتواصل علي طووووووووووول

بوتا
حبيت اقول لحضرتك(أيه حضرتك اللي كله ماسكها ف الكلام دي )
زي فيلم ضد الحكومة لما القاضي بيقول للشاهد بلاش باشا دي الالقاب اتلغت من زمان قالو حاضر يا باشا فانا خايف اقولك بلاش حضرتك دي تقوليلي اوكي حضرتك ههههههههههه
ان متهيالي انتي منوهتيش لكده ف المدونة وبعدين ده نابع من نقص معرفتي بشاعر عظيم زي امل دنقل عموما يكفي انك خليتيني اطلع علي شعر جميل زي ده
ويكفي تواضعك في الكلام
واتمني نتواصل دايما

علي الزيبق
محسوبك امجد يا زعيم
احييك علي الدعوة وبجد بشوف بذرة امل في حاجات زي كده وبشوف اتحاد شعبي من ناس مثقفة مقدرش اقول لا رغم اني متاكد ان الموضوع مش هيبقي ليه تاثير اعزرني بس لازم اقدم الدعم لحاجه زي كده لعل وعسي ومقدرش ارد عليك كما ير المتكاسلين شوف انا اقدر اعمل ايه وانا تحت امركم

قررت ان اكون عانس
انا اللي بقولك شكرا علي اتاحتك مدونة رائعة زي دي لزيارتنا
وميرسي علي مرورك واتمني الدوام
اما بقي من ناحية هيثم فللعلم هو لسه متجوز قريب ومخلفش وزي مقولتلك انا اقصد جمال الغندور اوعي تفهميني صح
لكن هيثم دي في اعتقادي انها ممكن تكون اجماع يعني واحد مثقف قالها والكل اخدها وراه وقد يكون ابن اخوه لا اعرف
ولكن انا قولت تامر جمال
ولو انتي مصرة علي هيثم
يبقي تامر جمال هيثم جمال محمد ....
وانتي عارفه الباقي
يعني تامر ده حفيد هيثم
هارشة ولا ايه؟؟

انجي
بجد خليتيني منشكح اخر انشكاح
يعني بجد دخولك بيشرفني وانتي اكيد حاسة معزتك الخاصة عندي كمثقفة تقيلة اوي
معقول كمان بتستني بوستاتي
بجد اسف جدا المشكلة في النت عشان كده مش قادر اتابع الناس او احط بوست تقبلي شكري وتحياتي وتقديري لمرورك وبجد خليتيني منشكح جدا

فنكي دكتور
اولا نايس نيم
ثانيا بكرة تروق وتحلي واللي جاي احلي
والله الله ع المستقبل باين ف عيون كل ولادنا وقول ياباسط تلاقي الدنيا هاصت
ههههههههههههههههه
وبجد سعيد جدا اني في ناس كتير هارشة التيته او فاهمة الليلة
عموما هي التيتة اللي بتتهرش
ام الليلة بتتفهم لانها شيء معنوي مش مادي اما التيته شيء مادي تقولي هي ايه اقولك هي التيته بقي وخلاص
تحياتي

Amgad يقول...

بقي انا اقول
اسف بجد لكل متابعيني ومن اتابعهم
عن تغيبي الفترة اللي فاتت ولكن النت كان ومازال فاصل عندي وانا داخل دايل اب وبجد الموضوع صعب اوي اني اتابع وانا كده او حتي ادخل لان التليفون مش تحت ايدي
شده وتزول وتقبلو اعتذاري